आयज निर्णायक मॅच

भांगरभूंय | प्रतिनिधी

भारत आनी न्युझिलॅण्ड ह्या पंगडां मदीं आयज माळेंतली तिसरी आनी निमाणी टी-20 मॅच हांगाच्या नरेंद्र मोदी स्टेडियमाचेर जातली. दोनूय पंगड सध्या 1-1 अशे बरोबरींत आशिल्ल्यान दोगांकूय आयची मॅच म्हत्वाची थारल्या. जो पंगड जिखतलो ताच्या नांवार माळ जातली.

भारताच्या टॉप ऑर्डराचेर बरें प्रदर्शन करपाचे चेपण आसतलें. पयल्या दोन मॅचींनी भारताच्या बॅट्समनांक म्हणपा सारकें प्रदर्शन करपाक जमूंक ना. ताका लागून आयचे मॅची खातीर पृथ्वी शॉक संद मेळटली व्हय असो प्रस्न क्रिकेट मोग्यांक पडला.

रोहित शर्मा, विराट कोहली आनी लोकेश राहुल ह्या अणभवी खेळगड्यांचे गैरहाजेरेंत शुभमन गिल, ईशान किशन आनी राहुल त्रिपाठी हे तिकडीक संदीचो फायदो घेवपाक जमूंक ना. आयची मॅच जाल्या उपरांत भारताची सध्या आनीक टी-20 मॅच आसची ना. ताका लागून युवा खेळगड्यांक ऑस्ट्रेलिये आडचे टॅस्ट माळे पयलीं आपलो ठसो उमठोवपाक निमाणी संद आसा.

बांगलादेशा आडचे वन डे मॅचींत दोट्टी शेंकडो मारपी ईशान किशन लय मेळोवपाक अपेशी थारला. टर्न जावपी खेळपट्टीचेर शुभमन गिल लेगीत धडपडला. वन डेतल्या फॉर्माची पुनरावृत्ती टी-20त करपाक अपेशी थारला. नेमान तिसरे सुवातेर बॅटींग करपी कोहलीचे गैरहाजेरेंत मेळिल्ले संदीचो फायदो घेवपाक त्रिपाठीक जमूंक ना. आयतारा जाल्ले दुससे मॅचींत सुर्यकुमार यादव आनी हार्दिक पांड्या हांकां लागून भारताक कशे भशेन 100ची मोख मेळोवपाक येस आयिल्लें.

माळे खातीर तयार केल्ल्यो खेळपट्ट्यांचेर प्रस्नचिन्न उप्रासला. आयचे मॅची खातीर तयार केल्ली खेळपट्टी लेगीत स्पिनरांक मजत करतली काय असो सगल्यांक प्रस्न पडला.

स्पिन विभागांत युजवेंद्र चहल आनी कुलदीप यादव हे एकठांय खेळिल्ल्यान प्रतिस्पर्धी पंगडाचेर चेपण हाडपाक मजत मेळ्ळ्या. दुसरे मॅचीतली खेळपट्टी स्पिनरांक मजत करपी आसून लेगीत चहलाक फकत दोनूच ओव्हरी मेळिल्ल्यो. मुखेल्याचो हो निर्णय चडश्या जाणांक अजाप भरीत दिसपाक लागला.

मजगतीं, नो बॉला कडेन झुजल्या उपरांत अर्शदीप सिंग लखनौ जाल्ले दुसरे मॅचींत फॉर्मांत दिसलो. ह्या आत्मविस्वासान तो आयचे मॅचींत खेळपाक शकता.

दुसरे वटेन न्युझिलॅण्डाक आपले मदले फळयेंतल्या बॅट्समनां कडल्यान बऱ्या प्रदर्शनाची आस्त आशतली. भारतांत माळ जिखपी न्युझिलॅण्डाक खातीर उर्बा दिवपी गजाल थारुये.