भांगरभूंय | प्रतिनिधी
जाका येता राग ताका खाता वाग, हें कवित कोणाकुय राग बी आयल्यार ल्हानपणात म्हणटाले आनी मनयताले. तेन्नाचो काळूच वेगळो. वाग ह्या प्राण्याची धाक आनी भंय सगल्यांक दिसतालो. आयज जग जालां परतें. आयज वागाक मनशाचो भंय दिसता. जीव आसल्यार भीक मागून खायन ही परिस्थिती. वागाचें प्रमाण इतलें देवलां की आयकून पसून वायट दिसता. तांचेर आयिल्या संकटाचेर तोडगो कितें कांय हो सगळ्यांकूच पडिल्लो एक प्रस्न.
दरवर्सा 29 जुलय हो दीस अंतरराष्ट्रीय वाग दीस म्हूण मनयतात. ह्या दिसाचें खाशेलपण म्हळ्यार लोकां मदीं वाग संरक्षणा विशीं जागृताय निर्माण करप. ह्या दिसा सरकारा वतीन विंगड विंगड कार्यावळीचें आयोजन जाता. लोकांक जागृत करप होच ताचो हेतू. फुडल्या काय वर्सांनी वागाची जमात वाडची तशेंच ती सुरक्षित आसची म्हूण सरकारा कडच्यान खूप यत्न चलल्यात. वाग बचाव प्रकल्पूय चालीक लायल्यात, आतांच्यानूच जर वागांची राखण जालीना जाल्यार सगळ्यांक वाग ह्या प्राण्याचो विसर पडटलो. ‘एक था टायगर ‘ ही गत जायना जाल्यार पुरो हो चलिल्लो हुस्को. रानां, झाडां वांचयलीं नात जाल्यार एक- एक करून ह्या पर्यावरणाचे भाग नश्ट जावंक वेळ लागचोना. “वाग वाचयात, वागांक जगयात…भुरग्यांक वाग पळोवनी उक्त्या दोळ्यांनी, इतिहास जावन पुस्तकांनी न्हय”.
वागाक कोण वळखना म्हूण आसा? ना. असो कोण आसचो ना. पूण कांय तेपान आमी वागाची वळखूच विसरतलीं अशें दिसता. ताच्यो यादी मागीर फकत पुस्तकांनीच आनी युट्यूब्यार घडये पळोवंक मेळत. आता परिस्थितीच तशी आयल्या मागीर कितें आनी म्हणप? ही गत आमीच केल्या आमच्या सैमाची, आमच्या पर्यावरणाची.
देवान निर्मिल्ल्या ह्या संवसारात वेगवेगळे प्राणी आसात. तातलोच एक म्हळ्यार वाग. ताज्यो खुपश्यो जाती प्रजाती आसात. आमच्या भारत देशाचो राष्ट्रीय प्राणी म्हळ्यार वाग. 1973 वर्सा वागाक राष्ट्रीय प्राणी म्हूण मान्यताय मेळ्ळी. हो प्राणी खूप शक्तीशाली. तशेंच भयानक स्वभावाचोय आसता. तो केन्ना कोणाचेर घुरी घालीत म्हूण नेम ना. ताचे दोळे सामकें तीक्ष्ण आसतात. धावपाक तो कोणाकुय फाटी उडयत. ताका पेंवपाकुय बेस बरे तरेन येता. वाग हो मांस खावपी प्राणी. देखून शिकार जर दिसली जाल्यार तो वेळ आनीक काडीना. ताचेर केन्नाचीच घुरी घालून ताणें ताका करकरावन खालेंच म्हूण समजुपाचें. दिसपाक माजरा सारको जरी आसलो पूण स्वभावान मात माजरा सारको नासता. ताचो राबीतो रानांत. जरी तो क्रूर प्राणी आसलो तरी तो आमच्या देशाची संपत जावन आसा. रानाक सोबा हाडपी असो हो प्राणी. आमच्या पर्यावरणाची सोबीतकाय वाडोवपी हो प्राणी.चडशीं जनावरा हाका थर्त भितात. मनशां तर वागाक पळोवनूच आंग काडतात. पूण ताच्या संरक्षणाची जापसालदारकी ही आमचीच आनी तितलीच ती म्हत्वाची.
राखतले तर वाचतले….
सैम जे सांबाळटले…
सोबीतकांय वाडटली ताची…
तरूच सुखान तुमी रावतले…
करु नाकात अपुरबाय
पूण राखात तरी मनीसपण
तांकांय भोगू दी जिणेचो..
सुखान दर कण
पर्यावरण राखणेचो घेवया आमी सोपूत..
आमी धुवो ह्या सैमाच्यो
आनी आमीच राखणे पूत
लडूंक लढे सल्ल्या फुडें
नव्यान सरता फुडें आमी
नव्या युगाचे आमी गडे
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
