आयज ताका, फाल्यां म्हाका

भांगरभूंय | प्रतिनिधी

फुडाराक अपघातांचें प्रमाण देंवपाचें ना, तर वाडपाचें आसा. कारण गाडयांचो आंकडो दिसानदीस वाडत आसा. पन्नाशी हुपिल्ल्या कोणेय ताच्या भुरगेपणांतले दीस …..

रस्तो अपघातांचो प्रस्न परतून एकदां धड्यार आयला. मात ‘एक घाव, दोन कुडके’ अशी जाप ताचेर मेळप सध्या तरी कुस्तार अशें दिसता. सरकारी यंत्रणां, बिगर सरकारी संस्था हाचेर फाटलीं कितलींशींच वर्सां यत्न करतात, मात तांकां अपघात आडावपाचेर रामबाण म्हणटात, तसो उपाय मेळूंक ना. पयर अपघातांत चवगांक मरण आयलें. ताचे पयलीं जखमी जाल्ल्या आनीक एकल्याक मरण आयलें. फाटल्या देड म्हयन्यांत 377 अपघात जाल्यात. हे पुलिशेंत नोंद जाल्ले. जावंक नाशिल्ले आनीक तिनशें तरी आसतले. देड म्हयन्यात 38 लोकांक मरण आयलां. कितलेशेच जखमी जाल्यात. ह्या सगल्यांचीं कुटुंबां मानसीक तणावांत आसात. हरवळ्यां जाल्ल्या अपघातांत एक वर्स पिरायेचो भुरगो वाटावलो, मात ताचे आवय- बापूय संवसाराक अंतरले. सगल्यांत दुखदिणी गजाल ही. कांय वर्सां पयलीं कदंब बशीन चोडणांच्या एका जोडप्याक अशेंच मारिल्लें. ती दुर्घटनाय भिरांकूळ आशिल्ली. गोंयांत सादारण वर्साक तिनेकशे लोक अपघातांत मरतात. तातूंतले चडशे तरणाटे आसतात. अशें कितलें युवा मनीसबळ आमी वगडायतले? राज्य आनी देशाचें हें लुकसाण! फुडाराक अपघातांचें प्रमाण देंवपाचें ना, तर वाडपाचें आसा. कारण गाडयांचो आंकडो दिसानदीस वाडत आसा. पन्नाशी हुपिल्ल्या कोणेय ताच्या भुरगेपणांतले दीस याद केल्यार हो फरक रोखडोच लक्षांत येतलो. गोंयांत गाडयांची संख्या लोकसंख्येक फाटीं उडोवन मुखार गेल्या. हाचे वयल्यान कल्पना करची!
अपघाता फाटलीं कारणां अनेक. दरेकलो नवें कारण सांगता. इबाडिल्ले रस्ते, तरणाट्यांक वेगाचें पिशें, सोरो- ड्रग्सांची नशा, वाटे वयलीं गोरवां, चलोवप्याची मनस्थिती, नादुरुस्त गाडी, येरादारीच्या नेमां कडेन आडनदर… अश्या जायत्या कारणांक लागून अपघात जातात. भौशीक बांदकाम आनी येरादारी खात्यान खरें म्हणल्यार राज्यांतलीं अपघात थळां सोदून थंय उपाय घेवपाक जाय. थोडे अपघात थारावीक जाग्यांचेर जातात, अशें दिसून आयलां. स्पीड ब्रेकरांक रंग मारिल्ले नात, रस्त्यार लायटी नात, फोंडकुलां आसात. वेगान वचपी स्कूटरकाराक तो रस्तो अनवळखी आसत जाल्यार मागीर अपघात हे जातातूच. दुसरें म्हणल्यार येरादारीची कोंयडी, सुशेगाद वचपी ट्रक, कंटेनर. रस्त्यार आडकल्ले गाडयेकार मागीर वेळ भरून काडपाक शक्य तितले वेगान वतात आनी अपघातांत सांपडटात. वराक 20 किलोमिटर वेगान वचपी ट्रक, ट्रेलर, रिक्षा, टेंपोय गाडयेकाराचें पासियेंश काबार करतात. मागीर तांकां ओव्हरटेक करपाच्या यत्नांत ते जीव वगडावन बसतात. पयर एक अपघात जालो तो असोच. ह्यो म्हाल व्हरपी गाडयो (खास करून व्हडले कंटेनर) खरें म्हणल्यार येरादारी कमी आसता त्या वेळार वा रातीं 8 ते सकाळीं 8 ह्या वेळांतूच चालू दवरपाक जाय. मात सकाळीं, सांजवेळार ह्यो गाडयो चालू आसतात आनी तांचे फाटल्यान हेर वाहनांच्यो रांको!! गोंय सरकारान हाचेर विचार करूंक फावो.
रस्त्या कडेन स्टाॅल, गाडे घालून खावपाचे जिनस विकपाची घातक परंपरा फाटल्या कांय वर्सां सावन चालू आसा. आतां तर कांय पंचायतींनी रस्त्या देगेक गाडे, दुकानां घालपाक, नुस्तें, फळां विकपाक परवानगी दिल्या. हांगां सामान घेवपाक लोक गाडी उबी करतात आनी मागीर येरादारीची कोंयडी, अपघातूय !! पंचायतींक शिटकावणी दिवन हें गाडे दुसरे कडेन व्हरपाचें धाडस पंचायत संचालनालयाक जातलें? कांय आडवाद सोडल्यार गोंयचे रस्ते अशीर. तातूंत थोडे रस्त्यार अर्दी गाडी उबी करून गजाली मारतात. बस स्टाॅपांचेर रावता, ती अर्दी रस्त्यार. येरादारी खात्याच्या लक्षांत हें घडये येवंक नासतलें. जंय शक्य आसा, थंय तरी रस्तो रुंद करून प्रवाशांक घेवपी बस आख्खी रस्त्या भायर उबी रावतली, हो यत्न येरादारी खातें, पुलिसांनी करचो. अपघात वाडल्यात ताका सरकारी यंत्रणेचीं घाळपणा जापसालदार आसातूच, पूण चड दोशी आसात ते गाडयेकारूच! रस्त्यार आशिल्लीं 10 टक्के पसून वाहनां नेम पाळिनासतना, जतनायेन चलयलीं नात, जाल्यार अपघात हे जातलेच. हाचो अर्थ अपघात उणे करप आमच्याच, म्हणल्यार समाजाच्याच हातांत आसा. दंड वाडला, पूण तो लागू करूंक ना. तो केल्यार अपघात खंयचे कडेन नाच जातले, अशें कांयजाणांक दिसता. दुसरे कडेन म्हयन्यांतल्यान 500 रुपया तालावांक फारीक करपीय आसतले.
गाडी घेवन घरा भायर सरिल्लो सुखरूप घरा येतलो हाची खात्री आयज कोणाकूच दिवंक जावचीना. अपघात वाडत आसात. आयज ताका, फाल्यां म्हाका, अशी धाकधूक दरेका गाडयेकाराक दिसता आसतली!!