आयज तयारे खातीर बसका
भांगरभूंय | प्रतिनिधी
- प्रधानमंत्र्यांचो सगळ्या मुख्यमंत्र्यां वांगडा संवाद
- आखाती देशांच्या झुजाचे फाटभुंयेर जातली चर्चा
- ‘भारतांतली परिस्थिती आनी उपाय’ म्हत्वाचो विशय
- नवी दिल्ली : आखाती देशांतल्या झुजाचे फाटभुंयेर भारतांत निर्माण जाल्ल्या संघर्शाच्या फाटभुंयेर राज्यांच्या तयारीचो नियाळ घेवपा खातीर प्रधानमंत्री नरेंद्र मोदी आयज शुक्रारा सगळ्या मुख्यमंत्र्यां वांगडा बसका घेतले. भारतांतली परिस्थिती आनी उपाय, राज्य पांवड्यार तयारी हो ह्या बसकेचो म्हत्वाचो विशय आसतलो म्हूण सुत्रां सांगता.
- इराणान होर्मुझांतल्या म्हत्वाच्या सामुद्रधुनीचेर आपली पकड कायम दवरिल्ल्यान संवसारीक उर्जा प्रवाहाचेर परिणाम जातलो अशें सुत्रांनी सांगलां. तेन्ना हे बसकेंत ‘टीम इंडिया’ ह्या भावनेन यत्नांचो समन्वय सादपाचेर भर दितले. ह्या झुजाचे परिणाम बरोच तेंप तिगून उरपाची शक्यताय आसा अशें प्रधानमंत्र्यान मंगळारा राज्यसभेंत सांगिल्लें. ह्या परिस्थितीक तोंड दिवपा खातीर सगल्यांनी एकठांय येवन काम करचें अशें आवाहनूय केल्लें.
- भारताची घटमूट उदरगतीचो मार्ग तिगोवन दवरपा खातीर राज्य सरकारांक प्रोत्साहन दितना प्रधानमंत्री मोदी हांणी कोवीड-19 म्हामारीच्या काळांत केंद्र आनी राज्यांनी चांचणी, लसीकरण आनी गरजेच्या वस्तूंची पुरवण करपा खातीर सहकार्य केल्ल्यान दाखयिल्ल्या ‘टीम इंडिया’ भावनेची याद करून दिल्ली. आतांय तीच भावना दाखोवपाची गरज आसा, ते खातीर तयारीचो नियाळ घेवन, फुडली तयारी करपा विशीं मार्गदर्शन करतलें.
- आयज सांजें 6.30 वरांचेर प्रधानमंत्री सगळ्या मुख्यमंत्र्यां कडेन संवाद सादतले.
- मजगतीं, भारतांत 60 दीस पावतलो इतलो इंधन सांठो आसा म्हूण केंद्र सरकारान स्पश्ट केलां. देशाची उर्जा पुरवण स्थीर आनी बरी आसा. सद्याची मागणी पुराय करपाक फावो तो सांठो आसा अशें सरकारान स्पश्ट केलां.
- पेट्रोलियम आनी सैमीक वायू मंत्रालयान फुडल्या दोन म्हयन्यां खातीर कच्च्या तेलाचे येरादारीची वेवस्था पयलींच केल्या.
- देशांतर्गत रिफायनरी पुराय क्षमते परस चड क्षमतेन कार्यरत आसात, जाका लागून देशभरांत इंधनाचो सातत्यान प्रवाह चालू दवरपाक मजत जाल्या, अशें सरकारी अधिकाऱ्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
