भांगरभूंय | प्रतिनिधी
पणजी: शिरगांवां लयराई जात्रे वेळार जाल्ले खेटाखेटी विशीं स्थापन केल्ले समितीचो अहवाल आयज (बिरेस्तारा) सरकाराक मेळटलो. उपरांत हो अहवाल भौशीक करतले अशें मुख्यमंत्री डॉ. प्रमोद सावंत हांणी सांगलें.
राज्य मंत्रीमंडळाचे बसके उपरांत ते पत्रकारां कडेन उलयताले. गोंयांतली सगल्यांत मोटी जात्रा म्हूण वळख आशिल्ले शिरगांवचे लयराई जात्रे वेळार कांय दिसां पयलीं खेटाखेटीची दुर्दैवी घडणूक घडली. हे घडणुकेंत स भाविकांक मरण आयलें. जाल्यार 74 परस चड जखमी जाले. जखमी म्हापशेंच्या आझिलाते, दिवचले आनी बांबोळे गोमॅकाँत उपचार घेतात. गोमॅकाँत चार जाणांची भलायकी गंभीर आसा. हे घडणुकेक लागून गोंयभर खवदळ पडिल्लो.
मजगतीं, हे घडणुकेचो तपास करपा खातीर मुख्यमंत्री डॉ. प्रमोद सावंत हांणी त्याच वेळार महसूल सचीव संदीप जॅकीस हांचे अध्यक्षताये खाला समिती स्थापन केली. हे समितींत पुलीस उपम्हानिरिक्षक वर्षा शर्मा, येरादारी संचालक परिमल अभिषेक आनी दक्षीण गोंय पुलीस अधिक्षक टिकम सिंग वर्मा हांचो आस्पाव आसा.
हे समितीन फाटल्या कांय दिसांनी प्रत्यक्ष घडणूक थळार वचून दुर्घटणेच्या कारणांचो सोद घेतलो आनी प्रत्यक्षदर्शी तशेंच देवस्थान समितीच्या पदाधिकाऱ्यां कडेन चर्चा केली. ही समिती बिरेस्तारा आपलो अहवाल सरकाराक सादर करतली. उपरांत तो अहवाल भौशीक करतले अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
