आयज, खंय, कितें?

भांगरभूंय | प्रतिनिधी

० वागाळी, कामुर्लेच्या श्री प्रभु पंचायत देवस्थानांत 24 तारखेक ‘श्रावणी बिरेस्तार’ मनयतले. सकाळीं धर्मीक विधी आनी सांजवेळार सात वरांचेर वागाळेंतल्या सरस्वती महिला भजनी मंडळाचें भजन जातलें. तुकाराम शेट्ये आनी सुभाष नायक हे पुजेचे येजमान आसात.

० दिवचल इनर व्हील क्लबा वतीन 1 आनी 2 सप्टेंबराक गणेश चतुर्थी बाजार आयोजीत केला. हांतूत सजावटीच्यो वस्तू, कपडे, फराळ आनी हेर वस्तूंचे स्टॉल लावपाक एक हजार रुपया नोंदणी शुल्क घेतले. चड म्हायती खातीर मिलिंदा कामत 9822123530, लिंडा तेली 9823165054 हांचे कडेन संपर्क करचो, अशें कळीत केलां.

० चित्रकार आनी हौशी गायक संजय हरमलकार हे इन्स्टिट्यूट मिनेझिस ब्रागांझाच्या पालवान 26 ऑगस्टाक सांजवेळा 5 वरांचेर आयएमबींत ‘मुकेशजी की यादें’ कार्यावळ सादर करतले. तातूंत तांचे वांगडा तरणाटी गायिका विभा अलगुंडगी आनी हौशी गायिका प्रतिभा बोरकार गायतलीं. सिद्धी उपाध्ये निवेदन करतलें.

० होंडा आजोबाच्या देवळांत 23 ऑगस्टाक पयल्या श्रावणी बुधवारा सांजवेळा 7 वरांचेर कीर्तनाची कार्यावळ आयोजीत केल्या. सुहास बुवा वझे हांची शिश्य शिवानी सुहास वझे, बोरी फोंडें आनी बालकीर्तनकार सर्वेश शिवानंद साळगांवकार, कामुर्ली आनी वांगड्यांचें कीर्तन जातलें.

० शिवोले भौशीक गणेश उत्सव विश्वस्त मंडळा वतीन 22 वेर श्रावणी मंगळार. दिसभर धर्मीक विधी, सांजचें साडेसंक सोहम संगीत कला संस्थे वतीन भजन.

० श्रीस्थळ – काणकोणच्या श्री मल्लिकार्जुन देवळांत श्रावणा निमतान सांस्कृतीक कार्यावळी जातल्यो. देवळांत महारुद्र सुरू जाला. सेगीत सात दीस तो चलतलो. बुधवार 23 वेर समाप्ती जातली. दरेका श्रावण सोमारा सकाळीं 8 वरां सावन अभिशेक करपाक मेळटलो. पयसुल्ल्यान येवपी भाविकां खातीर महाप्रसादाची वेवस्था करतले. दनपरां 1 वरांचेर महाअभिशेक तर सांजे 6.30 वरांचेर भजन/ किर्तन आनी रातच्या 9.30 वरांचेर पालखी जातली.

० मुरगांवचे गोमंतक भंडारी समाज युवा समितीन 23 ऑगस्टाक अखील गोंय गवळण गायन सर्त आयोजीत केल्या. ती वास्कोच्या श्री साईबाबा मंदीर, टॅक्सी स्टॅण्ड लागसारचे माचयेर सांजेवेळार 5 वरांचेर सुरू जातली. वांटो घेवपाक 9823912011 चेर संपर्क सादचो.