आयज, खंय, कितें??

भांगरभूंय | प्रतिनिधी

0 गोंयच्या समाजीक- सांस्कृतीक चळवळींत योगदान दिल्ल्या साळगांवच्या प्रदीप पाडगांवकार हांणी बरयल्ल्या ‘संपूर्ण रामायण’ ह्या महानाटकाचें प्रकाशन शेनवार 19 ऑगस्टाक जातलें. ही कार्यावळ साळगांवच्या ग्रामपंचायत सभाघरांत सांजेवेळार 5 वरांचेर जातली.

0 दिवचलच्या नारायण झांटये म्हाविद्यालयाच्या पालक शिक्षक संघटणेची बसका शेनवार 19 ऑगस्टाक आयोजीत केल्या. ती म्हाविद्यालयाच्या सेमिनार हॉलांत दनपरां 3 वरांचेर सुरू जातली. तातूंत 2023 ते 2025 वर्सा खातीर नवे समितीची नेमणूक करतले. तशेंच पालक शिक्षक संघटणे वतीन नव्या वर्सा खातीर कार्यावळींची वळेरी तयार करतले.

0 खांडोळच्या श्री शांतादुर्गा (सांतेरी) देवळांत थळाव्यां वतीन श्रावण महिन्यांतली देवीची पुजा आयतार 20 ऑगस्टाक जातली. सकाळीं 10 वरांचेर कुंकूमार्जन जातलें. सांजे 7 वरांचेर श्री पांडुरंग ब्रह्मेश्वर मंडळाची भजन आनी रातच्या 8.30 वरांचेर आरती जातली.

0 केरी – फोंडेंच्या भौशीक गणेश उत्सव मंडळाची वर्सुकी बसका आयतार 20 ऑगस्टाक सकाळीं 10 वरांचेर केरीच्या गणेश उत्सव मंडळाच्या सभाघरांत जातली. ह्या वेळार नवीन कार्यकारी समितीची निवड जातली, अशें सचीव उल्हास च्यारी हांणी कळीत केलां.

0 सांतेरीभाट- वळवयच्या श्री शांतादुर्गा देवस्थानांत श्रावणी सोमार मनयतले. पयलो सोमार 21 ऑगस्टाक. ह्या निमतान विवीध कार्यावळींचें आयोजन केलां.

0 पैरा, मयेंच्या श्री कलंबादेवी सत्पुरुष देवळांत पयलो श्रावणी सोमार 21 ऑगस्टाक भोसले महाजनां वतीन मनयतले. सकाळीं 6.30 वरांचेर अभिशेक, लघुरुद्र, गंधपुजा, उपरांत दनपरां 12.30 वरांचेर आरती जातली. सांजवेळार 6.30 वरांचेर आखाडकार महाजनां वतीन भजन जातलें.

0 श्रीस्थळ – काणकोणच्या श्री मल्लिकार्जुन देवळांत श्रावणा निमतान सांस्कृतीक कार्यावळी जातल्यो. श्रावण सुरू जाल्ल्यान देवळांत महारुद्र सुरू जाला. सेगीत सात दीस तो चलतलो. बुधवार 23 वेर समाप्ती जातली. दरेका श्रावण सोमारा सकाळीं 8 वरां सावन अभिशेक करपाक मेळटलो. पयसुल्ल्यान येवपी भाविकां खातीर महाप्रसादाची वेवस्था करतले. दनपरां 1 वरांचेर महाअभिशेक तर सांजे 6.30 वरांचेर भजन/ किर्तन आनी रातच्या 9.30 वरांचेर पालखी जातली.