भांगरभूंय | प्रतिनिधी
फातोड्ड्यां येरादारींत व्हड बदल
पणजीः दक्षीण गोंय जिल्लो प्रशासन आनी पुलीस खात्यान आज 22 ऑक्टोबराक फातोड्डेंच्या पंडित जवाहरलाल नेहरू स्टेडियमाचेर जावपी एफसी गोवा आनी अल-नासर हांचे मदीं जावपी एएफसी चॅम्पियन्स लीग फुटबॉल मॅची खातीर खर सुरक्षा वेवस्था आनी येरादारींत व्हड बदल जाहीर केल्यात.
आयज हजारांनी फुटबॉल मोगी ह्या मॅचीक हाजीर रावपाची अपेक्षा आसा. गोंयांतल्या ह्या व्हड स्टेडियमा लागसार नागरिकांक सुरक्षीत आनी त्रासमुक्त अणभव मेळचे खातीर येरादारी नेम, रस्ते बंद करप आनी सुरक्षा वेवस्था हांचे व्हड प्रमाणांत नियोजन केलां. दक्षीण गोंय जिल्लोधिकारी एग्ना क्लिटस (आयएएस) हांणी जारी केल्ल्या अधिकृत आदेशा प्रमाण फातोड्डेंचे खुबशे रस्ते सामान्य येरादारी खातीर बंद आसतले.
बंद आशिल्ले रस्ते
1) पाद्री पेद्रो फेरांओ रस्तो: अंबाजी जंक्शन ते फातोड्ड्यां जंक्शना मेरेनचो हो रस्तो येरादारी खातीर बंद आसतलो. ह्या रस्त्यार फकत व्हीव्हीआयपी/व्हीआयपी पास आशिल्ले वा थळाव्यांकूच प्रवेश दितले.
2) फातोड्ड्यां फोर रोड जंक्शन आनी केटीसी-फातोड्डेंचो रस्तो: हे दोनूय रस्ते नेमान चलपी वाहनां खातीर बंद आसतले आनी फकत व्हीआयपी ताफ्यांक हांगा प्रवेश दितले.
रस्त्यार गर्दी टाळपा खातीर आनी आपत्कालीन वाहनां सुरळीत वचपा खातीर स्टेडियमांत वचपी सगल्या मुखेल रस्त्यांचेर पार्किंगाचेर खर बंदी आसतली.
पुलीस दळाची केल्ली वेवस्था
1) पुलीस वेवस्था: वट्ट 650 पुलीस कर्मचारी तैनात केल्यात. हातूंत आतंकवाद विरोधी पंगड, पीसीआर व्हॅन आनी आयआरबीपी प्लॅटून हांचो आसपाव आसा.
2) प्रवेश आनी सुरक्षा : स्टेडियमचीं दारां दनपरां ३:१५ वरांचेर उगडटलीं. तकेट तपासणेची जापसालदारकी वेवस्थापनाची आशिल्ल्यान, हे विशीं कसलीच गडबड जावची न्हय म्हणून खर सुरक्षा वेवस्था केल्या.
आयोजकांक येरादारी मार्शल्स, दिका दाखोवपी तखटे, बॅरिकेड्स आनी पार्किंगांत जाय तितली उजवाडाची वेवस्था दवरपाचे निर्देश दिल्यात. जिल्लो प्रशासनान गोंयच्या फुटबॉल मोगींक सहकार्य करपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
