भांगरभूंय | प्रतिनिधी
सभापतींनी याचिका भायरायिल्ल्यान खंडपिठांत दिल्लें आव्हान
काँग्रेस फुटीर आमदार प्रकरण
पणजी: काँग्रेसीच्या आठ फुटीर आमदारां आड दाखल केल्ले अपात्रताय याचिकेचेर सभापती रमेश तवडकार हांणी दिल्ल्या आदेशाक मुंबय उच्च न्यायालयाच्या गोंय खंडपिठांत आव्हान दिलां. हे विशींचो निवाडो दिवपाची मागणी गिरीश चोडणकार हांचे वकील अभिजीत गोसावी हांणी केली. मजगतीं, अशेच पद्दतीची डॉम्नीक नोरोन्हा हांची याचिका आशिल्ल्यान दोनूय याचिकेचेर आयज (बिरेस्तारा) सुनावणी जातली.
गोंयांत फेब्रुवारी 2022 वर्सा विधानसभेच्या वेंचणूक निकाला उपरांत भाजपाचें संख्याबळ चड आशिल्ल्यान राज्यपालांनी तांकां सत्ता स्थापन करपाक सांगलें. डॉ. प्रमोद सावंत हांणी मगो आनी अपक्ष आमदारांचो तेंको घेवन सरकार स्थापन केलें.
उपरांत 14 सप्टेंबर 2022 दिसा दिगंबर कामत, आलेक्स सिक्वेरा, संकल्प आमोणकार, रुडॉल्फ फर्नांडीस, मायकल लोबो, डिलायला लोबो, केदार नायक, राजेश फळदेसाय ह्या काँग्रेसीच्या आठ आमदारांनी वेगळो गट स्थापन करून भाजपांत प्रवेश केल्लो.
त्या वेळार तांणी दोन तृतियांश विधीमंडळ गट भाजपांत विलीन केल्ल्याचो दावो केल्लो. ह्या प्रकरणांत गिरीश चोडणकार हांणी वयल्या आठ आमदारांक अपात्र करचे अशी याचिका 11 नोव्हेंबर 2022 दिसा सभापतीं कडेन दाखल केल्ली. ही याचिका सभापती रमेश तवडकार हांणी भायरायिल्ली.
उपरांत चोडणकार हांणी सभापतींच्या निवाड्याक नोव्हेंबर 2024 वर्सा थेट सर्वोच्च न्यायालयांत आव्हान दिवन याचिका दाखल केल्ली. त्या वेळार चोडणकार हांणी घटनेच्या कलम 136 खाला याचिका दाखल केल्ली. ह्या प्रकरणांत सर्वोच्च न्यायालयांत सुनावणी जाली तेन्ना, घटनेच्या कलम 136 प्रमाण सुनावणी करूंक शकनाशिल्ल्याचें सांगून याचिका निकालांत काडली. तशेंच हे विशीं उच्च न्यायालयांत आव्हान दिवपाक मेकळीक दिली.
ते प्रमाण गिरीश चोडणकार हांणी मुंबय उच्च न्यायालयाच्या गोंय खंडपिठांत याचिका दाखल केली. ह्या प्रकरणांत बुधवारा सुनवणी जाली तेन्ना, काँग्रेस पक्षांतल्यान आठ आमदार फुटिल्ले. ताचे आड चोडणकार हांणी उच्च न्यायालयांत याचिका दाखल केल्ली. ती न्यायालयान भायरायले उपरांत ताका सर्वोच्च न्यायालयांत आव्हान दिलां अशी म्हायती चोडणकार हांचे वतीन अॅड. अभिजीत गोसावी हांणी वयली अपात्र याचिका समान आशिल्ल्यान निकाल दिवपाची मागणी केली.
मजगतीं, न्यायालयांत डॉम्नीक नोरोन्हा हांणी वयल्या मुद्यांचेर याचिका दाखल केल्ल्याची म्हायती अॅडव्होकेट जनरल देविदास पांगम हांणी दिली. हाची दखल घेवन न्यायालयान वयल्या दोनूय याचिकेची सुनावणी 16 वेर दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
