भांगरभूंय | प्रतिनिधी
मळकर्णें जाली कुशळटाय उदरगत कार्यावळ
केपें: आयच्या वेवसायीक संवसारांत कुशळटाय मेळोवप चड म्हत्वाचें. ताका लागून मेळपी दरेके संदीचो लाव घेवन आपली उदरगत करची अशें राष्टीय पुरस्कार मानेली तशेंच मुख्यध्यापिका सिंधू प्रभूदेसाय नायक हांणी सांगलें. ती समाज सेवा संघटणेच्या आराधना ग्रामीण वाचनालय मळकर्णें आनी कला संस्कृती संचालनालय गोंय हांच्या जोड पालवान कुशळटाय संवर्धन उपक्रमा खाला समूहगीत गायनांतल्या कुशळटाय उदरगत ह्या सत्रांत एक मार्गदर्शक ह्या नात्याने उलयताली.
मळकर्णें हांगच्या शासकीय विद्यालयाच्या सभाघरांत जाल्ले हे कार्यावळीक एकनाथ गांवकार, अरूण पाटील, रुषिकेश देसाय, धंनजय सांवत आनी हेर हाजीर आशिल्ले.
हालीं शिक्षणीक मळार मोलादीक बदल जाला. कुशळटाय मेळोवपाची संद आसा. फकत जाय ती इत्साशक्त, कश्ट, तयारी आनी सतत साधना, शिक्षण, पालक आनी समाजाच्या मार्गदर्शनाची गरज आसा. तशेंच फाटबळूय तितलेंच गरजेचें, अशें सिंधू हांणी फुडें सांगलें.
अरूण पाटील हांणी गायन कलेंतल्या कांय म्हत्वाच्या गजालींचेर मार्गदर्शन केलें. एकनाथ गांवकार हांणी संचालनालया वतीन संगीत आनी कला मळार चलयल्ल्या उपक्रमांचेर उजेड घातलो.
ह्या वेळार हेरांचींय मार्गदर्शन सत्रां जालीं. कृती सत्रांत विवीध आमंत्रीत पंगडांनी गीतां सादर केलीं. हातूंत होली क्रास हायस्कूल, केपें, शासकीय विद्यालय कोंळबा, श्रीमती चद्रभागा हायस्कूल, उत्कर्ष हायस्कूल, रिवणा, सर्वोदया हायस्कूल कुडचडें हांचो आसपाव आशिल्लो. ह्या सगळ्या विद्यालयांक आनी हेर संस्थांक यादस्तीक आनी प्रमाणपत्रां भेटयलीं.
सुरवातेक दिवली पेटोवन कार्यावळ सुरू जाली. श्नीपाद सामंत हांणी प्रास्तावीक केलें. भक्ती दाभोळकार हांणी सुत्रसंचालन केलें आनी किरण गांवकर हांणी उपकार मानले.
आयोजकांचे वतीन विठ्ठल आवदियेंकार, प्रियंका गांवकार, मृदुला पाटकार, सायली नायक हांणी विशेश मेहनत घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
