भांगरभूंय | प्रतिनिधी
500 हॅक्टर शेतीचें लुकसाण जाल्ल्याचो मुळावो अदमास
भांगरभूंय । प्रतिनिधी
पणजी : उटंगाराचो पावस आनी वादळाक लागून गोंयांतल्या 500 हॅक्टर शेतीचें लुकसाण जाल्ल्याचो मुळावो अदमास आसा. पावसाचो नेट उणो जाल्ल्यान लुकसाणीची मोलावणी करप आतां शक्य जातलें. विभागी शेती अधिकारी 29 जुलयच्यान लुकसाणीची मोलावणी करतले, अशी म्हायती शेतकी खात्याचे संचालक संदीप फळदेसाय हांणी दिली.
जूना पुराय जुलयांत पावसान धुमशेण कांडलें. विसव घेनासतना पावस पडत राविल्ल्यान सखल वाठारांतलीं शेतां उदका पोंदा गेलीं. शेतांत 4 दीस उदक भरून उरल्यार रोपांचीं मुळां कुसून लुकसाण जाता, अशी म्हायती फळदेसाय हांणी दिली.
सेगीत पडपी पावसाक लागून जाल्ले लुकसाणीचेर सभाघरांत लेगीत चर्चा जाली. शेतीचें व्हड प्रमाणांत लुकसाण जाल्ल्यान बेगिनात बेगीन लुकसाण भरपाय दिवपाची मागणी आमदारांनी केली. हे मागणेचो विचार करून बेगिनात बेगीन लुकसाण भरपाय दिवपाचें आस्वासन मुख्यमंत्री डॉ. प्रमोद सावंत हांणी दिलें.
लुकसाणीची मोलावणी करपाचे आदेश मुख्यमंत्र्यांनी शेती खात्याक दिले. हाचे उपरांत विभागी शेती अधिकाऱ्यांनी मोलावणीची प्रक्रिया सुरू केली. पावसाक लागून उदक भरिल्ल्यान मोलावणी करप शक्य जालें ना. फाटल्या चार दिसांत शेतकी खात्याच्या संचालकांनी विभागी शेती अधिकाऱ्यां सयत गोंयभरांतल्या शेतीची पळोवणी केली. पावसाक लागून 500 हॅक्टर शेतीचें लुकसाण जाल्याचो अदमास आसा. हें प्रमाण वाडपाची शक्यताय फळदेसाय हांणी उक्तायली.
फोंडें म्हालांत सगळ्यांत चड म्हणल्यार 150 हॅक्टर शेतीचें लुकसाण जालां. फोंडें उपरांत साश्ट आनी तिसवाडी म्हालाचो नंबर लागतलो. सेगीत पडपी पावसाक लागून शेतां तशेंच कुशीच्या वाठारांत उदक भरिल्ले. हाका लागून मोलावणी करप शक्य नाशिल्लें. पावसाचो नेट उणो जाल्ल्यान आतां उदक व हांवून गेलां. आतां मोलावणेक सुरवात जातली. जांचें लुकसाण जालां, त्या शेतकारांनी विभागी कार्यालया कडेन अर्ज हाडून दिवचे, अशें शेतकी संचालकांनी कळयलां.
फोंडें, सत्तरींत बागायतींचें चड लुकसाण
वादळाक लागून बागायतींचें लुकसाण जालां. फोंडें आनी सत्तरी म्हालांत बागायतींचें चड लुकसाण जालां. हें प्रमाण 30 हॅक्टरे वयर आसचें ना, अशें शेतकी खात्याचे संचालक संदीप फळदेसाय हांणी सांगलें. सरत्या सप्तकांत वारो चड आशिल्लो. हाका लागून माडयो, केळमे हुमटून पडले. सरकारी दरा प्रमाण सोपस्कार पुराय करून शेतकारांक लुकसाण भरपाय मेळटली, अशेंय फळदेसाय हांणी सांगलें. उदक भरिल्ल्यान लायल्ले रोप कुसून गेल्यात. पयलीच्या वर्सां परस अंदूं चड लुकसाण जाल्ल्याची म्हायती शेतकारांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
