भांगरभूंय | प्रतिनिधी
3.50 टक्के दरवाडीक मंजुरी; गिरायकांक लागतलो शॉक
भांगरभूंय । प्रतिनिधी
पणजीः आदींच म्हारगायेन पिडिल्ल्या लोकांक आतां वीज दरवाडीचो धपको बसतलो. वीज खात्यान अर्थीक वर्स 2024- 25 खातीर 3.48 टक्क्यांनी वाड करपाचो प्रस्ताव दिल्लो. संयुक्त वीज नियामक आयोगान 3.50 टक्क्यांची दरवाड मंजूर केल्या. नवे दर 16 जूनाच्यान लागू जातले. ते प्रमाण उच्च आनी उण्या दाबाचे घरगुती, वेवसायीक, हॉटेल्स, उद्देगीक, कृशी, भौशीक अश्या सगळ्या मळा वयल्या गिरायकांक वीज दरवाडीचो शॉक लागतलो.
हे आदीं उणो दाब आशिल्या घरगुती गिरायकांक 0 ते 100 युनिटा मेरेन दर युनिटाक 1.75 रुपया दिवचे पडटाले. आतां तातूंत वाड जावन 1.90 रुपया दिवचे पडटले. 101 ते 200 युनिटा खातीर दर युनीट 2.60 रुपयां वयल्यान 2.80 रुपया, 201 ते 300 युनिटा खातीर दर युनीक 3.30 रुपया वयल्यान 3.70 रुपया, 301 ते 400 युनिटाच्या वयलो दर 5.10 रुपया वयल्यान 5.80 रुपया दर युनीट वाडयला. जाल्यार उच्च दाब आशिल्ल्या घरगुती गिरायकांक दर युनिटाक 4.80 रुपया नवे दर दिवचे पडटले.
उणो दाब आशिल्ल्या वेवसायीक गिरयकां खातीर 0 ते 100 युनिटा मेरेन एका युनिटा खातीर 3.60 रुपया दिवचे पडटाले. आतां तातूंत वाड जावन 3.75 रुपया दिवचे पडटले. 101 ते 200 युनिटा मेरेनचो दर युनीट 5 रुपया वयल्या 5.30 रुपया, जाल्यार 400 युनिट वयर 5.30 रुपया वयल्यान 5.75 रुपया दर युनीट वाडयला. जाल्यार उच्च दाब आशिल्ल्या वेवसायीक गिरायकांक दर युनीट 5.25 रुपया बदला 5.30 रुपया अशे नवे दर दिवचे पडटले.
उणो दाब आशिल्ल्या उद्देगीक गिरायकां खातीर 0 ते 500 युनिटा मेरेन दर युनिटाक 3.60 रुपया दिवचे पडटाले. आतां तातूंत वाड जावन दर युनीट 4 रुपया दिवचे पडटले. जाल्यार 500 युनिटा परस चड वीज वापरपी गिरायकांक एका युनिटा खातीर 4.25 रुपया बदला 4.65 रुपया भरचे पडटले. उण्या दाबाच्या हॉटेल गिरायकांक दरेक युनिटाक 5.60 रुपया बदला 6 रुपया भरचे पडटले. उच्च दाबाच्या उद्देगीक गिरायकांक दरेक युनीट 4.95 वयल्यान 5.10 रुपया मेरेन फारीक करचे पडटले. उणो दाब आशिल्ल्या कृशी गिरायकांक 25 हॉर्स पॉवर दर म्हयन्याक वापर करता जाल्यार दरेक युनीट 1.50 रुपया बदला 1.55 रुपया दिवचे पडटले. उच्च दाबाच्या 70 किलो वॉट मेरेन दर म्हयन्याक वीज वापरप्यांक 1.95 बदला 2 रुपया दिवचे पडटले.
खर्च भरून काडपाक मागिल्ली दरवाड
वीज खात्यान 2023- 24 ह्या अर्थीक वर्सा खातीर 6 टक्के दरवाड करपाची मागणी आयोगा कडेन केल्ली. त्या वेळार आयोगान 5.19 टक्के दरवाड करपाचो आदेश दिल्लो. हे आदीं जानेवारींत दरवाडी विशीं दोनूय जिव्ह्यांत जनसुनावणी जाल्ली. त्या वेळार गिरायकांनी दरवाडीक विरोध केल्लो. मात वीज खात्यान गिरायकांक वीज पुरवण करचे खातीर दर युनीट चड खर्च जाता, अशें सांगिल्लें. हो खर्च भरून काडचे खातीर दरवाड गरजेची आशिल्ल्याचें खात्यान आयोगाक सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
