भांगरभूंय | प्रतिनिधी
भांगरभूंय । खबरां मेज
पणजीः देश- विदेशांतल्या सर्कस कलाकारांचो आसपाव आशिल्ली नामनेची रेम्बो सर्कस मडगांवा आयल्या. आयच्यान (शेनवार) 28 एपील तें 7 मे मेरेन मडगांवच्या रवींद्र भवनाच्या वातानूकुलीत सभाघरांत तिच्या प्रयोग जातले. एप्रिलाच्या तिसऱ्या शेनवारा संवसारीक सर्कस दीस मनयतात.
फेडरेशन मोंडियल डु सिर्क हांणी 2009 सावन व्हो दीस मनोवपाक सुरवात केल्ली. रेम्बो सर्कशीक सुरवात जाल्या सावन व्हो दीस मनयतात. गोंयकारांक ह्या दिसाचें विशेश खेळ पळोवपाची संद पयलेच खेप मेळटली. कोविडाक लागून दोन वर्सा रेम्बो सर्कस गोंयांत येवपाक शकली ना. सोशल मीडियांतल्यान लोकांक सर्कस पळोवपाक मेळटाली मात 28 एप्रिलाच्यान ती लोकांक चड करून विद्यार्थ्यांक प्रत्यक्ष पळोवपाक मेळटली.
रेम्बो सर्कशीन हे फावट एरियल रिंग, हँड टू हँड, स्लिंकी, बबल एक्ट, बाउंसिंग बॉल, लेजर, रोला बोला, हुला हूप आनी एरियल रस्सी ह्या नव्या खेळांचो आसपाव केला अशी म्हायती सुजीत दिलीप हांणे दिली. शेनवार आनी आयतारा सकाळीं 11, दनपारां 1.30, सांजे 4.30 आनी 7.30 अशे चार शो आसतले. सोमार तें शुक्राराक दनपारां 1.30, सांजे 4.30 आनी 7.30 अशे तीन शो आसतले. हे शो पळोवपाक येवंन सर्कस कलेक उर्बां दिवपाचें आवाहन सुजीत दिलीप हाणे गोंयकारांक केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
