भांगरभूंय | प्रतिनिधी
बांगलादेशा आडची टॅस्ट माळ 2-0 फरकान जिखल्या उपरांत भारताची नदर न्युझिलॅण्डा आडचे टॅस्ट माळेचेर आसा. माळेंतली पयली टॅस्ट आयच्यान हांगाच्या एम चिन्नास्वामी स्टेडीयमाचेर सुरू जातली.
वर्ल्ड टॅस्ट चॅम्पियशिपीचे (डब्ल्यूटीसी) दिश्टीन भारता खातीर ही माळ सामकी म्हत्वाची आसा. जर भारत ही माळ 3-0 फरकान जिखता तर ताका डब्ल्यूटीसीचे फायनलींत सुवात मेळोवपाक सोंपें जातलें.
दुसरे वटेन न्युझिलॅण्डा खातीर आशियायी भोंवडी अजून मेरेन बरी वचूंक ना. श्रीलंके आडची माळ ताका 0-2 अशा फरकान व्हगडावची पडल्या. पूण, फाटली हार विसरून नव्यान सुरवात करपाचो ताचो यत्न आसतलो.
मॅचींत पावसाची आडखळ येवपाची शक्यताय आसा. पावसाक लागून काल भारताक सराव लेगीत करपाक मेळ्ळो ना. फाटल्या कांय दिसां सावन खेळपट्टी धांपून दवरल्या. हवामान अशें उरलें आनी कुंपा दाटून उरलीं जाल्यार स्पिनरांक म्हणपा सारकी मजत मेळची ना. अशा वातावरणांत फास्ट बॉलर आपलो शेक दवरपाक शकतात. भारताची नदर बॉर्डर-गावस्कर ट्रॉफीचेर आसा, ताका लागून ऑस्ट्रेलियेचे भोंवेडर वचचे पयलीं आपल्या फास्ट बॉलरांक तपासून पळोवपाचो ताचो यत्न आसतलो.
विराट कोहलीचो फॉर्म कसो आसा हे विशीं समजून घेवप मात्शें कठीण आसा. हालीं साराक भारतान चड टॅस्टी खेळूंक नात. पूण, कोहलीन फाटल्या आठ टॅस्ट डावांनी दोन शेंकडे मारल्यात. ताचे पयलीं तो फॉर्मा खातीर झुजतालो.
टिम सावथी फाटल्या दोन सप्तकां पयलीं न्युझिलॅण्डाचो मुखेली आशिल्लो. पूण, श्रीलंकेतली माळ व्हगडायल्या उपरांत ताणें मुखेलपद सोडलें. टॅस्ट क्रिकेटींत 400चो आंकडो हुपपाक ताका फकत 18 विकेटींची गरज आसा. सावथी न्युझिलॅण्डाच्या बॉलींग विभागाचो म्हत्वाचो वांगडी आसा. भारतीय खेळपट्टीचेर खेळपाचो ताका बरो अणभव आसा. आपल्या अणभवाचो फायदो घेत तो आपल्या पंगडाक मजत करपाक शकता.
शुभमन गिलाची मान कणल्या. घडये ताका आयची मॅच चुकपाक शकता. अशे फाटभुंयेर ताचे सुवातेर सरफराज खानाक संद मेळुये आनी तिसरे सुवातेर लोकेश राहुलाक खेळोवपाक शकता.
एक अतिरिक्त स्पिनर खेळोवचो काय तीन फास्ट बॉलर खेळोवचे हो व्हड प्रस्न भारताच्या पंगड वेवस्थापना मुखार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
