आयच्यान फुटबॉल कार्नावाल

भांगरभूंय | प्रतिनिधी

येजमान कतर आनी इक्वाडोर ह्या पंगडां मदीं जावपी मॅची वरवीं संवसारीक फुटबॉल सर्तीक सुरवात जातली. तेन्ना मानवाधीकार, स्थलांतरीत कामगार, एलजीबीटीक्यू समुदाय आनी बियर ह्या सारक्या प्रस्नांचेर हांगाच्या राजेशाहीचे वृत्तीचेर टिका जावप फाटीं पडटली अशी आस्त आसा.

शुक्रारा स्टेडियमांतल्या प्रेक्षकांक बीयर विकपाक बंदी घालून पयलींच साबार गलाजींक लागून टिका सोंसपी कतरान टिकारांक टिका करपाची आनीक संद दिली.

कतर खातीर संवसारीक सर्तीची येजमानकी ही संवसारीक पांवड्याचेर आपली वळख वाडोवपा खातीर आनी अाधुनिकीकरणा कडेन वाटचाल करपाच्या यत्नांत उखल्लें एक पावल आसा. हो कतरा खातीर राष्ट्रीय अभिमानाचो खीण आसा. पूण, हे सर्तींत वांटेकार जावपी कतार पंगडाक ताचें सगल्यांत मोठें आव्हाना तडीक लावचें पडटलें.

कतराक अ गटांत सुवात दिल्या. ह्या गटांत इक्वाडोरा खेरीत सेनेगल आनी नॅदरलॅण्ड ह्या पंगडांचो आस्पाव आसा. संवसारीक फुटबॉल सर्तीच्या इतिहासाचेर नदर मारली जाल्यार 2010तलो अपवाद सोडलो जाल्यार दरेक सर्तींत येजमान पंगडान दुसरे फेरयें सुवात मेळयल्या. 2010त येजमान दक्षीण आफ्रिकेक मुळावी फेरी हुपपाक अपेस आयिल्लें. कतरा मुखार अशा अपेसा पासून स्वताक सांबाळचो पडटलो.

सेनेगल आनी नॅदरलॅण्ड हे पंगड चड बरे आसात. ताका लागून आयज जावपी मॅचींत इक्वाडोराक हारोवपाची भांगराळी संद कतरा कडेन आसा. फिफा रॅंकिंगेंत कतार 50वे सुवातेर आसा, जाल्यार इक्वाडोर 44वे सुवातेर आसा. हे सर्ती खातीर कतर फाटल्या कांय वर्सां सावन तयारी करीत आसा. सर्तीची तयारी करपाक लागून कतारान 2019तले कोपा अमेरिका आनी 2021तले कॉनकाकॅफ गोल्ड करंड सर्तींत वांटो घेतिल्लो. मजगतीं, ताणें 2019तली आशिया करंड सर्त जिखल्या.

मॅच फिक्सिंगेचें सांवट?

येजमान कतराचेर मॅच फिक्सींगेचो आरोप जाला. मॅच हारपाक कतरान इक्वाडोराक लांच दिवपाचो प्रस्ताव दिल्ला. ब्रिटीश मिडल ईस्ट सेंटर फॉर स्टडीज अॅण्ड रिसर्चाचे क्षेत्रीय संचालक अमजद ताहा प्रमाण कतरान प्रतिस्पर्धी पंगडाच्या खेळगड्याक लांच दिल्या.

भारताच्या वेळा प्रमाण कतर आनी इक्वाडोर मदली मॅच रातच्या 9.30 वरांचेर सुरू जातली.

मजगतीं, सर्तींत फिक्सींग सारक्यो घडणुको आडावपाक फिफान एफबीआयची मजत घेतल्या. स्पोर्ट रडारा प्रमाण अंदूं जावपी सुमार 600 फुटबॉल मॅचींनी मॅच फिक्सिंगेची शक्यताय आसा.