भांगरभूंय | प्रतिनिधी
माॅन्सून पूर्व पावस ९७९ टक्के चड
पणजी: फाटल्या चार-पांच दिसां सावन गोंयांत सेगीत पावस झडत आसा. ह्या पावसाक लागून जायते कडेन पडझडूय जाल्ली पळोवपाक मेळटा. कोणाच्या घरांचेर, रस्त्याचेर, गाडयांचेर झाडां कोसळून बरेंच लुकसाण जालां. तशेंच कांय कडेन इमारतीचे कांय भाग कोसळिल्ल्यान बरेंच लुकसाण सोंसचें पडलें. पावसाचें उदक रस्त्यावेल्यान व्हावपाक लागलां. रस्ते, बाजार उदका पोंदाक गेल्यात. हेच फाटभंयेर आयज हवामान खात्यान ऑरेंज अलर्ट जारी केला. तशेंच आयच्यान फुडले पांच दीस वादळ, वार्या सयत घोग्यांनी पावस पडपाची शक्यताय उक्तायल्या.
मजगतीं, हवामान खात्यान १ मार्च ते २४ मे मेरेन राज्यांत १८.१३ इंच मान्सूनपूर्व पावसाची नोंद जाल्ल्याची म्हायती दिल्या. तशेंच हो पावस सरासरीच्या ९७९ टक्के चड आशिल्ल्याचेंय सांगलां. फाटल्या २४ वरांनी काणकोणा सगल्यांत चड २.१८ इंच (५५.४ मिमी) पावसाची नोंद जाल्या. जाल्यार पणजी (३५.६ मिमी), पोरणें गोंय (३४.६ मिमी), म्हापश्यां (२५.७ मिमी) १ इंचा परस चड पावसाची नोंद जाल्या. आयज हवामान खात्यान ऑरेंज अलर्ट जारी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
