भांगरभूंय | प्रतिनिधी
स्मार्ट सिटीच्या कामाक लागून निर्णय
भांगरभूंय | प्रतिनिधी
पणजीः पणजे स्मार्ट सिटीच्या दुसऱ्या पांवड्या वयलें काम सुरू जालां. भाटले ते चार पिलार मेरेनचो रस्तो पयलींच बंद केला. आतां शारांतले आनीक स रस्ते बंद केल्यात. तातूंतले पांच रस्ते 18 जानेवारी ते 7 फेब्रुवारी मेरेन बंद आसतले. जाल्यार 18 जानेवारी ते 31 मार्च मेरेन अजून एक रस्तो बंद आसतलो. सध्या पणजी लोकोत्सव चालू आसा. अशें परिस्थितींत हे रस्ते बंद केल्ल्यान शारांत येरादारीची कोंयडी जावपाची शक्यताय आसा.
मेळिल्ले म्हायती प्रमाण, महात्मा गांधी रस्त्या वयल्या डॉन बॉस्को ते यूको बँक मेरेनचो 354 मिटर लांबायेचो रस्तो बंद केला. डॉन बॉस्को वा पणजी बाजारांत वचपा खातीर यूको बँके कडल्यान पी शिरगांवकार रस्तो – आत्माराम बोरकर रस्तो – शिक्षण खात्याचे पोरणें इमारतीं कडल्यान मार्ग घेवचो पडटलो. लिबर्टी शोरूम ते विनंती रेस्टॉरंट मेरेनचो रस्तो कांय प्रमाणांत बंद आसतलो. ह्या टप्प्यांतल्यान गाडयो यो – वच करपाक शकतलीं.
टी बी कुन्हा रस्त्या वयल्या कॅफे भोसले ते दयानंद बांदोडकर रस्तो जंक्शन मेरेन 230 मिटराच्या टप्पांत ड्रेन लायन घालपाचें आनी हेर कामां जातलीं. ताका लागून हो रस्तो पुराय बंद आसतलो. कॅफे भोसले वटेन वचपी गाडयांक मिनेझीस ब्रागांझा रस्त्याचो वापर करचो पडटलो. 18 जून रस्त्या वयल्या एनजीपीडीए ते काकुलो आयलंड मेरेनचो 140 मिटर लांबायेचो रस्तो पुराय बंद आसतलो. कुन्हा रिव्हेरा रस्त्या वयल्या विनंती रेस्टॉरंट ते दयानंद बांदोडकर रस्तो जंक्शन मेरेनचो 40 मिटरांचो रस्तो बंद आसतलो. थंयच्यान दयानंद बांदोडकार रस्त्या कडेन वचपी गाडयांनी हॉटेल मांडवी – स्वामी विवेकानंद रस्तो अशा पर्यायी रस्त्यांचो वापर करचो. हें सगळे मार्ग 18 जानेवारी ते 7 फेब्रुवारी मेरेन बंद आसतले. तशेंच ताड माड देवूळ ते एसटीपी पुला मेरेनचो रस्तो 18 जानेवारी ते 31 मार्च मेरेन बंद आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
