भांगरभूंय | प्रतिनिधी
भारत आनी येजमान बांगलादेश ह्या पंगडां मदीं आयच्यान दुसरे टॅस्टीक सुरवात जातली. पयली टॅस्ट जिखून भारतान 1-0 अशी आघाडी घेतल्या.
सदचो मुखेली रोहित शर्मा अजून पुर्ण बरो जावंक ना. बांगलादेशा आडचे वन डे माळेंतले दुसरे मॅचींत ताच्या आखाण्याक दुखापत जाल्ली. तो अजून पुर्ण बरो जावंक ना. ताका लागून आयचे मॅची खातीर लेगीत तो उपलब्ध ना.
पयले टॅस्टींत शुभमन गिल आनी चायनामॅन कुलदीप यादव हांकां निमाण्या इकरांत सुवात मेळिल्ली. दोगांयनी मेळिल्ले संदीचें भांगर केलें. रोहित शर्मा जरी दुसरे टॅस्टी खातीर उपलब्ध आशिल्लो, तरी लेगीत शुभमन गील भायर दवरप कठीण जातलें आसलें. पयले टॅस्टींत ताणें कारकिर्दींतलो पयलो शेंकडो नोंदयिल्लो.
डब्ल्यूटीसी गुणतकट्यांत पयल्या दोनांतली आपली सुवात घट्ट करपाचो ताचो यत्न आसतलो. भारत सध्या दुसरे सुवातेर आसा. गाबांत ऑस्ट्रेलिये आड जाल्ले मॅचींत दक्षीण आफ्रिकेक लजेक पडपी हार घेवची पडिल्ली. हाचो फायदो भारताक जालो. ताका लागून बांगलादेशा आडची माळ तो हलकी घेवचो ना.
दुसरे वटेन बांगलादेश माळेंत बरोबरी मेळोवपाक इत्सूक आसतलो. पयले टॅस्टींत ताका हार घेवची पडली आसली तरी चवथ्या डावांत ताणें बरे तरेन बॅटींग केल्ली. आपली पयली टॅस्ट खेळपी ओपनर जाकीर हसनान शेंकडो नोंदयिल्लो. ताची पुनरावृत्ती करपाक तो इत्सूक आसतलो. मुखेली शाकिब अल हसन दुखापतीक लागून दुसऱ्या डावांत बॉलींग करपाक मैदानांत देंवूंक नाशिल्लो. ताका लागून पंगड वेवस्थापनान स्पिनर नासूम अहमदाचो आस्पाव केला. आयज ताका टॅस्ट पदार्पणाची संद मेळुये. आदलो मुखेली मॉमिनूल हक लेगीत दुखापतीक लागून पंगडांतल्यान भायर आसा.
राहुलाचो खेळपा विशीं दुबाव
लोकेश राहुलाक सराव करतना दुखापत जाल्ल्यान आयचे मॅचींत खेळपा विशीं दुबाव उप्रासला. रोहित शर्मा जखमी जाल्ल्यान ताचे सुवातेर राहुलाक मुखेली केल्लो. जर तो आयचे मॅचींत खेळपाक अपेशी थारता तर चेतेश्वर पुजारा पंगडाचें फुडारपण करपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
