भांगरभूंय | प्रतिनिधी
येजमान भारत आनी इंग्लंड ह्या पंगडां मदीं आयच्यान हांगाच्या डॉ. व्हाय एस राजशेखर स्टेडियमाचेर दुसरे टॅस्टीक सुरवात जाता. हैदराबादांत जाल्ली दुसरी टॅस्ट भारत 28 धांवड्यांनी हारिल्लो. ताका लागून माळेंत बरोबरी सादपाचें भारताचें चेपण आसतलें.
सध्यातरी भारता खातीर कांय बरें घडना. माळे पयलीं विराट कोहलीन वैयक्तीक कारणाक सध्यातरी पयल्या दोन टॅस्टी खातीर स्वताक भायर दवरला. पंगड वेवस्थापनान अजिंक्य रहाणे आनी चेतेश्वर पुजारा हांचेर आडनदर करून नवोदीत खेळगड्यांक खेळोवपाक निवड समितीन प्राधान्य दिलां. ह्या तीन म्हत्वाच्या बॅट्समनांचे गैरहाजेरेंत भारताची मदली फळी अणभवहीन दिसपाक लागल्या. श्रेयस अय्यर, के एस भरत सारके खेळगडे मदले फळयेंली पोकळी भरून काडपाचें काम करतना दिसतात.
एके वटेन खेळगडे फॉर्मा खातीर झुजतना दिसतात जाल्यार दुसरे वटेन दुखापतीन पंगड वेवस्थापनाचें चेपण वाडयलां. रवींद्र जडेजा आनी लोकेश राहुल दुखापतीक लागून दुसरे टॅस्टींत खेळचे नात. जडेजाचो तिसरे मॅचींत लेगीत खेळपाचो दुबाव आसा. पयले टॅस्टींत जडेजान 87 आनी राहुलान 86 धांवड्यो केल्ल्यो. जडेजाची गैरहाजेरी भरून काडप कठीण दिसता. पयले टॅस्टीच्या दोनूय डावांनी मेळून पांच विकेटी घेतिल्ल्यो.
यशस्वी जयस्वाल, शुभमन गील हांकां टॅस्ट क्रिकेटीचो चड अणभव ना. कोहलीचे सुवातेर घेतिल्ल्या रजत पाटीदाराक अजून टॅस्टींत पदार्पण करपाचें आसा. तीच स्थिती सरफराज खानाची आसा. देशांतर्गत क्रिकेटींत धांवड्यांचो पावस घालपी सरफराज खानान फाटल्या कांय रणजी हंगामांनी धांवड्यांचो पावस घाला. पूण, व्हड मॅचींनी खेळपाचो ताका अणभव ना. अशे तरेन पंगडाची भिस्त मुखेली रोहीत शर्माचेर निंबून आसा.
डॉ. व्हाय एस राजशेखर स्टेडियमाची खेळपट्टी परंपरीक रितीन बॅट्समनांक मजत करता. सुरवातीक फास्ट बॉलर आपलो शेक दवरपाक शकता. पूण, मॅच जसजशी मुखार वतली स्पिनरांक खेळपट्टींतल्यान मेळपाक सुरवात जातली. भारतान ह्या मैदानाचेर आपली निमाणी मॅच दक्षीण आफ्रिके आड खेळिल्ली. त्या वेळार भारतान 203 अशा व्हडा फरकान जैत जोडिल्लें. मॅच पांच दीस चलिल्ली. मोहम्मद शमीन 35 धांवड्यो दिवन 5 विकेटी घेतिल्ल्यो. जाल्यार रवींद्र जडेजान 87 धांवड्यां बदला 4 विकेटी मेळयिल्ल्यो. ते मॅचींत भारतान दोन तज्ञ स्पिनरांक खेळयिल्ले. दोनूय स्पिनरांनी विकेटी घेवपाक म्हत्वाची भुमिका वठयिल्ली.
ह्या मैदानाचेर भारत अजून मेरेन दोन मॅची खेळ्ळा. दोनूय खेपे पयलीं बॅटींग करपी पंगड जिखला. भारतान ह्यो दोनूय मॅची जिखल्यात. मुखेली टॉस जिखून पयलीं बॅटींग करपाचो निर्णय घेवपाक शकता. ह्या मैदाना वयलो सर्वोच्च स्कोर 502 आसा. भारतान 2019त दक्षीण आफ्रिके आड खेळटना ह्यो स्कोर उबारिल्लो. सगल्यांत उणो स्कोर 158 आसा. इंग्लंडान भारता आड हो स्कोर केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
