भांगरभूंय | प्रतिनिधी
भारत आनी अफगाणिस्तान ह्या पंगडां मदीं आयच्यान टी-20 माळेक सुरवात जाता. हे माळेंत सगल्यांची नदर रोहीत शर्मा आनी विराट कोहली हांचेर आशिल्ली. दोगूय अणभवी खेळगडे सुमार 14 वर्सांनी ह्या प्रकारांत पुनरागमन करतात. पूण, कोहलीन निमाण्या खिणाक वैयक्तीक कारणाक लागून पयले मॅचींतल्यान फाटीं सरपाचो निर्णय घेतलो. तो दुसरे आनी तिसरे मॅची खातीर उपलब्ध आसतलो.
जून म्हयन्यांत संवसारीक टी-20 क्रिकेट सर्त जावपाची आसा. ते पयलीं भारताची ही निमाणी टी-20 माळ आसा. हे माळे वरवीं वॅस्ट इंडीज आनी अमेरिका ह्या देशांनी जावपी संवसारीक टी-20 सर्ती पयलीं संयोजन तयार करपाक मजत जातली. पूण, 15 वांगड्यांची निवड ही आयपीएलांत खेळगड्यांच्या प्रदर्शनाच्या आदाराचेर जावपाची शक्यताय आसा. आयपीएल संवसारीक टी-20 सर्तीक सुरवात जावपाक कांय दीस पयलीं जातली. रोहीत आनी कोहली हे दोगूय संवसारीक सर्तींत खेळप लागीं लागीं निश्चीत आसा. पूण, अफगाणिस्ताना आडचे माळेंत व्हड स्कोर उबारून आपली तयारी आनीक घटमूट करपाचो तांचो यत्न आसतलो.
हालींच सोंपिल्ले संवसारीक वन डे क्रिकेट सर्तींत रोहीत शर्मान पावर प्लेंत आक्रमक बॅटींग केल्ली. तीच आक्रमकताय कायम राखपाचो ताचो यत्न आसतलो. दुसरे वटेन कोहली मदल्या ओव्हरींनी बरे स्ट्रायक रेटी सयत खेळपाक सोदतलो. कारण ह्या प्रकारांत डावाचो सुत्रधार जावपाची गरज ना.
यशस्वी जयस्वाल आनी तिलक वर्मा पंगडांत आसात. पूण, डावाची सुरवात रोहीत आनी यशस्वी जयस्वाल हे करतले. शुभमनाक दक्षीण आफ्रिकेचे भोंवडेर म्हणपा सारकें प्रदर्शन करपाक जमूंक नाशिल्लें. पयले सुवातेर बॅटींग करपा खातीर प्रतिस्पर्धा वाडल्या. ताका लागून अफगाणिस्ताना आड ताका बरें प्रदर्शन करचें पडटलें.
दक्षीण आफ्रिकेचे भोंवडेर रिंकू सिंगान उत्कृश्ट प्रदर्शन केल्लें. मदले फळयेंत जखमी सुर्यकुमार यादव आनी हार्दीक पांड्या हांचे गैरहाजेरेंत रिंकू सिंगाची भुमिका म्हत्वाची थारतली.
विकेटकीपर बॅट्समन ईशान किशन पंगडांत ना आनी विकेटकीपराचे पर्याय जितेश शर्मा आनी संजू सॅमसन आसतले. फाटल्या दोन माळांनी जितेश खेळ्ळा आनी आयचे मॅचींत लेगीत ताका खेळोवपाची शक्यताय चड आसा. शिवम दुबे लेगीत पंगडांत आसा आनी तो फास्ट बॉलर अश्टतासाच्या रुपान खेळपाक शकता.
फास्ट बॉलिंगेची जापसालदारकी अर्शदीप सिंग, आवेश खान आनी मुकेश कुमार हांचेर आसतली. स्पिन विभाग कुलदीप यादव सांबाळटलो जाल्यार दुसरो पर्याय म्हणून अक्षर पटेल, रवी बिश्नोई आनी वॉशिंग्टन सुंदर हातूंतलो एक आसतलो.
भारतांत जाल्ले संवसारीक वन डे क्रिकेट सर्तींत अजाप भरीत प्रदर्शन करपी अफगाणिस्तानाचो आत्मविस्वास वाडिल्लो आसा आनी क्रिकेटीचो हो फॉर्मेट ताका खूब आवडटा. ताका लागून भारताक सादूर रावपाची गरज आसा.
राशीद खानाक माळ चुकतली
अफगाणिस्तानाचो नामनेचो अश्टतासांचो खेळगडो राशीद खानाक भारता आडची टी-20 माळ चुकतली. ताचे फाटीचे दुखापतीन परतून तकली वयर काडल्या. राशीदान दोन म्हयन्यां पयलीं फाटीचें ऑपरेशन करून घेतिल्लें.
25 वर्सां पिरायेच्या राशीद पंगडा वांगडा चंदीगडाक पाविल्लो. ताणें कांय वगत बॉलींग लेगीत केल्ली. पूण, तो पुर्णपणान तंदुरुस्त ना. ताका पुर्ण बरो जावपाक कांय वेळ लागतलो अशें अफगाणिस्तानाचो मुखेली इब्राहीम जादारानान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
