भांगरभूंय | प्रतिनिधी
पणजी : गोंयांत आयच्यान आंतरराष्ट्रीय चित्रपट महोत्सव (इफ्फी) सुरू जाता. ह्या निमतान गोंयांक भारतीय तशेंच आंतरराष्ट्रीय चित्रपट मळावेले दिग्गज कलाकार भेट दितले. जायत्या चित्रपटांचें प्रदर्शनूय जातलें. तशेंच चित्रपट मळावेल्या दिग्गजांचीं चर्चासत्रांय जातलीं.
आयज सांजेवेळार ह्या सुवाळ्याचें व्हडा उमेदीन उक्तावण जातलें. सुवाळ्याक सुभाष घई, दिनेश विजन, अमर कौशिक, एन एम सुरेश, आर के सेल्वामणी, ईशारी गणेशन, रवी कोतारकारा तशेंच प्रसून जोशी अशे नामनेचे निर्माते, दिग्दर्शक आनी तंत्रज्ञ हजर रावतले. ह्या वेळार अभिनेते नागार्जुन, नित्या मेनन, माला, विक्रांत मेसी, रकुल प्रीत, मानुषी छिल्लर, बोमन इराणी, राजकुमार राव, अभिषेक बॅनर्जी, जयदीप अहलावत, रणदीप हुडा, सानया मल्होत्रा, जयम रवी, जॅकी भगनानी, आर. सरथ कुमार, मुक्ता बर्वे, सोनाली कुलकर्णी, राधाकृष्णन पार्थिबन हांचे सयत हेर मानेस्तूय हाजीर रावतले. आध्यात्मीक मळावेले दिग्गज श्री श्री रविशंकर हेय हजर रावतले.
आयच्या वेळार पत्रका प्रमाण दनपरां २ वरांचेर पणजेच्या आयनॉक्स थिएटरा लागसारा रेड कार्पेटाचें आयोजन केलां. हातूंत रेड कार्पेट गाला प्रीमियरांत दनपरां अडेजांक ऑस्ट्रेलियन दिग्दर्शक मायकल ग्रेसी हांच्या ‘द बेटर मॅन’चो प्रीमियर जातलो. ३ वरांचेर फिल्म बाजारचें उक्तावण. सांजेवेळार शामाप्रसाद मुखर्जी इनडोअर स्टेडियमार ५ वरांचेर रेड कार्पेट गालाचें आयोजन केलां. उपरांत ५.३० वरांचेर सुवाळ्याचें उक्तावण जातलें.
सर्जनशील आनी मनाचो ठाव घेवपी चित्रपटांचो अंदूं भोवमान करतले. हाका लागून विवीध विभागांची निर्मिती करतले. ह्या वेळार महोत्सवाची थीम पुरायेन ऑस्ट्रेलियन चित्रपटसृश्टीचेर आदारून आसा. ५५ व्या आंतरराष्ट्रीय चित्रपट महोत्सवांत जायत्या कलाकार आनी तंत्रज्ञांचोय भोवमान करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
