भांगरभूंय | प्रतिनिधी
इंडियन प्रिमीयर लिगेच्या (आयपीएल) 16व्या हंगामाक आयच्यान सुरवात जाता. उक्तावणाची मॅच सध्याचो वस्ताद गुजरात टायटन्स आनी चार खेपेचो वस्ताद चेन्नय सुपरकिंग्स ह्या पंगडां मदीं अहमदाबादाच्या नरेंद्र मोदी स्टेडियमाचेर जातली.
दोनूय पंगड जैतान लिगेक सुरवात करपाक इत्सूक आसतले. गुजरात टायटन्स आयपीएलांतली नवी फ्रॅंचायजी आसा. पोरूंच ताणें पदार्पण केलां. दोनूय पंगडां मदीं फकत दोनूच मॅची जाल्यात आनी दोनूय मॅचींनी गुजरात टायटन्सान आपलो शेक दवरिल्लो. ताका लागून आंकड्यांचेर नदर मारली जाल्यार गुजरात टायटन्साचें दालें जड दिसता.
अंदूंच्या हंगामा खातीर जाल्ले पावणेंत दोनूय पंगडांनी बरे खेळगडे विकत घेवन आपलो पंगड घटमूट करपाचो यत्न केला. चेन्नय सुपरकिंग्सान बेन स्टोक्साक जाल्यार गुजरातान केन विलियम्सनान आपल्या पंगडांत घेतला.
दीपक चाहराचें चेन्नय सुपरकिंग्स पंगडांत पुनरागमन जालां. दुखापतीक लागून ताका पोरूचो हंगाम चुकिल्लो. तशेच रवींद्र जडेजा लेगीत फॉर्मांत आयला.
दुसरे वटेन गुजरातांत हार्दिक पांड्या खेरीत रशीद खान, शुभमन गील सारके फॉर्मांत आशिल्ले खेळगडे आसात. हाचे खेरीत हार्दिक पांड्या आनी महेंद्रसिंग धोनी हांचे डावपेच लेगीत मॅचीक आनीक उमळशीक वाडोवपी थारोवपाक शकतात.
मजगतीं, 2008त सुरू जाल्ले आयपीएलान साबार खेळगड्यांक गिरेस्त केल्यात. फकत पगारांतल्यान 150 कोटी परस चड जोडपी खेळगड्यांचे वळेरेंत तीन नांवांचो आस्पाव आसा. खाशेली गजाल म्हणल्यार तिनूय खेळगडे हे भारतीय आसात.
आयपीएलांत कमाय करपी खेळगड्यां मदीं टीम इंडियाचो मुखेली रोहित शर्मा पयले सुवातेर आसा. रोहितान आयपीएलांतल्यान आतां मेरेन सुमार 178 कोटी रुपया जोडल्यात.
2008त तीन कोटींची बोली लागिल्ल्या रोहित शर्माचो सध्याचो पगार 16 कोटी आसा. दुसरे सुवातेर महेंद्रसिंग धोनी आसा. 2008त सगल्यांत म्हारगो खेळगडो आशिल्लो. धोनीचो पगार 6 कोटी रुपया आशिल्लो. जो सध्या 12 कोटी रुपया आसा. धोनीचो 2018 ते 2021 मेरेनचो पगार 15 कोटी रुपया आशिल्लो. ताणें आतां मेरेन सुमार 176 कोटी रुपया जोडल्यात.
विराट कोहली आयपीएलांत चड जोडपाचे वळेरेंत तिसरे सुवातेर आसा. ताका आतां मेरेन 173 कोटी रुपयांचो पगार मेळ्ळा. चवथे सुवातेर सुरेश रैनान आसा. ताणें आयपीएलांतल्यान 110 कोटी रुपया जोडल्यात. आयपीएलांत पगारांतल्यान जोडपाचे वळेरेंत रवींद्र जडेजा लेगीत फाटीं ना. सध्या ताचें 16 कोटी रुपया मानधन आसा. तो ह्या हंगामांत सगल्यांत चड मानधन घेवपाचे वळेरेंत आसा. आयपीएलांतल्यान ताणें अजून मेरेन 109 कोटी जोडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
