भांगरभूंय | प्रतिनिधी
बेकायदेशीर बांदकामां बांदपी जितले दोशी, तितलेच वा ताचे परस तीं बांदपाक साधन, सुविधा दिवन मान्यताय दिवपीय दोशी. दोगांयकूय जापसालदार धरून कारवाय जावंक जाय.
राजकारण म्हणल्यार गजकर्ण अशें सगलेच म्हणटात, तें ओगीच न्हय. म्हणचे केन्ना, खंय खाज येत तें सांगपाक येना. खाज येता थंय खाजोवचेंच पडटा. राजकारणाचेंय तशेंच. केन्ना आनी खंयच्या पक्षांत बेबूक उडकी घेवची पडत तें कोणाकूच सांगपाक येना.
आतां राजकारण हें समाजकारण वा समाजसेवा उरूंक ना. तशें कोणाक दिसता जाल्यार तीं धोंगीपणा. आयज राजकारण हो बरेपैकी फायदेशीर वेवसाय जाला. तातूंत वावुरप्यांक खंयच्याच पक्षां विशीं आदर ना तें दिसता. तांकां पक्षाच्या ध्येय धोरणांचेंय पडून वचूंक ना. तत्वां मानपी थोडे वावुरपीय तोंड धांपून ओग्गी आसात. ते आपल्या पक्षाक मत दिवपाचें कर्तव्य मात चुकनासतना पाळटात.
कांय लोकांच्यो करामती मात वेगळ्योच आसतात. सध्या बेकायदेशीर बांदकामांचो जो चिखल करून दवरला, तातूंत देंवपाक जायते जाण तयार नात. बेकायदो घरांचो प्रस्न सदांच धड्यार आयिल्लो आसता. हुमकळपी तरसादूच ती. खास करून कोमुनिदाद आनी बेवारस सरकारी जमनीचेर आपल्याच्या बापायची मालमत्ता आशिल्ले सारकें बेकायदेशीर बांदकाम करप, घरां उबारप योग्य न्हय. जबाबदार लोकांनी ताचे कडेन आडनदर करप हें कित्या खातीर, हें गोंय, गोंयकार, गोंयकारपण जपपी नीज गोंयकारांक नेमकें खबर आसा. ताची बारीकसारीक म्हायतीय तांकां आसा.
हीं बेकायदेशीर बांदकामां खरें म्हणल्यार पंचायत, पालिका, राजकी फुडाऱ्यांच्या आशिर्वादान उबीं जाल्लीं आसतात. बांदकाम करप्यां कडल्यान पंच, सरपंचान पयशे घेवपाचे. तांकां वीज, नळ कनेक्शन, आदार, रेशन, मतदान कार्ड दिवपाचें वा तें तयार करपाक पूर्ण सहकार्य करपाचें, तांचीं मतां गोंयांत हाडपाचें, (दोनूय कडेन मतदान) नवी वोट बँक तयार करपाची. नव्या मतदारांची भरती थळावे फुडारी करीत आसतात. तांची मतां घेवन मागीर आपलें राजकारण, राजकी जीण चालू दवरपाची आनी अशा प्रकारान आपली शक्ती एकवटल्या, अशें दाखोवन दिवपाचें. मतां मेळोवपा खंयच्याय थराक वचप हें राजकी फुडाऱ्यांचें वर्तन सामकें दुर्दैवी. बेकायदेशीर बांदकामां बांदपी जितले दोशी, तितलेच वा ताचे परस तीं बांदपाक साधन, सुविधा दिवन मान्यताय दिवपीय दोशी. दोगांयकूय जापसालदार धरून कारवाय जावंक जाय. तेन्नाच बेकायदो बांदकामां उणीं जातलीं. पूण वयर पसून सकयल मेरेन संबंद आशिल्ल्यान हें जावप तशें कठीणूच. पूण कारवाय जावंक ना जाल्यार फुडलो काळ कठीण आसा. गोंया खातीर ही धोक्याची घांट हें कोणे विसरचें न्हय.
– गजानन बा. नायक भाटकार,
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
