भांगरभूंय | प्रतिनिधी
वर्सांन वर्सां जाल्ल्या संस्कार, अणभव, परिस्थितीक लागून एक विशिश्ट विचार मनशाच्या शिरंतरांनी रुजता. पिळग्यान पिळग्यो तो मुखार वचत रावता. कितलेय यत्न केले तरी मनीस त्या विचाराक केन्ना तरी शरण वताच. चडशे खेप परिस्थिती ताका तें करपाक लायता. तो सारासारा विचार करीना जाल्यार त्या विचारांचे भकीक पडटा आनी स्वताचें लुकसाण करून घेता. ताका मार्गदर्शन करप्याचेर धर्मविरोधी, संस्कृती विरोधक असो शिक्कोय मारपाक तो फाटीं रावना. हो विचार म्हणल्यार अंधश्रद्धा!! अज्ञानी मनीसच न्हय, तर उच्च शिक्षीत, पयशेकारूय तिचे भकीक पडटात. ते कशीच ही चुकीच्या विचारांची फास्की मोडपाक सोदिनात. बैलान मळणी करतना गोल- गोल घुंवत रावचें तशे तें अंधश्रद्धां फाटल्यान भोवत रावतात आनी एक दीस घडये स्वताचें सोंसूक जावचें ना, इतलें लुकसाण करून घेतात. समाजाचें, संबंधित मनशाचें, ताच्या घरच्यांचें शारिरीक, मानसीक, अर्थीक, समाजीक लुकसाण जायना जाल्यार एकवेळ कसल्याच विचारांची कास धरूं येता. पूण हांगां चडशें सगल्या तरांचें शोशण जाल्लें दिसता. तरीय आमी सुदरनात!!
महाराष्ट्रा सारक्या पुरोगामी राज्यांत पयरूच मुंबय उच्च न्यायालयान सत्र न्यायालयाचो 2016 त निकाल कायम दवरलो. गुन्यांवकाराची जल्मभराचे बंदखणीची ख्यास्त उणी करूंक ना. ह्या 45 वर्सांचे व्यक्तीन आपूण तांत्रिक आशिल्ल्याचें सांगून स दिव्यांग चलयांचें लिंगीक शोशण केलां. तशेंच नेण्ट्या भुरग्यांचेर उपचार करपाच्या नांवा खाला देड कोटी रुपया घेतल्यात. 2010 त ताचे आड पुलीस कागाळ जाल्ली. महाराष्ट्रांत पांचशें वर्सां सावन पुरोगामी विचार व्यक्त जायत आयल्यात. संतांनीय ते उक्तायल्यात. आंगवण करून भुरगीं जातात जाल्यार घोव आनी बायल तरी कित्याक करपाक जाय, असो प्रस्न संत तुकाराम बुवान विचारला. उपरांतच्या काळांत शेंकड्यांनी समाजसुदारक हांगा जावन गेले, तरीय हें राज्य अजून अदींमदीं अंधश्रद्धेची वाट माड्डिता.
हांगां 2013 त महाराष्ट्र नरबळी आनी हेर अमानुश, अघोरी आनी दुश्कर्मी प्रथा आनी काळो जादू हो कायदो सगल्या पक्षांनी एकवटान मंजूर केला. ताका लागून कांय भौशीक प्रथा बी बंद जाल्यात, पूण अंधश्रद्धेन लोकांच्या मनांचेर केल्ली जादू अजून आसा तशीच आसा. पयर न्यायालयान निकाल दितना एक निरीक्षण नोंद केलां. ‘संवसार बरोच मुखार पावला तरी अजून लोक समस्या घेवन तांत्रिक, बाबां कडेन वतात, हें आयच्या काळाचें दुर्दैवी वास्तव, सत. हे तथाकथित बाबा, तांत्रिक लोकांचे दुर्बळतेचो, भावार्थाचो, अंधश्रद्धेचो गैरफायदो घेतात, लोकांचें शोशण करतात, पयशे तर घेतातूच, केन्नाय लिंगीक छळूय करतात.’ अंधश्रद्धेचें भूत आमचे मानेर कितलें घट्ट बसलां, ताची देख दिवची जाल्यार बंदखणींतले दोन बाबा. लिंगीक छळ, खुनाचे आरोप आसात तांचेर. एकलो पॅरोलाचेर भायर- भितर करता. धक्को दिवपी गजाल म्हणल्यार इतलें जावनूय तांच्या भक्तांच्या आंकड्यांत मात पसून उणाव जावंक ना!!!
मुंबय न्यायालयाचो निकाल आयलो त्याच काळांत म्हणल्यार फाटल्या 3-4 दिसांनी आनीक कांय घडणुको उजवाडांत आयल्यात. रुरकीचे एक चलयेन पोरूं एक जायरात पळोवन घरांतल्यो समस्या पयस करपाक तांत्रिकाची मजत घेतली. एक दीस ताणें तिका थंड पेयांतल्यान गुंगीचें वखद दिवन नाका जाल्लें केलें. आतां ताका पुलीस सोदतात. दुसरो शेवडी- मुंबयचो. गंभीर दुयेंसां, लग्नांतल्यो समस्या, अमेरिकेचो व्हीसा अश्या कामांनी लोकांक ‘मजत’ करपी 32 वर्सांच्या ह्या बाबाक धरला. ताचे फी व्हडली…. हे बाबा सगल्या धर्माचे आशिल्ल्यान कोणेच एकामेकांक बोट दाखोवचें न्हय.
समस्या, अडचणी, संकश्टां, प्रस्न सगल्यांकूच आसतात. तो मागीर अब्जाधीश आसूं वा रस्त्या वयलो भिकारी. समस्या मनीस कोण तें पळयना. पूण, कितेंय जालें जाल्यार मनशान सारासार विचार करून अंधश्रद्धेचे भकीक पडून स्वताचें आनी कुटुंबाचें लुकसाण करून घेवंक जायना. श्रद्धेन कुळदेवाक आनी हेर देवांक नमस्कार करून आत्मविस्वासान, जिद्दीन ते समस्येचेर उपाय सोदपाचे यत्न सुरू केले, जाल्यार नकळटां ती समस्या नाच्च जाता. काळखा फाटल्यान उजवाड आसता, मध्यान रात जाली काय फातोड ही जाताच जाता. दुख्ख हें कायमचें रावंक येना. तें येता, वता. ताच्या आनी सुखाच्या खो- खो खेळांचो मनशान स्वताचेर वायट परिणाम जावपाक दिवंक फावना. न्यायालयाच्या ह्या निरिक्षणा पसून कितें तरी शिकूया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
