भांगरभूंय | प्रतिनिधी
मंत्री गोविंद गावडेः सावयवेऱ्यां जालो आयुषमान भारत भलायकी मेळावो
भांगरभूंय । प्रतिनिधी
सावयवेरें: आयचें तंत्रज्ञान बरें बरें आसलें तरीय तें तितलेंच घातक आसा. हे खातीर मोबायलाचो योग्य वापर करचो, अशें खेळां मंत्री गोविंद गावडे हांणी सांगलें.
गोंय सरकाराच्या भलायकी सेवा संचालनाला वतीन सावयवेऱ्यां आयुषमान भारत भलायकी मेळावो जालो. दिवली पेटोवन मेळाव्याचें उक्तावण केले उपरांत मंत्री गावडे मुखेल सोयरे म्हूण उलयताले. ह्या वेळार तांचे वांगडा माचयेर सरपंच शोभा पेरणी, भलायकी अधिकारी जास्मीन पिंटो, उपसरपंच बाबू गावडे, पंच नवनाथ वेलकासकार, अक्षय नायक, रोहन तारी, स्वाती पालकार आनी लोचन नायक हाजीर आशिल्ली.
मुळावें भलायकी केंद्र बेतकी आनी वेरें वाघुर्में पंचायत हांच्या जोडपालवान हो मेळावो सावयवेरेंच्या मदनंत क्रिकेट क्लबाच्या सभाघरांत आयोजीत केल्लो.
गोंयांत गांवागांवांनी भलायकी केंद्रां सुरू जाल्यांत. योग्य आहार आनी व्यायाम तशेंच ताणतणावा पसून पयस रावप गरजेचें आसता. सकारात्मक दिश्टीकोन म्हत्वाचो आसता तसोच एकामेकांचेर विस्वास आसपूय गरजेचो आसा. मानसीक ताण आसल्यार कसल्याय दुयेंसाची लागण जाता, अशें मंत्री गावडे हांणी सांगलें.
आयच्या काळांत चडशा भुरग्यांचो आवय- बापूय कामा निमतान दीसभर घरांतली भायर आसतात. ताका लागून भुरग्यांक मोगान लागीं ओडपी पालक उणें जाल्यात. ताका लागून भुरग्यांचेर बरे संस्कार जायनात. संस्कार आनी ताणतणाव नाशिल्ली पिळगी तयार करतले जाल्यार बरी भलायकी आनी सकारात्मक विचार म्हत्वाचे आसात. आपली भलायकी घटमूट दवरचे खातीर बऱ्यो संवयी गरजेच्यो, अशेंय मंत्री गावडे हांणी सांगलें.
सरपंच पेरणी हांणीय ह्या वेळार आपले विचार मांडले.
डॉ जास्मीन पिंटो हांणी प्रास्तावीक केलें आनी येवकार दिलो. राजू घाटवळ हांणी सुत्रसंचालन केलें आनी उपकार मानले. ह्या मेळाव्यांत बेतकी भलायकी केंद्राच्या दोतोरांनी दुयेंतींची तपासणी करून तांकां वखदां दिलीं. ह्या मेळाव्याचो सुमार 200 परस अदीक दुयेंतींनी लाव घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
