भांगरभूंय | प्रतिनिधी
भारतीय रिझर्व्ह बँकेन जारी केली अधिसुचोवणी
नवी दिल्ली, खबरां संस्था ः 31 मार्च 2024 दिसा आयतारा सुटी आसून लेगीत सगळ्यो एजन्सी बँको लोकां खातीर उक्त्यो आसतल्यो. हे विशीं भारतीय रिझर्व्ह बँकेन बुधवारा आरबीआयचे मुखेल महाव्यवस्थापक सुनील टीएस नायर हांचे वरवीं अधिसुचोवणी जारी केल्या. तशेंच आयकर खात्यानय आपलीं सगळीं कार्यालयां उक्तीं दवरपाचो निर्णय घेतलां. आरबीआयच्या परिपत्रका प्रमाण बँकांनी आयतारा, 31 मार्च 2024 दिसा सरकारी वेवसाया खातीर आपल्यो सगळ्यो शाखा उक्त्यो दवरच्यो.
दर वर्सा 31 मार्च हो अर्थीक वर्साचो निमाणो दीस. ह्या दिसा सरकारा कडेन संबंदीत सगळे वेवहार वेवस्थीत रितीन जावचे म्हणून नॅशनल इलेक्ट्रॉनिक फंड ट्रान्सफर (NEFT) आनी रिअल टाइम ग्रॉस सेटलमेंट (RTGS) पद्दती वरवीं वेव्हार 31 मार्चाक मध्यान रातीं 12 मेरेन चालू उरतले.
आयकर खात्यांत गुड फ्रायडे, शेनवार आनी आयतारची सुटी रद्द
चालू अर्थीक वर्स सोंपपाक लागून आयकर खात्यान आपल्या सगळ्या कार्यालयांची लाँग वीकेंड सुटी रद्द केल्या. बुधवारा खात्यान हे संबंदीं परिपत्रक जारी केलां. कराचे काम पुराय करपा खातीर खात्यान हो निर्णय घेतला. आयकर खात्याचीं सगळीं कार्यालयां 29 मार्च (शुक्रवार), 30 मार्च (शेनवार) आनी 31 मार्च (आयतारा) उक्तीं आसतली.
खात्याच्या ह्या निर्णयाक लागून करदात्याक कर संबंदीत काम पुराय करपाक आनीक 3 दीस मेळटले, कारण ह्या सप्तकांत होळीक लागून सोमारा आयकर खात्याचीं सगळीं कार्यालयां बंद आसतलीं. अशें परिस्थितींत करदात्यांक सोंपें जावचें म्हणून खात्यान लाँग वीकेंड रद्द करपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
