आयकराक कातर

भांगरभूंय | प्रतिनिधी

मध्यमवर्गियांक थाकाय, 12 लाखां मेरेन आयकर ना

खबरां संस्था

नवी दिल्लीः केंद्रीय अर्थमंत्री निर्मला सीतारामण हांणी शेनवारा 1 फेब्रुवारीक मध्यमवर्गियांक थाकाय दिवपी 2025- 26 ह्या अर्थीक वर्सा खातीर देशाचो अर्थसंकल्प मांडलो. आतां 12 लाख रुपया मेरेनचे जोडीचेर कसलोच कर भरचो पडचो ना. नोकरदार लोकांक 75 हजार रुपयांची अतिरिक्त मानक कपात लेगीत मेळटली. म्हणल्यार 12.75 लाख रुपया मेरेन आयकर मुक्त जातलो.

हो बदल फक्त नवे कर प्रणालींतल्या लोकां खातीरूच जाला. म्हणल्यार जांणी पोरणी कर वेवस्था वेंचल्या तांकां कसलोच लाव मेळचो ना. चड करून जांचें उत्पन्न पगारांतल्यान येता, तांकां हो लाव मेळटलो. जर तुमी भांडवली फायदो केल्लो आसत, म्हणल्यार शॅर मार्केटांत पयशे गुंतयल्यात जाल्यार, म्युच्युअर फंडांत पयशे गुंतयल्यात जाल्यार, घर विकत घेतलां जाल्यार वा विकिल्लें आसत आनी ताचेर कर भरचो पडटा, जाल्यार ही प्रणाली लागू जावची ना.

केंद्रीय अर्थमंत्री सीतारामन हांणी भाशणाचे सुरवेक सांगलें, आमची अर्थवेवस्थी ही संवसारांतले मुखेल अर्थवेवस्थेंत गतीन विकसीत जावपी अर्थवेवस्था आसा. फाटल्या 10 वर्सांतली उदरगत आनी मुळाव्या सुविधांच्या ट्रॅक रेकॉर्डाक लागून संवसारीक पांवड्यार आमी लक्ष ओडून घेतलां.

प्रधानमंत्री नरेंद्र मोदी हांच्या तिसऱ्या कार्यकाळांतलो हो दुसरो पुराय अर्थसंकल्प आसा जाल्यार केंद्रीय अर्थमंत्री निर्मला सीतारामण हांचो सेगीत आठवो अर्थसंकल्प आसा. ज्येश्ठ नागरिकां खातीर टीडीएस दुपेट करून 1 लाख रुपया केल्या. घरभाड्यांतल्यान मेळपी उत्पन्ना खातीरची टीडीएस मर्यादा वाडयल्या. आदींच्या 2.40 लाख रुपया वयल्यान वाडोवन ही मर्यादा 6 लाख केल्या. न्यू इन्कम टॅक्स विधेयक फुडल्या सप्तकांत सादर करतले. हें विधेयक समजपाक सोंपें आसतलें, अशें अर्थमंत्र्यान म्हणलें.

मध्यमवर्गियां खातीर 13 घोशणा

• 12 लाखांचे जोडीचेर कर ना. पगारदार लोकां खातीर कर मर्यादा 75 हजारच्या स्टॅण्डर्ड डिडक्शना सयत 12.75 लाख रुपया.
• जाण्ट्यां खातीर कर सवलत दुपेट
• टीडीएस मर्यादा 10 लाख रुपया
• 4 वर्सां खातीर अपडेटेड आयटीआर भरपाक सक्षम आसतले
• भाड्याच्या उत्पन्ना वयली टीडीएस सूट 6 लाख रुपयां मेरेन वाडयल्या
• मोबायल फोन आनी ई- कार सवाय जातल्यो
• ईव्ही आनी मोबायलाच्यो लिथयम आयन बॅटरी सवाय जातल्यो
• एलईडी- एलसीडी टीव्ही परवडपी आसतले. कस्टम ड्युटी 2.5 टक्क्यां मेरेन उणी केल्या
• फुडल्या सप्तकांत देशांत नवें आयकर विधेयक हाडटले
• 1 लाख कोटी रुपयांचो अर्बन चॅलेंड फंड तयार करतले
• शार वाठारांतल्या गरिबांचें उत्पन्न वाडोवपाची येवजण आसतली
• अर्दवट आशिल्लीं 1 लाख घरां पुराय जातलीं, 40 हजार नवीं घरां 2025 त दितले
• दरेका घराक नळांतल्यान उदका पुरवण करपी जल जीवन मिशन कार्यावळ 2028 मेरेन वाडयतले

बायलां खातीर 2 घोशणा

• एससी- एसटी एमएसएमई महिला उद्देजकां खातीर विशेश रीण येवजण
• पयलेच खेपे उद्देजक जावपी बायलांक 2 कोटी रुपयांचें फुकट रीण मेळटलें

जाण्ट्यां खातीर 6 घोशणा

• ज्येश्ठ नागरिकां खातीर कर सवलत दुपेट, 50 हजार रुपयां वयल्यान 1 लाख रुपया
• 36 जीववरक्षक वखदां पुराय करमुक्त
• देशांत 200 डे- कॅर कॅन्सर सेंटर बांदतले
• वैजकी उपकरणां आनी कॅन्सराचीं वखदां सवाय जातलीं
• 6 जीवरक्षक वखदां वयलीं कस्टम ड्युटी 5 टक्के उणी केल्या
• 13 दुयेंती आदार कार्यावळ मुळावें शीम शुल्क वगळ्ळां

शेतकारां खातीर 11 घोशणा

• किसान क्रेडीट कार्ड मर्यादा 3 लाख रुपयां वयल्यान 5 लाख रुपया केलां
• प्रधानमंत्री धन- धान्य कृशी येवजणेचो देशांतल्या 100 जिल्ह्यांक फायदो जातलो
• दुदा संबंदांतलो वेवसाय आनी नुस्तें पोसपा खातीर 5 लाख रुपया मेरेन रीण
• सागरी उत्पादना सवाय जातलीं, कस्टम ड्युटी 30 टक्क्यां वयल्यान 5 टक्के
• अंदमान, निकोबार आनी खोल दर्यांतले नुस्तेमारीक उर्बा दितले
• बिहारांतल्या शेतकारांक मजत करचे खातीर मखाना बोर्ड स्थापन करतले
• मिथिलांचलांत पश्चीम कोसी कानाल प्रकल्प सुरू जातलो. 50 हॅक्टर वाठारांतल्या शेतकारांक हाचो फायदो जातलो
• डाळींनी स्वावलंबन मेळोवचे खातीर 6 वर्सांची मोख
• ग्रामीण येवजण्यांनी पोस्ट पेमेंट बँक पेमेंट सेवेचो विस्तार करतले
• कापूस उत्पादना खातीर 5 वर्सांचो कृती आराखडो. उत्पादन- मार्केटींगाचेर भर
• आसामांत नामरूप वाठारांत नवो युरिया प्लांट उबारतले

तरणाट्यां खातीर 11 घोशणा

• स्टार्टअपा खातीर 10 हजार कोटी रुपयांचो निधी तयार करतले
• 500 कोटी रुपया खर्च करून 3 एआय उत्कृश्टता केंद्रां बांदतले
• फाटल्या 5 वर्सांत वैजकी शिक्षणांत 75 हजार सुवातो वाडयतले
• देशांतल्या 23 आयआयटींत 6500 सुवातो वाडयतले
• वैजकी म्हाविद्यालयांत 10 हजार सुवातो वाडयतले
• पीएम रिसर्च फेलोशीप खाला 10 नव्या फेलोशीप दितले
• देशांत ज्ञान भारत मिशन सुरू जातले, 1 कोटी हातबरपावळी डिजिटल जातल्यो
• पाटणा आयआयटींत वसतीघराच्यो सुविधा वाडयतले
• मेक इन इंडिया, मेक फॉर वर्ल्डाक उर्बा दितले
•  कुशळटाय वाडोवचे खातीर राष्ट्रीय पांवड्या वयलीं 5 केंद्रां निर्माण करतले
• सगळ्या सरकारी माध्यमीक शाळा आनी मुळाव्या भलायकी केंद्रांक ब्रॉडबॅण्ड कनेक्टिव्हिटी

वेपाऱ्यां खातीर 10 घोशणा

• एमएसएमई खातीर रीण हमी मर्यादा 5 कोटी वयल्यान 10 कोटी रुपयां मेरेन वाडयतले
• समाजकल्याण अधिभार काडपाचो प्रस्ताव
• 7 टॅरीफ दर काडटले. आतां देशांत फकत 8 टॅरीफ दर आसतले
• टीयर- 2 शारांनी संवसारीक तांक केंद्रां तयार करतले
• देशांत खेळणी उत्पादनाचें संवसारीक केंद्र करचे खातीर राष्ट्रीय येवजण आंखतले
• नव्या लेदर येवजणेक लागून 22 लाख लोकांक रोजगार मेळटलो
• नॅशनल इन्स्टिट्यूट ऑफ फूड टॅक्नॉलॉजी बिहारांत बांदतले
• मायक्रो एंटरप्रायजेस खातीर 5 लाख रुपयांचे मर्यादे सयत सानुकुलीत क्रेडीट कार्ड जारी करतले
• पयल्या वर्सा 10 लाख सानुकुलीत क्रेडीट कार्ड जारी करतले

शार वाठारांतल्या रस्त्या कुशीक बसपी विक्रेत्यां खातीर पीएम स्वानिधी येवजणेची रीण मर्यादा 30 हजार रुपयां मेरेन वाडटली