‘आयएमबी’चो रसरंग 2025 कला महोत्सव उमेदीन

भांगरभूंय | प्रतिनिधी

पणजी : ऑल गोवा आर्ट मास्टर्स असोसिएशना वतीन (आगमा) इन्स्टिट्यूट मिनेझीस ब्रागांझाच्या (आयएमबी) पालवान आयएमबी पणजे रसरंग 2025 कला महोत्सव उमेदीन मनयलो.

मुखेल सोयरे आयएमबीचे वांगडी सचीव अशोक परब हांचे हस्तुकीं दिवली पेटोवन महोत्सवाचें उक्तावण जालें. ह्या वेळार माचयेर असोसिएशनाचे अध्यक्ष कालिदास सातार्डेकार, आदले अध्यक्ष सुदेश वझे, सचीव वासुदेव शेट्ये, भांडारी प्रविण नायक हाजीर आशिल्ले. गायत्री सिद्धये (गायन) आनी प्रेमानंद च्यारी (बासुरी) हांणी गणेशवंदना सादर केली. ह्या निमतान नामनेचे कावी चित्रकार सागर नायक मुळे हांची कार्यशाळा जाली.

अशोक परब हांणी सांगलें, एका काळार गोंयांतलीं देवळां, घरां कावी शैलींतल्या चित्रांनी सजिल्लीं आसताली, पूण आयज ही कला सोंपल्या. हे फाटभुंयेर कावी कार्यशाळा प्रेरणा दिवपी थारतली. सागर नायक मुळे हांणी कावी कलेचो सांबाळ करपा खातीर घेतिल्ल्या ध्यास कवतुकाचो आसा, अशें तांणी सांगलें.

स्वताचे जडणघडणींत कावी कलेचो आशिल्लो प्रभाव हे विशीं सागर नायक मुळे हांणी म्हायती दिली. अमोघ बुडकुले, टेनिसन फर्नांडीस, आग्नेलो फर्नांडीस हांणी नाटकुलें सादर केलें. जॉन रॉड्रिग्ज हांणी ट्रम्पेट वादन सादर केलें. प्रेमानंद च्यारी हांणी बासुरीवादन सादर केलें. गुरूदास कळंगुटकार, वासुदेव शेट्ये, रेणू कळंगुटकार, बाझील मोटा, संतोष केरकार, कालिदास सातार्डेकार हांणी गीतगायन केलें. गौरीश वेर्णेकार, अजयसिंह कोठावळे, सुदेश वझे हांणी कविता सादर केल्यो. लक्ष्मण च्यारी आनी कालिदास सातार्डेकार हांणी चारकोल माध्यमांत लायव्ह पोर्ट्रेट प्रात्यक्षिकां दाखयलीं. धनंजय परब आनी वासुदेव शेट्ये हांणी भावगितां म्हणलीं. सुदेश वझे हांणी तबल्याचेर जाल्यार दीपक च्यारी हांणी हार्मोनियमाचेर साथसंगीत केली.

सेवानिवृत्त शिक्षक प्रदीप केरकार, कार्मिना गुदिन्हो डी आरवजो, किरण नायक, जहानआरा बेग, वासुदेव दिवकार, आनंद प्रभुदेसाय, निर्मला जॉयस डिसोझा हांचो ह्या वेळार सत्कार केलो. ऑल गोवा आर्ट मास्टर्स असोसिएशनाच्या नव्या उपक्रमा प्रमाण गोंय राज्य उत्कृश्ठ शिक्षक पुरस्कार फावो जाल्ले सुधीर तुकाराम नायक तशेंच सर्वोत्कृश्ठ चित्रकला शिक्षक पुरस्काराचे मानकरी कार्मो जेसूस रॉड्रिग्स हांचो भोवमान केलो. गोविंद तारी आनी निशांत सुर्लकार हांणी सुत्रसंचालन केलें.