भांगरभूंय | प्रतिनिधी
टॅक्सी अॅप प्रस्नाचेर अभ्यास करपा खातीर 11 वांगड्यांची समिती
पणजी: गोंयांतल्या आयएएस अधिकाऱ्यांक राज्यांतलो टॅक्सी वेवसाय तशेंच टॅक्सीकारांच्या प्रस्ना विशीं पुराय म्हायती ना. टॅक्सीकारांच्या समस्ये विशीं ते अनभीज्ञ आसात. टॅक्सीकारांचे प्रस्न आनी अॅप अॅग्रिगेटर विशयाचो अभ्यास करून उपाय काडपा खातीर पक्षान समिती स्थापन केल्या. प्रदेश भाजप अध्यक्ष दामू नायक हांणी ही म्हायती दिली.
ही समिती टॅक्सी धनी तशेंच टॅक्सी चालकां कडेन चर्चा करतली. अॅप अॅग्रिगेटर मार्गदर्शक तत्वां विशीं अधिकाऱ्यां कडल्यान म्हायती घेवन अभ्यास करतली. आमदार तशेंच तरेकवार संघटणां कडेन चर्चा करतली. हाचे उपरांत समिती मुख्यमंत्री डॉ. प्रमोद सावंत हांकां अहवाल सादर करतली. गोंयचे बरेच लोक टॅक्सी वेवसायांत आसात. हो वेवसाय गोंयकारांच्या हातांत आशिल्ल्यान तो सांबाळपाची गरज आसा. कांय टॅक्सीकारांचो बरो वेवसाय जाता. कांय टॅक्सीकारांक दिसाक दोन लेगीत भाडीं मेळनात. रीण काडून ते टॅक्सी वेवसाय चलयतात. रीण काडून टॅक्सी वेवसाय करपी गोंयकारांचो आंकडो उणो ना, अशें दामू नायक हांणी सांगलें.
टॅक्सी भाड्याचेर नियंत्रण दवरपा खातीर येरादारी मंत्री मॉवीन गुदिन्हो हे टॅक्सी अॅप सुरू करपाचेर ठाम आसात. आमदार मायकल लोबो सयत बऱ्याच आमदारांचो हाका विरोध आसा. ओला, उबर सारक्यो भायल्यो कंपनीं गोंयांत येवपाची भिरांत आसा. सगल्या टॅक्सी संघटणांनी अॅप अॅग्रिगेटर सेवेक विरोध केला. हो प्रस्न अधिवेशनांत लेगीत चर्चेक येतलो. हाका लागून उपाय काडपा खातीर पक्षान समिती स्थापन केल्या.
अॅप अॅग्रिगेटर मार्गदर्शक तत्वांचो मसुदो येरादारी खात्यान जारी केला. ह्या मसुद्याचेर 3300 वयर हरकती आयल्यात. चडशो हरकती टॅक्सीकारांनी घाल्यात. ह्या हरकतींचेर सरकारान अजून निर्णय घेवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
