भांगरभूंय | प्रतिनिधी
म्हापशें : आयएएस अधिकारी आशिल्ल्याचें सांगून कळंगूटेच्या शॅक आनी क्लब वेवसायिकां मदीं भंय निर्माण करपी दुबावीत मनोज कुमार (३१, मूळ रायपूर- छत्तीसगढ) ह्या अभियंत्याक पुलिसांनी अटक केली.
मुखार आयिल्ले म्हायती प्रमाण, अभियंता आशिल्लो दुबावीत मनोज कुमार हो ५ डिसेंबराक उमटावाडो- कळंगूटेच्या लंबाना रिसॉर्टांत देंविल्लो. हांगाच्यान तांणी एक टॅक्सी भाड्याक घेतली. टॅक्सी चालकाक ताणे आपूण ओडिशा रावपी आयएएस अधिकारी आशिल्ल्यान बेगीनूच आपली गोंयांत बदली जातली अशेंय सांगलें. कांय दिसांनी तो गोञ्
गोंयच्यान आपल्या मुळगांवांत परतलो. दुबावीत २० डिसेंबराक आपले इश्टीणी सयत हॉटेलार देंविल्लो. तांणी परत त्या टॅक्सी चालकाक कॉल करून गोंयांत आशिल्ल्याची म्हायती दिली. २६ डिसेंबराक तो टॅक्सींतल्यान कळंगूटेच्या पार्किंगांत आयलो. तांणी थंय तैनात आशिल्ल्या पुलीस कर्मचार्यांक आपूण आयएएस अधिकारी आशिल्ल्याचें सांगलें आनी वळखपत्र दाखोवन पुलिसांक आपल्या वांगडा येवपाक सांगलें. हे पुलीस कर्मचारी कळंगूट वाठारांत सेवेर आशिल्ले. कळंगूटे कांय सुवातांचेर पळोवणी करपाची आशिल्ल्याचें सांगून कांय कर्मचार्यांक आपल्या वांगडा येपाचे आदेश दिले. कर्मचारी दुबाविता वांगडा गेले.
सुरवातेक त्या मनशान थंयच्या दोन शॅक व्यावसायिकांक वेवसाय बंद करपाचो आदेश दिलो. उपरांत तो पुलीस कर्मचार्यांक घेवन बागा हांगच्या टीटोज् लेनींत गेलो. थंयूय ताणें क्लब वेवसायिकांना वेवसाय बंद करपाची ऑर्डर दिली आनी तशें करूंक ना जाल्यार त्रासांक तोंड दिवचें पडटलें अशेंय तांणी सांगलें. उपरांत त्या मनशान सगळ्या पुलीस कर्मचार्यांक तैनातीचे सुवातेर सोडले आनी स्वता हॉटेलाचेर परतलो. आपूण आयएएस अधिकारी आनी बेगीनूच आपली बदली गोंयांत जावपाची आशिल्ल्याचें तो सगळ्यांक सांगीत सुटिल्लो.
मजगतीं हे विशीं कितें तरी फटींगपणां चलिल्ल्याचें लक्षांत येतांच कळंगूटे पुलीस स्टेशनाचे कॉन्स्टेबल नारायण नरसे (४५) हांणी बोगस अधिकार्या आड गुन्यांव नोंद केलो. हांगच्या वेवसायिकांक गंभीर गुन्यांवांत आडकोवपाची धमकी दिवन, तांकां भेकडावपाचो यत्न केल्ले खातीर २९ डिसेंबराक सकाळीं मनोज कुमार हाका अटक केली. मजगतीं, तांणी अशें कित्याक केलें हें चवकशे उपरांत उक्तें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
