भांगरभूंय | प्रतिनिधी
पुजा नायकाचो परत एक फावट गौप्यस्फोट
पणजीः मेगा भरती वेळार (२०१९) एक आयएएस अधिकारी आनी बांदकाम खात्याच्या एका वरिश्ठ अभियंत्याक १७ कोटी ६८ लाख रुपया दिले. ६१३ उमेदवारां कडल्यान ते एकठांय केल्ले. एका वरिश्ठ मंत्र्याच्या सांगण्या वयल्यान हें काम केलां तशेंच हे विशींचे पुरावे लेगीत पुलिसां कडेन आसात, असो गंभीर आरोप पुजा नायकान केला.
आपाचे संघटक अमित पालेकार हे पुजा नायक पत्रकारां कडेन उलयतना हाजीर आशिल्ले. एका प्रादेशीक पक्षाच्या कार्यालयांत कामाक आसतना थंय पयशे घेवन नोकर्यो दिवप हें काम आपलें चालूच आसलें, अशें पुजान सांगलें.
२०१९ त मेगा भरती जाहीर जाल्ली तेन्ना दोगां अधिकाऱ्यांच्या संपर्कांत रावन तुवें ह्या नोकऱ्यां खातीर इतले- इतले पयशे घेवपाचे, अशें एका वरीश्ठ मंत्र्यान म्हाका स्पश्ट सांगिल्लें. हांवें सुमार ६१३ अर्ज १७.६८ कोटी पयशां सयत त्या दोगांय कडेन पावयल्यात. हे पयशे म्हाका परत मेळोवन दिवचे ही म्हजी मागणी आसा. कारण कोणाक नोकऱ्यो मेळूंक नात, ते घरा कडेन येवन त्रास करतात, अशें पुजान सांगलें.
हांवें पुलिसांक स्टेटमेंट दितना मंत्र्याचें न्हय, मात ह्या दोगांय अधिकार्यांचीं नांवां सांगिल्लीं. पर्वरे फ्लॅटांत हांवें हे पयशे त्या अधिकार्यांच्या हातांत दिल्यात. मात पुलीस आतां म्हणटात, थंयसर फ्लॅट ना तर आयएचएम ही शिक्षणीक संस्था आसा. मुख्यमंत्र्यांचो ह्या सगल्या प्रकरणांत कसलोच हात ना, अशेंय स्पश्टीकरण पुजान पत्रकारां कडेन उलयतना दिलें.
पयशे दिवन ८० जाणांक नोकरी
हांवें पयलीं ८० परस चड भुरग्यांक पयशे दिवन कामाक लायल्यात. मात २०१९ ते २०२२ मजगतीं मेगा नोकरी भरतेंत हांवें नोकरे खातीर पयशे घेतिल्ले तातूंतल्या एकाय उमेदवारांक नोकरी मेळूंक ना. आमची णव जाणांची टीम आसा आनी आमकां सगळ्यांक वांगडाच अटक जाल्ली. म्हजे वांगडा सत सांगपाक तांकां हांवें आपयिल्ली, मात तीं जिवाक भियेवन तयार नात. फकत म्हजेच १७ कोटी वसूल जावपाचे उरल्यात. आनीक कितले पयशे आसात ताची म्हाका कल्पना ना, असो गंभीर आरोप पुजान केला.
पुरावे पुलिसां कडेन
हे पयशे दिल्ल्याचे सगळे पुरावे म्हज्या मोबायलांत आशिल्ले. एका मोबायलांत दोन व्हीडीयो पसून आशिल्ले. तो मोबायल पयलींच दिवचले पुलीस स्टेशनांत म्हजे कडल्या जप्त केल्लो. मात दिवचल पुलिसांक मोबायला विशीं विचारले उपरांत तांणी सांगलें, तो मोबायला म्हाड्डोळ पुलिसांक धाडला. मात अजून मेरेन तो मोबायल म्हाका परत मेळूंक ना, असो दावो पुजान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
