भांगरभूंय | प्रतिनिधी
पयशे वाटावपा खातीर निर्णय; जमीन सोदपाक सुरवात
भांगरभूंय । प्रतिनिधी
पणजीः नियोजीत आयआयटी प्रकल्प सांगेच्यान परतून एकदां काणकोणां वचपाची शक्यताय आसा. जमनी खातीर लागपी पयसो वाटावपा खातीर सरकारान काणकोणांतली सरकारी आनी कोमुनिदादीची जमीन सोदपाक सुरवात केल्या, अशी म्हायती सरकारांतल्या सुत्रांनी शेनवारा ‘भांगरभूंय’ कडेन उलयतना दिली.
आयआयटी प्रकल्प सांगें म्हालांतल्या रिवण वाठारांत उबारपाचें निश्चीत जाले उपरांत दक्षीण गोंय जिल्होधिकाऱ्यान ते संबंदांतली अधिसुचोवणी लेगीत जारी केल्ली. अशें आसून लेगीत सरकारान पर्याय म्हूण सांगें आनी काणकोण ह्या दोन म्हालांतल्या चार जमनींची चाचपणी करपाक सुरवात केल्ली. शिक्षण सचीव प्रसाद लोलयेंकार आनी हेर अधिकाऱ्यांनी ह्या चार जमनींची पळोवणीय केल्या. तातूंतली काणकोणांतली सरकारी आनी कोमुनिदादीचे जमनीचो आयआयटी प्रकल्पा खातीर विचार चल्ला.
सघ्या रिवणांत जी जमीन निश्चीत केल्या, ते जमनीर खासगी रान वाठार आशिल्ल्यान ती संपादीत करपाक आडखळ येतली. तशेंच सरकारा कडेन लेगीत जमनी खातीर पयसो ना. ते खातीर सरकारी वा कोमुनिदाद जमनींचो सोद सरकारान चलयलां. काणकोण म्हालांत अशी जमीन आशिल्ल्यानूच सरकारान आयआयटी प्रकल्प सांगेंच्यान काणकोणां व्हरपाचो निर्णय घेतला, अशें सुत्रांनी सांगलें.
गोंयांतल्या नियोजीत आयआयटी प्रकल्पा वयल्यान फाटल्या कितल्याश्याच वर्सांच्यान वाद चलिल्लो. ते उपरांत कांय म्हयन्यां आदीं सरकारान आयआयटी खातीर रिवणाची जमीन निश्चीत केले उपरांत दक्षीण गोंय जिल्होधिकाऱ्यान थंयची सुमार 11 हजार चौखण मिटर जमीन आयआयटी खातीर संपादीत करपा संबंदांतली अधिसुचोवणी जारी केल्ली. दक्षीण गोंय जिल्होधिकारी अश्वीन चंद्रू हांणी जारी केल्ले अधिसुचोवणेंत आयआयटी प्रकल्पा खातीर रिवण- सांगेंची सर्वे नं. 168/1 तली 6,27,703 चौखण मिटर, सर्वे नं. 169/1 तली 3,79,500 चौखण मिटर, सर्वे नं. 169/2 तली 11,313 चौखण मिटर तशेंच रिवणांतली सर्वे नं. सर्वे नं. 169/3 तली 33,100 चौखण मिटर जमीन (भूसंपादन, पुनर्वसन आनी पुनर्वसन कायदो, 2013 तली भौशीक उद्देशा खातीर) ताब्यांत घेतले अशें नमूद केल्ले. हा जमीन नियोजीत आयआयटी प्रकल्प तशेंच हेर मुळाव्या सुविधां खातीर संपादीत करपाची शक्यताय आशिल्ल्याचेंय हे अधिसुचोवणेंत म्हणिल्लें. ताका लागून गोंय सरकाराच्या म्हत्वकांक्षी आयआयटी प्रकल्प अखेर सांगें म्हालांतल्या रिवण गांवांतूच उबो रावतलो, हाचेर म्होर लागिल्ली. पूण जमनी खातीर जावपी खर्च वाटावपाक सरकारान आयआयटी प्रकल्प रिवणांतल्यान काणकोणां व्हरपाचो निर्णय घेतिल्ल्यान खूब वर्सांच्यान पडून उरिल्लो हो प्रकल्प काणकोणां उबो जावपाची शक्यताय वाडल्या.
काणकोणकारांनी केल्लो विरोध
गोंय सरकारान सुरवातेकूच आयआयटी प्रकल्प काणकोण म्हालांत उबारपाचो निर्णय घेतिल्लो. पूण त्या वेळार काणकोणकारांनी त्या प्रकल्पाक खर विरोध केल्लो. ताका लागून सांगेंचो विचार सुरू जाल्लो. ते उपरांत परतून प्रकल्पा खातीर शेळ- मेळावलीची जमीन संपादीत करपाचे यत्न सरकारान सुरू केल्ले. पूण थंय लेगीत थळाव्या लोकांनी प्रकल्पाक विरोध केल्ल्यान प्रकल्प परतून सांग्यार उबारपाचो निर्णय घेतलो. प्रकल्पा खातीर सरकारान रिवणाची जमीन निश्चीत करून फुडली प्रक्रिया लेगीत सुरू केल्ली. पूण जमीन खरेदीचो खर्च वाटावपा खातीर सरकारान काणकोणां सरकारी जमनीचो सोद घेवपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
