भांगरभूंय | प्रतिनिधी
गोंयच्या लोकांनी पळे आयआयटीचीं फकणां मारल्यांत तितलीं आनीक कोणें मारल्यां आसतलीं काय? बाबडी आयआयटी ‘इल्लो जागो दिता व्हय जागो’ करीत गोंयभर भोंवता. आनी हें पळेतकूच आयआयटीचो फुडार कितें म्हणपाचो प्रश्न उबो जाता. सुरवेक शिक्षणीक हबाचीं सपनां पळोवपी काणकोण तिणें पळेलें. पूण थंयच्या लोकांक ती नाका जाली. काणकोणाक कित्याक कोण जाणा कांयच नाका जालां. तशे काणकोणचे लोक खूब हुशार. पूण एक रवींद्र भवन सोडल्यार तांणीं खंयच्याच प्रकल्पाक येवकार दिवंक ना. काणकोणां पयलीं एनआयटी येवची आसली. पूण थंय जाल्ल्या विरोधाक लागून कुंकळ्ळी पावली. उपरांत आयआयटी आयली तिकाय विरोध. आतांय येवंक सोदपी फिल्म सिटीकूय तांचो विरोध चल्लाच. आतां कुंकळी एनआयटीचो कारभार पळेत जाल्यार गोंयकारांक असल्या प्रकल्पांनी कसलोच लाव ना म्हणपाचें सगळ्यांक कळ्ळां. मागीर लोक तरी असल्या प्रकल्पाक कशे येवकार दितले?
उपरांत सत्तरीच्या बाबान आयआयटी आपले थंय व्हरपाचें सपन पळेलें. आतां सत्तरी म्हणली म्हणजे बाबा करता ती पूर्वदिशा हें थारलांच, पूण हांगाय विरोध जालो, सामको खर विरोध. पुलिसे वांगडा लटाफटी जाल्यो आनी लोकांक मारुय पडलो. तांचेर केसीय घाल्यो. पूण लोक फाटीं सरले नात. उरफाटें बाबाकूच फाटीं सरचें पडलें. उपरांत आयआयटीक सांगेचें सपन पडलें. सांगेच्या आमदारान तर तिका सांगेच मुक्कामाक व्हरपाचो हट्ट धरलो. ताणें आयआयटी खातीर आपली प्रतिश्टाच पणाक लायिल्ली म्हणल्यार जाता. पूण ताचेंय सपन फळादीक जावंक पावलें ना. तसो सत्तरीच्या बाबानूय हो प्रतिश्टेचो प्रश्न केल्लो, पूण उपरांत ताका ल्हवूच ‘यू टर्न’ घेवचें पडिल्लें. आतां परत एकदां आयआयटी काणकोण वता अशें कानार पडटालें, इतल्यान शिरोडेंच्या आमदारान तिका बेतोड्या-कोडार स्थानापन्न करपाचें थारायलें. शिरोडा मतदारसंघांत सुभाशभाऊन कांय शिक्षणीक कॉलेजी सुरू करून शिरोड्याक शिक्षणीक हब केलांच, तातूंत आयआयटीची भर पडिल्ली जाल्यार आनीक बरें जावपाचें. पूण हांगच्याय लोकांनी विरोध सुरू केलो. आनी प्रकल्प रद्द करून घेतलो.
गोंयच्या लोकांक आयआयटी म्हणल्यार हावको कसो कित्याक दिसता तेंच कळना. एक तर सरकार खंयतरी चुकता वा हे जागे सुचोवपी लोकप्रतिनिधी लोकांक समजावंक उणे पडटात. आतां कोडार जर सरकार कोणाचीच जमीन घेवपा नाशिल्लें आनी जी जमीन घेवपाची सुचोवणी जाल्ली ती खडकाळ जमीन जाल्यार ते जमनीक विरोध कित्याक जावचो? हांगचो आमदार म्हणटा ह्या प्रकल्पाचो लोकांक फायदो जावपाचो. तांकां रोजगार मेळपाचो? कसलो फायदो, कसलो रोजगार हें लोकांक मेळून तांकां पट्टा अशें सांगूक जमलें ना? कुंकळेचे एनआयटीन प्यून आनी कँटीन चलोवपी तरी थळावे आसात? कसो विश्वास दवरचो लोकांनी तुमच्या उलोवपाचेर सांगात पळोवया.
सरकाराक खर्यानीच आयआयटी जाल्ली जाय काय आमचे कडेन जमीन ना म्हणून सांगून एक बरो प्रकल्प गोंयच्यान धांवडावपाचो आसा? जमीन ना हें सांगपाक सरकाराक लज दिसूंक जाय. सरकार एकेवटेन खाजगी विद्यापिठांक जमनी दिता. थंय लोकांनी विरोध केल्यार तो कानामनार घेनात. आनी कोणेय आमच्या वाठारांत आयआयटी नाका म्हणली म्हणजे आपलीं मतां वाचोवंक प्रकल्प रद्द करून फाटीं सरता. हालींच पारूल विद्यापिठाचें उकतावन जालें. एक खाजगी विद्यापीठ, जालें बांदून. कोणे विरोध केलो? ना! हांगाय म्हणून थळाव्यांक वा गोंयकारांक कसलोच लाव जावपाचो ना. हांगा जे भुरगे शिकतले तेय हेर कडलेच. पूण ह्या प्रकल्पाक कोणेच विरोध केलो ना. तांकां जाय ती जमीन मेळ्ळी आनी विद्यापिठ सुरूय जालें. अशें जर जावं येता जाल्यार आयआयटीक विरोध कित्याक?
विरोध जाय ना अश्यो सुवातो आसात न्ही? मागीर सरकाराक अश्यो सुवातो दिसनात काय तांकां विरोध जाता थंयच पावल घालूंक जाय? सरकाराक खरें म्हणल्यार नवे सुवातीचो सोद घेवपाची गरजूच ना. सरकारा कडेन आशिल्ल्या जमनीचेरूच आयआयटी उबी करूंक येता. बेतलांत गोंय उद्योगीक विकास महामंडळाची जागा जायतीं वर्सां तशीच पडून आसा. महामंडळा कडल्यान ही जमीन घेवन ती आयआयटीक दिवंक जायना? फोंड्या केरी पठाराचेरूय महामंडळाची जागा आसा. हांगा प्रदुशण करपी इंडस्ट्री नाका म्हणून लोक विरोध करताले. आयआयटी काय प्रदुशण करची ना. मागीर हे जमनीचो विचार सरकार कित्याक करिना? पिकावळ दिवपी जमीन सरकार घेता म्हणून लोक विरोध करतात हें समजूं येता. पूण ह्या जमनींचें काय तशें ना. ह्यो जमनी सरकारान घेतल्यात आनी कसलेंच उत्पन्न मेळनासतना त्यो पडून आसात. सरकारान हांगा थंय जमनी सोदिनासतना हांतलीच एकादी जमीन आयआयटीक दिवची आनी आयआयटीचो प्रश्न मेकळो करचो. आयआयटीचो फुडार थारायतले जाल्यार सरकाराक बेगीन विचार करून ताचेर कितें तरी तोडगो काडचोच पडटलो. आनी हें करतनाच ह्या प्रकल्पांनी थळाव्यांक काम मेळटलें हाचोय विचार करचो पडटलो. गोंयच्यो जमनी जेन्ना कसल्याय प्रकल्पाक दितात तेन्ना तांतल्यान थळाव्यांक लाव मेळोवन दिवप गरजेचें. थळाव्यांक जर काम मेळत तरुच तांकां तो प्रकल्प आपलोसो दिसतलो. नासल्यार विरोधाक फुडो करचोच पडटलो.
एनआयटी वरी सगळो स्टाफ जर भायलोच भरलो जाल्यार तो प्रकल्प आमचो अशें कशें दिसपाचें? थंय शिकोवपी प्रोफेसरांचें समजूं येता. ना आमचे कडेन, पूण सारण मारूंक आनी हे वटेंतल्यो फायली ते वटेन पावोवपाचें काम करपीय कोण नात? हांकां रांदून वाडपी वा हांगचें कँटीन चलोवपीय गोंयकार मेळनात? ह्या संस्थांनी कसलेंय काम करपाक जर एकूय गोंयकार मेळना जाल्यार लाखांनी मिटर जमीन वगडावन गोंयांक फायदो कितें? कित्याक जाय असले प्रकल्प आमकां? भायल्यांचींच पोटां भरपाक? हाचेरूय विचार जावचो.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
