भांगरभूंय | प्रतिनिधी
गोंयचे आयआयटीक साडेसाती लागल्या आसतली. पयलीं मेळावली, मागीर काणकोण, उपरांत सांगें, आतां कोडार गोंयांत तिका खंयूच जागो मेळना. विरोधकांच्या मतान ‘तांची शेतवड, पोरसूं, बागायतीच्या आड आयआयटी येता’, तर समर्थक म्हणटात, ‘जंय कुस्कुटभर पसून पीक येना, थंय आयआयटी उबारतले. गोंयच्या शेंकड्यांनी विद्यार्थ्यांक ताचो लाव जातलो. प्रत्यक्ष, अप्रत्यक्ष रोजगार मेळटलो, तो वेगळो…’ आतां कांय विरोधी फुडारी म्हणपाक लागल्यात, ‘आयआयटी कॅम्पसाक जाय तितलो जागो गोंयांत ना. देखून तिका जागो दिवप शक्य जावचें ना, अशें केंद्र सरकाराक कळोवचें.’ आतां आयआयटीक दुसरे कडेन जागो सोदपाचो यत्न जाता, काय ती फर्मागुडयेर आसा थंयच चलता, तें पळोवपाचें. सरकारान 50 वर्सां पयलीं एके कंपनीक वास्को दिल्ल्या जाग्याचेर ती जावची अशें थोड्यांक दिसता.
कोडार आयआयटी जातली अशी घोशणा जाली तेन्ना थळावे अस्वस्थ जाले. तांणी विरोध केलो. शेतां, भाटां, पोरसांचेर परिणाम जातलो, अशें म्हणलें, तर ती जाता, थंय कोणूच पीक घेनात, ती पडीक जमीन अशें सरकाराचें म्हणणे. गांवकारांच्या विरोधाक लागून आयआयटी कॅम्पस रद्द केला, अशें काल जाहीर केलां. कोडारच्या कोमुनिदादीची 19 लाख चौखण मिटर जमीन आसा. ताचेर हो कॅम्पस उबो जावपाचो. सगलेच कडेन कित्याक विरोध जाता, हाचेर विचार जावंक जाय. गोंय हें शिक्षणाचें केंद्र करतलो जाल्यार हांगा आयआयटी जावप गरजेचें, हें लोकांक पटोवन दिवपांत अपेस आयलां, हें आतां मेरेनच्या घडणुकां वयल्यान दिसता.
केंद्र सरकार आयआयटी कॅम्पसा खातीर 500 ते 600 एकर जमीन सुचयता. हालीं तेंपार तो आंवाठ 300 ते 400 एकरांचेर आयला. कोडाराची ती जमीन 470 एकर आसा. आयआयटींत कितले विद्यार्थी शिकतात? मुंबय 13 हजार आनी मद्रास आयआयटींत 10 हजार. सध्या देशांत 23 आयआयटी आसात. पयलीं सात आशिल्ल्यो, पूण 2008 आनी 2015 उपरांत तातूंत वाड जाली. 1963 मेरेन देशांत चार आयआयटी आशिल्ल्यो. 1950 त खड्गपूर (अस्तंत बंगाल) आयआयटी सुरू जाली. ती 2100 एकरांत आसा. म्हणल्यार एक संस्थानूच कशें. आयआयटीक व्हडलीं हाॅस्टेलां, कर्मचारी वर्गांक क्वाॅटर्स, मैदानां, प्रयोगशाळा, वर्कशाॅप्स लागतात. फुडाराक ह्या प्रकल्पाचो विस्तारुय करचो पडटा. चड जमीन आसा थंय त्यो उबारल्यात. धाकटुल्यो गोंयांत आयआयटी कॅम्पसाक दिवपाक व्हडली जमीन सोदची पडटली. कारण जमनी, दोंगर, रानां पयलींच खपल्यांत. आतां इतली व्हडली जमीन मेळप मुश्कील. हेर राज्यांनीय हीच समस्या आसतली, ताका लागून ‘काॅम्पॅक्ट कॅम्पस’ ही संकल्पना संवसाराभर रुढ जावपाक लागल्या. देडशें एकरांचेर देशीच न्हय, तर आंतरराष्ट्रीय शिक्षण संस्था चलतात. म्हणटकच अत्याधुनिक शिक्षणीक साधन सुविधा स्विकारून आयआयटी कॅम्पस उबारपाक मेळटा जाल्यार पळोवपाक जाय. देखीक मैदानाक जागो आनी चारुय कोनशांक 10- 10 मजल्यांच्यो चार इमारती उबारप. तातूंत आयआयटीचें हाॅस्टेल, कर्मचारी- शिक्षकांक रावपाक फ्लॅट, वाचपघर, प्रयोगशाळा आनी हेर गजाली. हें सगलें उण्यांत उणी जमीन वापरूंन करुं येता? एक एकर म्हणल्यार 4046.85 चौ. मिटर वाठार.
आयआयटींत शिकिल्ले कितले गोंयकार आसात, तातूंतले कितले भारतांत काम, उद्देग, वेवसाय करतात, ताचो आंकडो पळोवचो पडटलो. सध्या गोंयांत उच्च शिक्षण दिवपी भायल्या वेवस्थापनाच्यो कितल्यो संस्था आसात, थंय कितले गोंयकार शिकतात, उपरांत कितले देशा भायर वतात, ताचोय नियाळ जाय. शिक्षणाचो राज्याक, देशाक फायदो जावंक नाका?
आयआयटी कॅम्पस जाल्यार रोजगार, तंत्रज्ञान, शिक्षणाचो दर्जो वाडटलो? शेती, पर्यावरण, जमनीचेर हावळ येतली? मता- मतांचो शिगमो चालू आसा आयआयटी फाटल्यान लागिल्ली ही साडेसाती सुट्टली काय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
