भांगरभूंय | प्रतिनिधी
आयआयटी प्रकल्प गोंयां खातीर फायद्याचो
पणजी : आयआयटी सारकिल्ल्या राष्ट्रीय हिताच्या प्रकल्पाक लोकांनी ओगीच विरोध करचो न्हय. आयआयटीक विरोध कित्याक, तें विरोध करप्यांनी म्हाका सांगचें. आयआयटी प्रकल्प गोंयां खातीर खूब फायद्याचो थारतलो. लोकांनी विरोधा खातीर विरोध करचो न्हयअसो उलो मुख्यमंत्री डॉ. प्रमोद सावंत हांणी मारलो.
आयआयटी खातीर बेतोडा पंचायत वाठारांत कोडारचे सुवातेचो विचार करतात. कोमुनिदादीची सुवात घेवपाची प्रक्रीया सुरू आसतना ग्रामस्थांनी सभा घेवन प्रकल्पाक विरोध केलो. आतां मेरेन चडश्या सुवातांचेर निवड जाल्ल्या सुवातांक ग्रामस्थांनी खर विरोध केला. हाका लागून आयआयटी खातीर कायमचो कॅम्पस उबारप सरकाराक शक्य जावंक ना.
कोणें तरी फूस लायिल्ल्यान आयआयटीक विरोध जाता. कांय लोकांक राष्ट्रीय हिताचे प्रकल्प गोंयांत जाल्ले नाकात. १०० टक्के साक्षरता आशिल्ल्या राज्यान आयआयटीक येवकार दिवंक जाय. आयआयटीचो गोंयांक लाव जातलो. राज्यांतले १० ते १२ विद्यार्थी आयज विवीध आयआयटींत शिक्षण घेतात. सुर्लाच्या एका विद्यार्थ्याची छत्तीसगड आयआयटींत निवड जाल्या. वेल्लोरा भेट दिली तेन्ना थंयच्या महाविद्यालयांत म्हाका १० ते १२ गोंयचे विद्यार्थी मेळ्ळे, अशें मुख्यमंत्र्यानी आयआयटीचें समर्थन करतना म्हणलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
