भांगरभूंय | प्रतिनिधी
विरोधी पक्षांनी सुवात वांटपाच्या चर्चे खातीर मुखार सरचें
पणजी : आम आदमी पक्ष भाजपा आड तयार आशिल्ल्या सगल्या पक्षांक येवकारता. विधानसभा वेंचणूक देड वर्साचेर येवन रावल्या. हाका लागून फुडल्या कांय दिसांनीच सुवात वाटावपा विशीं चर्चा जावपाक जाय. हाका लागून कॉंग्रेसी सयत राज्यांतल्या सगल्या विरोधी पक्षांनी मुखार सरून चर्चा करची, असो उलो आप प्रदेशाध्यक्ष अमित पालेकार हांणी मारलो.
शुक्रारा पणजे जाल्ले पत्रकार परिशदेंत पालेकार उलयताले. ह्या वेळार तांचे सयत वाल्मीकी नायक हाजीर आशिल्ले.
लोकसभा वेंचणुकेंत आपान कॉंग्रेस उमेदवारां खातीर प्रचार केल्लो. मात कॉंग्रसीन सदांच आमचो विस्वासघात केला. हाका लागूनच आमी कॉंग्रेसी वांगडा सहकार्य करचें न्हय असो निर्णय घेतला. मात, आमची भाजप आडची लढाय ही सामान्य गोंयकारां खातीर आसा. हे लढायेंत जर कोण आमची साथ दिवपाक सोदता जाल्यार तांणी मुखार येवचें. कॉंग्रेस पक्षान तांच्या केंद्रीय फुडार्यांक आपोवचें. आमी आमच्या फुडार्यांक आपयतां. आमी चर्चा करपाक तयार आसात, अशें पालेकार हांणी मुखार म्हणलें.
कॉंग्रेस फुडारी वेंचणुकेक आजूनय देड वर्स आशिल्ल्याचें सांगतात. तांचे उमेदवार वेंचणुके पयलीं पंदरा दीस थारायतात. आप फाटल्या तीन वर्सां सावन वेंचणुकेची तयारी करता. फुडलें देड वर्स तयारी चालूच उरतली. हाका लागून कॉंग्रेसीक एकठांय येवपाचें आसल्यार तांणी सुवात वाटपाचेर आतांच चर्चा करपाक जाय. तांणी गोंयांक केंद्रीय फुडार्यां कडल्यान आदेश येता अशे आरोप करचे न्हय. आमकां भाजपाक हारोवपाचें आसा. हाका लागून जें कितें गरजेचें आसा तें आमी करतले.
भाजपाचे गुंडगिरी आड जागृताय
राज्यांत भाजप सरकाराची गुंडगिरी वाडल्या. कायदो आनी सुवेवस्था हाल्ल्या. सरकारा आड उलोवप्यांक धमकायतात. हाचे आड आपा वतीन ‘गोंयांत भाजपाची गुंडागिरी नाका’ अभियान सुरू करतले. हाचे वरवीं गांवांगांवांनी वचून लोकां मदीं जागृताय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
