भांगरभूंय | प्रतिनिधी
आम आदमी हे दोन शब्द कानार पडचे आनी आपल्या दोळ्यां सामकार अरविंद केजरीवाल हांची प्रतिमा उबी रावची, अशें समीकरण फाटल्या आठ- धा वर्सांत तयार जाल्ल्याचें आमी सगळेच पळयत आयल्यात. केजरीवाल हांचो आम आदमी पक्ष सध्या देशांत सगळे कडेन आपली सत्ता स्थापन करपा खातीर नेटान वता अशें चित्र काल पयर मेरेन गुजरातांत विधानसभा वेंचणुको जाल्या तेन्नाय आमी पळयलें. गुजरातांतले वेंचणुका उपरांत जाल्यार ह्या पक्षाक राष्ट्रीय पक्षाचो दर्जो मेळिल्ल्यान आम आदमी पक्षाची तुफान घोडदौड भाजपाक लेगीत आडावपाक जातली कांय, असो दुबाव जायत्या जाणाक येवपाक लागलो. मात देव दिता आनी कर्म व्हरता अशीच अवस्था फाटल्या कांय म्हयन्यां भितर ‘आप ‘ ची जाल्या अशें स्पश्ट दिसता. राष्ट्रीय पांवड्यार अखील भारतीय काँग्रेस पक्षाची सुवात घेवपा खातीर आम आदमी पार्टी सज्ज आशिल्ल्याचें वातावरण तयार जाल्लें. ताका सुरूंग लावपाचें काम अरविंद केजरीवाल आनी तांच्या वांगड्यांनी केलां आनी ह्या पक्षाचें अस्तित्वूच धोक्यांत येवपाचे संकेत मेळटात.
आम आदमी पक्षान फाटल्या आठ -धा वर्सांत मेहनत आनी कश्टांनी तयार केल्ली आपली प्रतिमा आयज जायत्या कारणांक लागून तुटून- फुटून तिचो चुरो जाला. दिल्लींत मुख्यमंत्री केजरीवाल हांणी आपल्या अधिकृत निवासाच्या नूतनीकरणाचेर सुमार 40- 50 कोटी रुपये खर्च करून सामके मेहनतीन तयार केल्ले आपले प्रतिमेचेर अक्षरशा उदक ओतलां. सोरो आनी हेर घोटाळ्यांक लागून पयलींच बदनाम जाल्ल्या आम आदमी पक्षाक अरविंद केजरीवाल हांणी आपल्या सरकारी बंगल्याच्या नूतनीकरणा खातीर केल्ल्या 45 कोटीं रुपयांच्या खर्चाचें समर्थन खंयचेच परिस्थितींत सध्या करपाक जायनाशिल्ल्यान हो पक्ष खऱ्यांनीच साल्वार जावपाक शकतलो काय कितें, होच एक व्हड प्रश्न आसा.
लोकसभेच्यो वेंचणुको आतां फकत 285 दिसांचेर आयल्यात. कर्नाटक आनी हेर तीन – चार राज्यांच्या विधानसभेच्या वेंचणुकांच्यो तारखो लागिल्ल्यो आसतना आम आदमी पक्षा कडल्यान लोकांच्यो खूब अपेक्षा आशिल्ल्यो, मात हो पक्ष सध्या खऱ्या अर्थान भ्रश्ट काँग्रेसीची सुवात बळकावपाक खातीर वावुरपाक जाय अशें तरेन वागपाक लागला अशें ताचे प्रत्यक्ष कृतींतल्यान दिसपाक लागलां आनी वट्ट फुडाराचे नदरेन तांकां तें मारक थारपाक शकता. दिल्लीचे नायब राज्यपाल सक्सेना हांणी ह्या प्रकरणाची दखल घेवंक नाशिल्ली जाल्यार तें एक अजाप थारपाचें. मात ताचे वयल्यान आम आदमीच्या फुडाऱ्यांनी ज्यो आड्डी मारपाक सुरवात केल्या तें पळयल्यार त्या पक्षांत हातूंत बरेंच कितें तरी लिपोवपाचें आसा हेंच सिद्ध जाता. ना जल्यार चवकशेचें आव्हान स्विकारून बंगल्याच्या वेव्हारांतली सगळीं कागदपत्रां आपूण जावंन राज्यपालां सामकार दवरपाचो मार्ग तांणी आपणायलो आसतालो. पूण तशें कितें जाल्लें दिसना. ताका लागून अरविंद केजरीवाल आनी तांच्या पक्षा सामकार आशिल्ल्यो आडमेळीं वाडटात अशें दिसून येता.
सोऱ्या घोटाळ्यांत केजरीवाल हांच्या सरकारांतले उपमुख्यमंत्री सिसोदिया सध्या बंदखणींत आसतना आनी ह्या घोटाळ्याचे चवकशेचे धागेदोरेय केजरीवाल हांचे मेरेन पाविल्ल्याचें स्पश्टपणान दिसून येताशिल्ल्यान आडमेळ्यांचो दोंगरच ह्या पक्षा सामकार आतां उबो रावला आनी हें सगळें हुबून विधानसभा वा लोकसभा वेंचणुकेंत भाजपा सारक्या पक्षाक आव्हान दिवप तांचे खातीर आतां फकत कुस्तारूच थारपाक शकता.
अरविंद केजरीवाल हे भ्रश्टाचारी विरोधी जन आंदोलनांतल्यान उदयाक आयिल्लें नेतृत्व आशिल्ल्यान देशांतल्या लोकांच्या तांचे कडल्यान बऱ्योच अपेक्षा आशिल्ल्यो. मात फाटल्या तीन- चार वर्सांत तांचोय पक्ष लेगीत काँग्रेसान आपणायल्ल्या वाटेन वचपाक लागल्ल्याचें दुर्दैवान लोकांक दिसपाक लागलां. भ्रश्टाचाराविणे सुशासन दिवक सामकें कुस्तार आसा हेंच अरविंद केजरीवाल हांणी जायत्या घोटाळ्यांतल्यान दाखोवन दिलां. मुख्यमंत्र्याच्या ‘ शीशमहल ‘ ह्या अधिकृत बंगल्याचें 45 कोटी रुपया खर्च करून केल्लें नूतनीकरण म्हणल्यार ह्या सगळ्यांचेर चडयल्लो कळस म्हणचो पडटलो. अरविंद केजरीवाल हांणी मु्ख्यमंत्रीपदाची सूत्रां हातांत घेतना घेतिल्लो सोपूत आयज जायत्या जाणांक जश्याचो तसो याद आसा. मागीर आठ- धा वर्सांत अशें कितें घडलें की ताका आनी तांच्या घरच्यांक राजमहालांत रावपाची इत्सा कित्याक जावची आनी तें करतना अशे कारनामे तांचे कडल्यान जावचे आनी ताचें समर्थन लेगीत कोणाक करपाक मेळचें ना. खुद्द अरविंद केजरीवाल सध्या हाचेर एक उतर उलोवपाचे मनस्थितींत दिसनात. तांच्या मंत्रिमंडळांतले एक- दोन वांगडी वा पक्षाचो एकाद्रो म्हणयारो आपले तांकी प्रमाण ह्या प्रकरणांत सारवासावर करता तरी तें कोणाक पटपाचें ना. स्वता भारतीय महसूल सेवेंतलो सर्वज्ञ आशिल्ल्या सारको देशाक धडो दिवपी अरविंद केजरीवाल 45 कोटींच्या नूतनीकरणाचें काम करपा खातीर जाहीर निविदा काडपाक सोदिनात तेन्नाच त्या वेव्हारांत लिपिल्लो भ्रश्टाचार खूब गजाली सांगता.
मुख्यमंत्री केजरीवाल हांचो पन्नाशेक कोटींचो शीशमहल सध्या संवसारांत सगळे कडेन पावला आनी ताचेर चर्चाय जाता. ह्या बंगल्यांतले फकत सजावटीचेर इकरा कोटी रुपये खर्च केल्ल्यान जायत्या जाणांक केजरीवाल हांचो हो बंगलो पळोवपाची इत्सा जाल्यार तातूंत अजाप दिसचें ना. फकत वीज उपकरणांचेर अडेज -तीन कोटी रुपये खर्च जाल्ल्याची म्हायती सामकार आयल्या. आम आदमीचें किचन तर देडेक कोटीचें आशिल्ल्यान तेंय आम जनते खातीर उक्तें दवरपाची मागणी कोणूय करतलो. धा, इकरा लाखांचे धा स्मार्ट टीव्ही हेय देशांतले सगल्यांत ‘अमीर’ अशा आम आदमी मुख्यमंत्र्याच्या बंगल्याचें आनीक एक आकर्शण आसा. तेच वांगडा हे टीव्ही बाजारांत दरेकी साडेचार- पांच लाखांत मेळटात अशें सांगतात. मागीर ह्या टीव्हीचें वेगळेंपण कितें आसत हें कळपाक मात मार्ग ना. देरका टीव्ही फाटल्यान चार तें पांच लाखाचें मार्जिन नक्की कोणाच्या बोल्सांत गेलां होय लेगीत एक चवकशेचो विशय थारचो. नायब राज्यपाल सक्सेना हांणी ह्या प्रकरणांत मुख्य सचिवाक चवकशेचो आदेश दिलो आनी आतां ताचेर न्यायालयांत दाद मागपाची भाशा आम आदमी पक्षान करची हातूंत ‘सगळी दाळ काळी आसतली ‘ असो निश्कर्श कोणेय काडल्यार तो चूक म्हणपाक जावचें ना.
देशाचे राजधानींत कामा खातीर वचपी दरेका साबार व्यक्तीक आयज एका अमीर आम आदमीचो बंगलो पळोवपाची इत्सा जालीच जाल्यार हो बंगलो उक्तो दवरपाची मागणी लागींच्या फुडारांत जावपाक शकता. आम आदमी पक्षाची प्रतिमा दिसान दीस चडूच खतावल्ली जावपाक लागिल्ल्यान ह्या पक्षा कडेन आकर्शीत जाल्लो मतदार आतां परत काँग्रेस वा भाजपा कडेन वतलो हाची जाप मात वर्स भरांत निश्चीत मेळपाक शकतली. 45 कोटींचो हो बंगलो निमाणे ‘आप’चें राष्ट्रीय यादस्तीक थारचें न्हय अशें आतां जायत्या जाणाक मना सावन दिसता…
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
