भांगरभूंय | प्रतिनिधी
भांगरभूंय । प्रतिनिधी
पणजीः भारतीय वेंचणूक आयोगान आम आदमी पक्षाक गोंय राज्यांत राज्य पक्ष म्हणून अधिकृत मान्यताय दिल्या. पक्षाची गोंय प्रभारी आनी दिल्लीची आमदार आतिशी हिणे सोमाराक ही म्हायती दिली. तशें आयोगान आपाक कळयलां.
2012 वर्सा आम आदमी पक्षान गोंयांत गोंय विधानसभा वेंचणूक लडयल्ली. मात त्या वेळार तांचो एकूय उमेदवार वेंचून येवपाक शकलो ना. 2017चे विधानसभा वेंचणुकेंत बाणावली आनी वेळ्ळी मतदारसंघात ताच्या उमेदवारांनी जैत मेळोवन गोंय विधानसभेंत प्रवेश केलो. पक्षाक गोंय राज्य पक्ष म्हणून मान्यताय मेळ्ळे खातीर आतिशी हिणे पक्षाचे थळावे फुडारी आनी वावुरप्यांक परबीं भेटयल्यांत
दिल्लीचो मुख्यमंत्री आनी पक्षाचे संयोजक अरविंद केजरीवाल हांच्या प्रामाणीक राजकारणाक तेंको दिल्ले खातीर आनी दरेका वेंचणुकेंत पक्षाचे कामगिरींत सुदारणा जाल्ले खातीर आमी गोंयकाराचें उपकारी आसात. गोंयची अस्मिताय, संस्कृती आनी पर्यावरण राखून दवोरपा खातीर आमी लोकांक दिल्ल्या आस्वासनाक पक्ष पाळो दितलो अशें उतर तिणे दिलां.
पक्षाचे गोंय प्रदेश अध्यक्ष अॅड अमीत पालेकार हांणी वेंचणूक आयोगाच्या निर्णयाक येवकार दिला. गोंयांत पक्षाचें काम वाडोवपाक आमका उर्बां मेळटलीं अशें तांणी म्हणलां. दिल्ली आनी पंजाबातले लोक सुशासनाची खोस अणभवतात हें गोयकारांनी पळयलां. हालींच जाल्ले विधानसभा वेंचणुकेंत आमचे क्रुझ सिल्वा आनी कॅप्टन व्हेन्झी व्हिएगश आमदार म्हणून वेंचून आयल्यात. हाचे फुडें गोंयकार आम आदमी पक्षाक सरकार स्थापन करपा खातीर भोवमत दितले असो हावेस पालेकार हांणी उक्तायला.
बिहारांत नितीश कुमार हांचो जेडी (यू) आनी कर्नाटकांत एचडी देवेगौडा हांच्या जेडी (एस) हांचे उपरांत केजरीवाल हांच्या फुडारपणा सकयल्लो आम आदमी हो राज्य पक्ष म्हणून वेंचणूक आयोगाची मान्यताय मेळिल्लो तिसरो राजकी पक्ष थराला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
