आमी सादूर रावुया

भांगरभूंय | प्रतिनिधी

झुजाक लागून इंधनाचें संकश्ट आयलां तरी भारतान सादूर रावंक जाय.

ईराण, इझ्रायल आनी अमेरिका हांचे मदीं झूज पेटलां तें अजून पालोवंक ना. ‘इराणांत आतां कांयच उरूंक ना, तांचें सगलेंच आमी उध्वस्त केलां,’ अशें संवसाराक संकश्टांत धुकलपी फुडाऱ्यांचे फुडारी डोनाल्ड ट्रम्प म्हणटात. तर इराणाचे नवे फुडारी मुजतबा खामेनी हांणी आपल्या पयल्या जाहीर भाशणांत म्हणलां, ‘आखाती देशांतले अमेरिकेचे लश्करी तळ बंद जायनात, तो मेरेन हल्ले चालूच उरतले. सध्याचे परिस्थितींत होर्मुझची वाट पुराय उक्ती करचे नात’. पूण, इराणाचे भुंये वयल्यान हल्लो जायना, तो मेरेन आमी शेजारी देशांचे उदका येरादारीक लक्ष्य करचे नात, अशें आश्वासनूय दिलां. मात भोवतेक बोटींनी स्वता जावन वचप बंद केलां. ताकाच लागून ही गॅसाची टंचाय. संवसारांतलें 20 टक्के तेल आखातांतल्या होर्मुझ मार्गा वयल्यान वता. विशेश म्हणल्यार सामको तणाव आसून लेगीत आंतरराष्ट्रीय वेपारा खातीर तो बंद करूंक ना. हो मार्ग पुरायपणान इराणाच्या ताब्यांत आसा. म्हणटकच येरादारी चालू दवरपाचो निर्णय इराणाचोच म्हणचो पडटलो.
भारताक लागता, तातूंतलो 60 टक्के (40 टक्के आमी तयार करतात.) एलपीजी आयात करतात. भितरलो 90 टक्के होर्मुझ उदका मार्गांतल्यान येता. आतां गल्फ पेटिल्ल्यान देशांतर्गत उत्पादन वाडोवपाचे आनी पुरवण सुरळीत करपाचे यत्न केंद्र सरकार करता. दरदिसा 50 लाख सिलिंडर बाजारांत येतात. सरकारान रिफायनरींक एलपीजी उत्पादन वाडोवपाचे आदेश दिल्यात. घरगुती गॅसाचें उत्पादन 25 वयल्यान 28 टक्क्यांचेर गेलां. आमी ‘गॅसी’र आसले तरी देशांत तसो सिलिंडरांचो उणाव ना. मात वेवसायीक गॅसाचेर निर्बंध आयल्यात. मड्याचे टाळवे वयलें लोणी खावप, असो एक वाक्प्रचार आसा. तें चल्लां. कांय उत्पादकांनी, वितरकांनी सिलिंडरांचो सांठो करून दवरला. ते मागीर ब्लॅकान भायर सरतले.
ह्या संकश्टांत भारताक थाकाय दिवपी खबर म्हणल्यार होर्मुझांतल्यान भारतीय बोटींक इराणान दाखयिल्लो पाचवो बावटो. हाचेर सोशल मिडियाचेर चर्चा रंगल्या. इराण आमचो आदलो इश्ट, इराणाचे आदले अध्यक्ष खोमेनी (1979- 1989) हांचे पणजे- खापर पणजे उत्तर प्रदेशांतले, केंद्र सरकाराची येसस्वी उलोवणी, खांकनवाळ जाल्ल्यान इराणाक पयसो जाय, भारत तांचें सगल्यांत व्हडलें गिरायक, कांय इराणी खलाशांक एकदां भारतान मजत केल्ली…. साबार तर्क- वितर्क. पूण कोणाच्या पुण्यायेन जायना तेल येता. भारतीय तिरंगो लावन येरादारी करपी टँकर बोटींक इराणान परवानगी दिल्या. गुपचूप तिरंगो लावन दुसरो कोण तरी बोटी सोडचोना वा इझ्रायल, अमेरिकेक मजत करचोना, इतलें मात पळोवचें पडटलें. कारण, ह्या दोन देशांच्या फायद्या खातीर जावपी येरादारी हांगाच्यान सुरक्षीत वचपाक दिवचे नात, अशी शिटकावणी इराणान दिल्या. झुजाक लागून इंधनाचें संकश्ट आयलां तरी भारतान सादूर रावंक जाय. इंधनाची बचत, काटकसर, पर्यायी इंधनाचो वापर करपाक जाय. इंडक्शन शेगडी, सौर उर्जा चड वापरूं येता. सध्या कांय शारांनी उद्देग आनी हाॅटेल वेवसायाचेर परिणाम जाला. फावो तितलो इंधन सांठो आसा, अशी घोशणा सरकारान केल्या तरी गॅस सिलिंडर बूक करपाक गर्दी जावंक लागल्या. चार वेवसायीक सिलिंडरांची नोंदणी करप्याक एकूच मेळपाक लागला. घरगुती सिलिंडराची बुकींग करपाक रांको लागल्यात. तांचें आनी इंधिनाचेंय मोल वाडलां. देखून परिस्थिती भिवपा सारकी ना, ह्या खबरां परस ती तशी प्रत्यक्ष दिसपाक जाय. पर्यायी देशांतल्यान तेल, गॅसाची आयात वाडोवपाचो हो वेळ.
इराण आनी अमेरिका हांची चर्चा जाल्यार झूज बंद जावं येता. मात दुखावल्ल्या इराणाक समजावप कठीण. संयुक्त राष्ट्रांनी मध्यस्थी करची. दर्या मार्गाची सुरक्षा, अणू कार्यावळी हांचेर परत कबलाती जावच्यो. कितेंय करचें, पूण झूज थांबोवचें. ते विशींचो अणभव आशिल्ल्यांनी आतां मुखार सरल्यार बरें.