भांगरभूंय | प्रतिनिधी
भावंडांनो,
ह्या सप्तकांत तुमचे निकाल लागतले. तुमी वर्सभर कितले तळमळीन आनी कळकळीन शिकल्यात ताचे प्रमाण तुमकां कळटलें. तुमकां तुमचे परिक्षेंत सरळ पास करून फुडल्या वर्गांत धाडल्यात म्हणटकच कांय जाणांक निकाला विशीं हुस्कोय नासता. पुणून भावंडांनो तशें निकाला संबंदात बेसावध रावप योग्य न्हय. भावंडांनो ती पिशेंपणां करूं नाकात आं.. तुमचें नवें शिक्षणीक धोरण फुडल्या म्हयन्या सावन खरे अर्थान सुरू जातलें. म्हणटकच तुमी मात्शी गंभीर जावप तितलेंच गरजेचें आसा. भावंडांनो, फाटल्या अभ्यासा परस आतां ह्या नव्या वर्सा तुमच्या अभ्यासाचो दर्जो, पावंडो वाडला. देखून आतां नव्या वर्गांत पावल दवरतना नव्या अभ्यासप्रमाक सुरवात करतना तुमी जागृत रावंक जाय. अभ्यासाचो पावंडो वाडिल्ल्यान तुमी आतां चड कश्ट घेवपाची तयारी दवरूंक जाय. तुमी सुरवेक सावनूच मेहनत घेवपाची तयारी दवरली जाल्यार तुमचो फुडले शिक्षणीत वर्सांतलो एकेक दीस चिंता विरयत, भंयविरयत जावन उमेदींत, उमळशिकेंत मुखार शिकूंक पावतली. एकेक वर्गांतल्यान बरे गुण मेळयत मुखार वचप म्हणल्यारच भावंडांनो तुमी तुमचे जिणेची बुनयाद एकेक चिरो फातर लावन घटमुट केल्लेवरी जातलो.
भावंडांनो, हें शालेय शिक्षण मेळोवप जितले सोंपे तितलेच तें कठीण. तातूंतलो सराव चालू दवरलो म्हणटकच ताचो मार्ग सरळ, आनी सोंपो जाता. सराव दवरलो ना जाल्यार मात ते माथ्यावयलें वजें थारता ताचो पेंच वा वजन वाडत वाडत तुमच्या मनाक कश्ट दिता.
भावंडांनो, आमी शिकूंक जाय कारण ह्या शिक्षणा वरवी आमच्या चारित्र्याची उदरगत घडटा. आमच्यांत नवचैतन्य, नवसंस्कृती, नवसमाज निर्माण करपाची तांक, बळगें ती दिता. ह्या शिक्षणा वरवीं आमच्यांत नमळाय येता. परोपकारी, सेवाभावी घडटात. तेच प्रमाण ह्या शिक्षणा वरवीं आमी कार्यतत्पर म्हणल्यात खंयचेय काम करपाची उमेद आमच्यांत येता. देखूनच आमगेलीं जाण्टेलीं ह्या शिक्षणा वरवीं आमकां आमच्या दोन पांयार स्वतंत्रपणान उबी रावपाक घडयतात. आमी घरांतल्या जाणट्या मनशांचे उतर, सांगणी आयकून वर्गांतली शिकवण बरे तरेन आत्मसात करूंक जाय. भावंडांनो, शिक्षणाचें मूळ कडू आसता खरें पुणून ते परस ताचे फळ चड गोड आसता. हें शिक्षण म्हणल्यार काळख्या वातीचो उजवाडा दिवो. ह्या शिक्षणानच मनशाचें रूप सोबीत जाता. हें शिक्षण म्हणल्यार गरिबालें धन. तें कोण कशेंच चोरून व्हरूंक शकना. हे विद्ये बगर आमचें दर एकल्याचें जिवित व्यर्थ आसा देखून हाचो अणभव घेवन घरांतलीं जाण्टी मनशां शिकपा खातीर तुमचेर पेंच हाडटात, सक्ती करतात. भावंडांनो, ते सक्तीक पाळो दियात. तातूंत तुमचेंच हीत आसा. जाण्टेल्यांची सांगणी आयकत मुखार चलत रावल्यार दुबाव नासतना तुमचे मनावयलो ताण उणो जातलो. तुमचे शिक्षणाचो फुडलो मार्ग सोंपो, सरळ आनी टेंशन विरयत जातलो. हातूंत दुबावच उरना. पळयात तरी तशीं वागून.. शाब्बास, तुमकां म्हजी परबीं.. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
