भांगरभूंय | प्रतिनिधी
अनील खूप शिकिल्लो मनीस. समाजांत ताका व्हड नांव आसलें. ताची एकटीच अपुरबायेची धूव सियाना,अएका गरीब चेड्याच्या मोगांत आसली. “तो भुरगो गुणांनी बरो पूण सकयले जातिचो. ताचे लागीं लग्न जावन आमचें नांव तूं पिड्ड्यार करतलें. तो चेडो आमकां नाका. तो आमकां सोबना”. अनील आपले धुवेक शिटकायतालो. ताची धूव तें कानार घेनासली. सकयले जातीच्या चेड्याक आपले धुवेक दिवप, अनीलाक सोंसूक जालें ना. ताची धूव मात हट्ट धरताली. आपलें उतर आयकना म्हूण अनीलान तिचेर एक थापट मारलें. धुवेन आत्मघात करून थापटाचो परिणाम दाखल केलो.
आयज, आमी जायतें शिकल्यात. जायत्यो पदव्यो आमी जोडल्यात. खूब बरें. आमचे मदलीं जायतीं जणां पदव्यो घेवन बसल्यांत पूण शिक्षीत जाल्यांत काय,असो दुबाव येता. आमचें शिक्षण आमकां पदवीधर करता वा शिक्षीत करता, हो एक म्हत्वाचो मुद्दो. आमी घेतिल्लें शिक्षण आमकां कितले मेरेन आदाराचें जाता, हें एक हुमाणें. ‘आमची शिक्षण पद्दतूच तशी आसा’, अशें जायत्या जणांचें मत. अशें जाल्यार शिक्षण कितले मेरेन आमच्या घडनात्मक वावराक पाठिंबो दिता? होवूय एक म्हत्वाचो प्रस्न. असल्या कांय प्रस्नांचेर नियाळ करपाचो हो एक यत्न.
आमचे मदल्या जायत्या जणांनी शिक्षणा वरवीं बरें नांव जोडलां. कांय जणांनी म्हत्वाचे हुद्दे मेळोवन घेतल्यात. आपणें घेतिल्ल्या शिक्षणा वरवीं संवसारीक पांवड्यारूय वावुरल्यात आनी अजून लेगीत वावुरतात. असल्या वेळार, घेतिल्ल्या शिक्षणाक लागून आमी नानमेक पावतात. आमचो मान-आदर वाडटा. हातूंत कांय वायट ना. आमच्या शिक्षणाचो परिणाम आमचे जिणेचेर कसो जाता तें मात म्हत्वाचें.
शिक्षणाचो परिणाम म्हणटना, खासगी जिणेंत, कुटुंबीक जिणेंत आनी समाजीक जिणेंत ह्या तीन भागांनी आमी पळेवंक जाय. खरें म्हळ्यार आमी घेतिल्लें शिक्षण आमची जिणे-वागणूक बरी जावंक, आदाराची जावंक जाय. आमचे खासगी जिणेंत आमी भितर सरुया. आमच्या शिक्षणा वरवीं आमी साबार पदव्यो जोडून घेतात, पूण आमचे जिणेंत पदव्यो जोडून घेवंक आमकां वेळ ना. आमच्या कांय जणांची रावपाची कूड पळेवंक जाय. थंय आशिल्ली म्हेळसाण पळेल्यार आमचें शिक्षण आमकां खंयचे दिशेन व्हरता काय, असो सरळ प्रस्न मनांत उबो जाता. कांय फावटी आमचे कुडीची नितळसाण करूंक आमकां वेळ ना. शिक्षणा मुखार आमचे जिणेंत भितर सरून आमच्याच भावनांची काळजी घेवंकूय आमी फाटीं पडटात. कांय फावटी जोडिल्ल्या पदव्यां मुखार आमकां रचतल्या देवाचो पसून आमकां उगडास येना. ही परिस्थिती सगल्याच पदवी घेतिल्ल्यांची, अशें म्हाका म्हणपाचें ना.
कुटुंबीक जिणेंत आमच्या शिक्षणाचो बरो-वायट प्रभाव पडटा. आमच्या कुटुंबांतलीं सगलीं एकेच तरेचें शिक्षण घेनात. दर एकल्याची तांक वेगळी. आमचे मदल्या कोणेंय तरी चड शिकप घेतलें जाल्यार, ताचे वेल्यान आमचें शिकप कुटुंबीक जीण मजबूत करूंक आदाराचें जाता जाल्यार आमी आमकांच विचारूंक जाय. कुटुंबीक जिणेंत कितेंय वयर सकयल जालें जाल्यार, बरें तें घडून येवंक आमचो वांटो कितलो मोलाचो तें आमी जाणा जाल्यार बरें. आमच्या शिक्षणाचो बरो प्रभाव आमच्या कुटुंबांत दिसलो जाल्यार, आपो-आप तो प्रभाव समाजांतूय दिसून येता. आयज समाजांत वेगळेवेगळे प्रस्न आपली मान वयर काडटात. जाती-कातीचो किडो तर आयज मेरेन आमकां फाटल्या दारांतल्यान सतावंक लागला. ही सतावणूक चड करून पदवीधर मनशां कडल्यान जाता, हें सांगतना लजेन मान
सकयल वता.
शिक्षण आमी सगल्यांनी घेवंक जाय. आमी पदव्यो जोडूंक जाय. शिक्षण पद्दतीक शिणनासताना, असतित्वांत आशिल्ले पद्दती वरवीं घेतिल्ल्या शिक्षणांतल्यान आमी फक्त पदवीधर जावन खुशाल आसचे परस आमी शिक्षीत जावप खूब गरजेचें. आमचें शिक्षण वा जोडिल्ल्यो पदव्यो समाज बादूंक आदार दिना जाल्यार आमी घेतिल्लें तें शिक्षण, शिक्षणूच न्हय! दिसना तुमकां?
जॉन एम्. आल्फोंसो, कार्मेलीत,
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
