भांगरभूंय | प्रतिनिधी
ए क सांगतां तुमकां, आमी विचारांक एक नवो आकार नक्कीच दिवंक शकतात. आमच्याच लागींच्या विचारांतल्यान स्वताक
भायर काडप फक्त आमकांच शक्य! आमी मनीसपणांत खोलायेन रुजले जाल्यार आमच्या विचारांची दिका दाखोवंक मेळटा. आमची वृत्ती आनी संकल्पना बदलता तेन्ना परिस्थिती बदलता. तुमी सदांच थारायतात त्या नित्यनेमाचेर आनी आमी शिकून घेतिल्ल्या विचाराचेर सदांच आदारून आसतात. जशीं पावलां शेतांतल्यान वा रानाच्या मार्गांतल्यान वचपाक तयार जातात तशें कांय खोल- मूळ विचारांची वाट आमच्या मनांत निर्माण जाता. आमी हें जाणीवपूर्वक करीनात, जाल्यार तें आपसुकूच घडटा. आनी तीच पद्दत तुमकां सवंयेची दिसता. आमची तांक कितें तें आमी विसरतात आनी आमीच आमच्या विचारांचे गुलाम जातात.
आमी पृथ्वीचेर सुख भोगतात आनी मनाच्या उणावाक लागून विचारांक योग्य दिका मेळना. भुरग्याक आवयच्या दुदांतल्यान मेळटा तें समाधान! उमाशेचे रातीं भोंवतना रस्त्यार दाट झाडाची सावळी आनी बायच्या थंड उदकाची अनुभूती… खूब शांत, सुखद दिसता तातूंतल्यान. जेन्ना तुमी तुमच्या विचारांचो दर्जो सुदारतात तेन्ना तुमकां म्हान दिसता! फकत ताच्या कर्तुबांतल्यान न्हय, तर ताच्या वैचारीक गृहीतकांतल्यान ताका सगलीं वळखतात.
मनाक खोशी दवरपाची गरज आसा; एके वटेन जितलें बरें काम, चड पयशे, सगळ्यांत व्हडलें घर, दुसरे वटेन सगळ्या भोंवतणी उब्यो रावपी अदृश्य वण्टी, ताण आनी उदासीनताय. ती उणी करपाचो मार्ग मेळना. हाचेर एकूच उपाय म्हणल्यार वास्तवाची जाणविकाय दवरप. आमच्याच विचारां नुसार फट उलयत आसतना आमकां सत्य उलोवपाची संद मेळना. आमी अस्वस्थ जावन मनाची शांती घालयतात. हांगा आमी खरेंच निवड करतात तर जाणीवपूर्वक कितें वेंचून काडचें? आमचें मत बदलचें, आमकां प्रगती करपाक, भलायकी सुदारपाक आनी चड सक्षम करपाक कित्याक यत्न करचे न्हय? बुद्धीच्या दोळ्यांची वाट पळोवप. सगळे निवळ दिसता. त्रास, प्रलोभनां. बुद्दीचो उपेग करून नाका ते टाळूं येता, ताण सांबाळून भावनांचो आस्पाव करूं येता आनी वेळार योग्य कृती करूं येता.
आमी दीसभर आमचे विचार तपासूंक जाय. आमी विचार करतात तशें, आमी आसतात. आमी कितेंय आसूं, आमचे विचार आमच्या विचारांनी तयार जातात. म्हाका दिसता, तें स्वताक तयार करप वा मोडप आमच्या हातांत आसा. आपणाली कर्तुबां फकत आमच्या विचारांतल्यानच तयार जायत आसतात आनी आपणाली अशी वाटूय तयार जायत रावता, आपसुकूच.
जिवीत म्हणल्यार शाळे सारकें. तुमकां खूब शिकपाक, खूब पळोवपाक मेळटा हांगा… आनी अणभव लेगीत नवे घेवपाक मेळटात. आमकां हे शाळेंत सदांच आपलो अभ्यास आपणाकूच करचो पडटलो. खोशी जावन आमी हे शाळेंत येवचें पडटा…. आनी आमी जियेवपाचो स्वर बरो करपाची युक्तय सोदूंक जाय. चलतना वाटेर मेळपी सैम आमकां उमेद दित आसता. नाण्याच्यो जश्यो दोन बाजू आसतात, तशे आमचे भोंवतणी दोन प्रकारचीं मनश्या जियेतात. न्हंयेची धांवपळ आनी सैमाचीं वेगवेगळीं रूपां आसूं, आनंदाची खोस आसूं आनी दुसरो मनीस जेन्ना संवाद सादता तेन्ना मनांत रावपाची खोस सोदून काडपाक मेकळीक मेळटा आनी ताणें ताका काळजांतल्यान सोदूंक जाय. जिविताक पळयनासतना ताणें ताका आपल्या मनांतल्यान सोदूंक जाय. तेन्नाच ताका तें खात्रीन मेळटलें .
ह्या संवसारांत जितले रंग आसात तितले रंग अस्तित्वांत आसात. मनशांचे…. आनी ते रंग बदलपाची गती इतली आसा की कितें सांगू … पूण म्हाका दिसता आमी आमचें मन थीर दवरचें. अभिमान, अहंकार सोडून हेरांक आमी समजून घेवपाची गरज आसा. एक वाक्य उलयतना धा फावटीं विचार करपाक जाय. म्हणल्यार, आपणा वांगडा तुमी हेरांचीं काळजांय सहजपणान सांबाळूंक शकतात. दर एका नात्यांत अशें खाशेलेंपण आसता. वेगवेगळे रंग आसतात. एक गोडी आसता. तो आस्वाद घेवंक जाय, विचाराच्या पावलांचेर चलतना. मुक्तपणान… काळजासून…
गौरी भालचंद्र
9422373926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
