आमी खरींच स्वतंत्र आसात?

भांगरभूंय | प्रतिनिधी

सगल्यांक वांगडा घेवन सगळीं एकचारान वावरुया आनी सगळ्या देशां मदीं आमचो भारत देश पयल्या क्रमांकाचेर व्हरूया.

भारतीयां खातीर 15 ऑगस्ट 1947 हो भांगराळो दिस. भारताक ब्रिटिशां कडल्यान सोडोवपाक आमचे स्वातंत्र्यसैनीक जिवाची पर्वा करिनासतना झुजले. तांणी खूब कश्ट केले आनी आमकां स्वातंत्र्य मेळोवन दिले. आयज ह्या दिसाक 76 वर्सा पुराय जाता. भारत म्हजो देश, हांव एक भारतीय अशें म्हणपाक आमकां सगळ्यांक अभिमान दिसता. दरवर्सा भशेन अंदूंय हो दीस वेगवेगळ्या कार्यावळींनी भारतभर मनयतले, आनी तो व्हडा दबाज्यान मनोवपाक बी जाय. पूण ह्याच स्वातंत्र्याच्या 76 वर्सांच्या काळांत आमी कितें मेळयलें, कितें वगडायलें, कितलें बदल्लें, कितें आनी कितली उदरगत केली हाचो शांतपणान विचार करप खरेंच गरजेचें आसा. जर आमी हाचो खरोच खोलायेन विचार केलो तर मागीर लक्षात येतलें आमी खरींच स्वतंत्र आसात? आनी, तें स्वातंत्र्य ह्या देशांतल्या दर एका घटकाक मेळटा काय?

सध्या देशांत दिसपट्ट्यो जायत्यो वायट घडणुको घडटात. गुन्यांव दिसान दीस वाडत आसात. खून, बलत्कार, चोरी, मारपेट, अपहरण, भ्रश्टाचार आदिं प्रकरणां चालुच आसात. खासा करुन चलयांचेर अत्याचार जायत आसात. हीं प्रकरणां उणीं जावपा बदला फाटल्या कांय म्हयन्यां सावन बरींच वाडल्यांत. सध्याची गाजिल्ली गजाल म्हळ्यार मणिपूरांत घडिल्ली घडणूक. दिसाची सगल्यां लोकां मुखार घडिल्ली ही घडणूक. देशभर ताची चर्चा अजून चालू आसा. भारतांतली बायलां खऱ्यांनीच स्वतंत्र आसात काय ना, हो प्रस्न ही घडणूक पळोवन दिसता.

आमी 21 शेकड्यांत पावल्यांत, 76 वो स्वतंत्रताय दीस आमी देशभर मनयतलीं. आमी दुसऱ्यांक तांच्या रंगा वयल्यान, कपड्यां वयल्यान, ताची भास, रावप, उलोवप, खांवप अशा जायत्या गजालीं वयल्यान पारखीतात. जात- धर्मा वयल्यान मनशाक उणेंपण दाखयतात. खरें म्हळ्यार हो तांचे वयलो एके तरेचो अन्याय. हें पळयल्यार आमी खंयच्या अर्थान स्वतंत्र आसा काय?

जायत्या वाठारांनी सगळी कडेन कोयर पातळिल्लो दिश्टी पडटा. आमी ‘स्वच्छ भारत, नितळ गोंय’ म्हटलें म्हणून भारत खरोच नितळ जातलो? त्या खातीर दरेकान तो नितळ करचो पडटलो.

सरकार 13 ते 15 ऑगस्ट तीन दीस “हर घर तिरंगा” मोहीम चलयता. जायते लोक हे तीन दीस घराचेर, दुकानांचेर, गाडयांचेर राश्ट्रध्वज उबारतले आनी देशां खातीर मोग उक्तायतले. तीन दिसां उपरांत तांतूतल्या कांय जाणाक ध्वज खंय आसतलो,  हें लेगीत खबर आसचे ना. पूण फकत हे तीन दीस वा वर्सांतल्यान एकदाच 15 ऑगस्ट स्वतंत्र्य दीसा देशा विशीं मोग दाखोवन ताका खरोच किदें अर्थ आसा? आमची भोंवतणची सुवात नितळ दवरून, गरजेवंतांक मजत करून, अन्याय आनी भ्रश्टाचारा आड आवाज उबारून देशाचेर आसलेलो मोग आमी सदांच उक्तावपाक शकता.

दरएकल्यान आपल्या मनांक विचारचें, आमी खरींच स्वतंत्र आसात? जाप आपशींच मेळटली. आमचे खातीर दरेक दीस हो स्वतंत्रताय दीस आसपाक जाय. दर एकल्याक स्वतंत्रपणान जियेवपाचो ह्क्क मेळपाक जाय. आमच्या विचारांनी, वागणुकेन आमी स्वतंत्र जावपाक जाय. सगळीं एकठांय जावन एकवटान ह्या  सगल्या समस्यां आड वावुरलीं जाल्यारुच आमचो भारत देश खऱ्या अर्थान स्वतंत्र जातलो. हें स्वातंत्र्य मेळोवप कठीण आसा, पूण अशक्य तर ना न्हय? सगल्यांक वांगडा घेवन सगळीं एकचारान वावरुया आनी सगळ्या देशां मदीं आमचो भारत देश पयल्या क्रमांकाचेर व्हरूया. सगल्यांक स्वतंत्रताय दिसांची परबीं.

– प्राची गांवकार

सुर्ला – सत्तरी