भांगरभूंय | प्रतिनिधी
कितें उलयता तें थोडेंच उलय. आमकां आयकुंक पासियेन्स ना.- असल्या उतरांनी जायते फावटी उलोवप्याच्यो मस्कऱ्यो जातात. “तो कितें सेन्सलेस उलयता. आमी आयकतात म्हूण तो उलयता कितें?” असलेय उद्गार एका उलोवप्या विशीं आयकुंक मेळटात. “तो आमची परिस्थिती वळखला. देखून तो फावो तितलेंच उलयला.” कांय फावटी अशीय तोखणाय जाता. तशें पळेवंक गेल्यार आयज सगळेच उलयतात. आयकुंक मात भोव थोडे आसात. आयज भौशीक रितीन जायतीं उलोवपां जातात, पूण तांकां आयकुंक मात आमचे मदल्या जायत्या जणांक वेळ ना. असले परिस्थितिंत आमी आसात म्हणटच, आमी उलयताना कशें उलयतात तें गरजेचें
आमकां कोणेंय उलोवपाची एक संद दिली जाल्यार,आमची तांक आमी पळेवंक जाय. मेळटा ती संद कित्याक सोडूंया म्हणून आमकां जाय ते परीं आमी उलोवपाचे यत्न केले जाल्यार, ‘खंय गेल्लो खंय ना,कितें हाडलें कांय ना.’ असो समज जातलो. आमी उलयताना, एक म्हत्वाचें आनी तें आमच्या मनांत रिगोवंक जाय आनी तें म्हळ्यार, आमी खंय उलयतात? आमच्या लागींच्या पंगडा कडेन काय भौशीक माचियेर तें गरजेचें. आमच्या लागींच्या कडेन म्हळ्यार कुटुंबीक समारंभ, इश्टांच्या पंगडांत, आनी हेर..असल्या वेळार आमचे लागीं घडटा ते परीं आमी उलयलीं म्हूण कांयच हरकत ना. आमच्या सांगाता आसललीं आमकां वळखतात आनी मानून घेतात. पूण मानून घेतात म्हूण सोबना तसलें उलोवप उपकारना.
भौशीक रितीन केल्ल्या उलोवपांत कांय मुद्दे आमी मनांत दवरल्यार बरे.
उलोवप करताना आमी खंयच्या विशयाचेर उलोवंक जाय तें आदिंच फुडें जाणून घेवन फावो तसली तयारी करप गरजेची. दुसरे वटेन बरी तयारी करून गेले आनी आमी तयार केल्लो विशय तर आयकुप्यांक आवडीचो न्हय जाल्यार तो बदलून तांच्या आवडीच्या विशयाचेर उलोवपाची तांक आमकां उलोवपी कशे आसुंक जाय.
आमी कोणा लागीं उलयतात तें आमी मनांत हाडुंक जाय. आयकुपी तर भुरगीं आसात जाल्यार तांकां समजता तसली भास आमची आसल्यार बरी. व्हडिलां आसत तर फावो ते प्रमाणांत आमी उलोवंक जाय. तरणाटीं तर आमचे आयकुपी वर्ग जाल्यार तीं वापरतात तसली भास आमकां पयलीं समजूंक जाय. सगळीं तर आमकां आयकतात जाल्यार आमच्या उलोवपांतल्यान सगळ्यांक नीत दिवंकूच जाय. खरेंच हें एक आव्हान!
सगळ्यांक आयज वेळ गरजेचो जाला. मनशाची आयकुपाची शक्ती खुपूच उणी.कांय फावटी, आमच्या उलोवप्यांक वेळाचें बंदनूच लागना अशें दिसता. एका सेमिनाराक ‘अभ्यास पेपर’ सादर करता जाल्यार चड वेळ घेतलो म्हूण कायंच ना. हाका आयकुपी वर्ग दुसरो. आमच्या लग्ना वेळार सावोद वो भलायकी मागताना पासून नाका तें उलोवप आनी बेश्टोच वेळ खावप हें नीज उलोवप्यांक सोबना. भलायकी मागप ही फक्त नव्या काजारी जोड्या विशीं दोन उतरां उलोवन तांकां बरें मागप, आसता. देखुनूच वेळ आमकां गरजेचो.
आमकां खंयच्याय समारंभाक उलोवप करुंक आमंत्रण दिलें आनी आमी अंमक्याच वेळाक तयारी करून आमी गेल्यार पासून परिस्थिती प्रमाणें आमची वागणूक जावंक जाय. चाली- बली करुंक जाता जाल्यार करप कायंच वायट न्हय. दुसरे वटेन समारंभूच सुरवात करुंक उशीर जालो जाल्यार आमी परिस्थिती पळेवंक जाय. तयार केला म्हूण सगळें सांगुंकूच जाय म्हण ना.
उलयताना आमी सरळ आनी स्पश्ट उलोवन आयकुप्यांचीं काळजां जिखपाक यत्न करुंक जाय. वेळ पावना म्हूण आमी धांवलीं वो उलोवपाची गती चडयली जाल्यार आमच्या यत्नाक फळां लाबचीं नांत. उलवोप्याची उबी रावंची रीत तशेंच ताचें न्हेसप तितलेंच म्हत्वाचें. ‘माय्क’ वापरतात जाल्यार ताचीय वळख आसल्यार बरी.
उलोवप केल्या उपरांत उलोवप्यानूच आपलें अंतस्कर्ण जागयल्यार बरें. जायते फावटी , चडशे आयकुपी आंचे फुड्यांत ‘उलोवप बरें जालें’ म्हण सांगतात, पूण आमचे फाटल्यान नांव पिड्ड्यार करतात. आमची मोलावणी आमी केली जाल्यार फायदो जावंचो नासलो? हाका मात आमकां उकतें मन जाय.
असले जायते मुद्दे आमकां उलोवप्यांक गरजेचे. आयचे परिस्थितिंत आमचे चडशे उलोवपी वयल्या मुद्यांचेर आड नदर करून आपलेंच हांशें करून घेतात. बरी तयारी करून परिस्थिती परमाणें केल्ल्या आमच्या उलोवपांतल्यान दूसऱ्याचे वाडीक हात- भार लावुंया.
जॉन एम्. आल्फोंसो, कार्मेलीत,
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
