भांगरभूंय | प्रतिनिधी
संवसारांतली सगळ्यांत नेटान वाडपी अर्थवेवस्था अशें म्हणपी देशाक म्हत्वाच्या प्रस्नांचेर भुमिका घेवंक मेळना जाल्यार त्या विस्ताराचो वा वाडत वचपी प्रभावाचो नेमको हेतू कितें असो प्रस्न उप्रासता. हे संबंदीं फाटल्या कांय दिसांनी घडिल्ल्या कांय घडामोडींचो उल्लेख करूं येता. तातूंत सगळ्यांत चड चर्चीत चलचित्रफिति भारतीय विद्यार्थी वा नोकरी सोदपी मनशाचो आशिल्ली. न्यूयॉर्क विमानतळार ह्या भारतीय तरणाट्याक थंयच्या बंदर प्राधिकरण पुलीस खात्याच्या (पीएपीडी) अधिकाऱ्यांनी जमनीर हातपांय बांदून दवरलो. ताका पोटार न्हिदोवन फाटी फाटल्यान हात बांदून, हेर प्रवाशांच्या मुखार, खूब अपमानकारक वागणूक दिली. त्या वेळार हाजीर आशिल्ल्या अमेरिकेंत रावपी भारतीय वेवसायीक कुणाल जैन हांणी ही घडणूक चित्रीत करून सोशल मिडियाचेर शेअर केली. जैनान न्यूयॉर्कांतल्या भारतीय दूतावासाकय हे विशीं म्हायती दिली. ही घडणूक 8 जून दिसा घडली, त्या वेळार भारतीय दूतावासान हे घडणुकेची आनी तातूंत आस्पाव आशिल्ल्या तरणाट्यांची चवकशी करतले अशें आश्वासन दिलें.
तीन दिसांनी बिरेस्तारा भारताच्या परराश्ट्र मंत्रालयान खबरां एजन्सी एएनआय कडेन उलयतना सांगलें, हे घडणुके विशीं वा तातूंत आस्पाव आशिल्ल्या तरणाट्यां विशीं कसलोच तपशील मेळना आनी आमी वॉशिंग्टनांतल्या भारतीय दूतावासाक आनी न्यूयॉर्कांतल्या भारतीय वाणिज्य दूतावासाक हे विशीं म्हायती दिल्या. दिल्लींतल्या अमेरिकेच्या दूतावासांतल्यानय आमी स्पश्टीकरण मागलां असली जापो हांगाचें तपास एजन्सी खातीर वा सरकारी कार्यालयाक सोब सारकी योग्य आसतल्यो. पूण तीस देशांनी प्रतिनिधी मंडळ धाडून ताचे खातीर समन्वय करून ‘ऑपरेशन सिंदूर’ विशीं भारताची भुमिका मांडपी परराश्ट्र मंत्रालयाक तें सोबना. अमेरिके कडेन आमच्या थेट संवादाच्या व्याप्ती विशीं हालींच्या काळांत वारंवार दुबाव निर्माण जाला. त्या देशाचे अध्यक्ष डोनाल्ड ट्रम्प भारता कडेन संबंदीत आशिल्ल्या सगळ्या गजालींचेर, द्विपक्षीय वेपारा सावन भारत-पाकिस्तान संघर्शांत मध्यस्थी करपा मेरेन परत परत विधानां करता. प्रधानमंत्री नरेंद्र मोदी त्या देशाक भेट दिता, तेच बरोबर अमेरिकेंतल्यान बेकायदेशीर भारतीय स्थलांतरीतांक अपमानकारक रितीन भारतांत धांवडावन घालता. भारतांत मोबायल फोन तयार करचे न्हय अशी शिटकावणी तो अॅपलाक दिता. अशें करून भारताचे वाट्याचो तोणांतलो घास काडून घेवपाचो अमेरिकेचो हेत ना मू? असो अमेरिकेक सादो प्रस्न विचारचो सोडाच पूण ह्या सगळ्या प्रसंगांनी आमी केन्ना त्या देशाच्या फुडारपणा विशीं हुस्को उक्तावन स्पश्टपणान विचारलां?
आमकां मेळटात तें परराश्ट्र मंत्रालयांतल्यान येवपी असंबद्ध अप्रासंगीक आनी मिळमिळीत खुलाशे. खरें म्हणल्यार परराश्ट्र मंत्रालयांतल्या सनदी नोकरशायांचें हें काम न्हय. हे खातीर प्रधानमंत्री, परराश्ट्र मंत्री, गृहमंत्री वा संरक्षण मंत्री सारक्या उंचेल्या पांवड्यावेल्या अधिकाऱ्यांनीच उलोवचें. आयज बोटांच्या तोंकाचे सुवाते इतली म्हायती मेळ्ळ्या उपरांत संबंदीत तरणाटो कोण आनी खंय आसातl तें सोदून काडपाक आमच्या विदेश खात्याक कितलेशे दिस जाय? ताका अमेरिकेच्या वेगवेगळ्या एजन्सीं कडेन फालोअप लेगीत जायना.अमेरिकेच्या विदेश खातें, घर सुरक्षा खातें, इमिग्रेशन वा पुलीस खात्या कडेन ज्या मनशा आड कारवाय केल्या ताचे विशीं कांय तपशील आसपाची शक्यताय आसा.
तें साध्य करपाक जाय आशिल्ली इत्सा वा धैर्य आमी कित्याक दाखोवंक शकनात? ट्रम्प प्रशासनान विद्यार्थी आनी स्थलांतरीत हे दोन वर्गां आड झुजां शिंग फुकलां भारतांतल्यान दोनूय वर्गातले लाखांनी लोक त्या देशांत वतात. थंय वतना विद्यार्थ्यांनी कितें सांगचें काय ना तें आमी थारावंक शकनात. पूण ह्या देशांतल्यान फकत कायदेशीर स्थलांतरीत लोक थंय वचचे हाची पुराय जापसालदारकी आमची. तशेंच थंय वचपी दरेका भारतीयाचो – विद्यार्थी आनी स्थलांतरीत कामगार – हांचो नोंद दवरप ही हांगाच्या गृह आनी परराश्ट्र मंत्रालयांची जापसालदारकी. थंयचें प्रशासनाक भारत हो इश्ट देश आसा हें मतींत धरना. आमच्या बेकायदेशीर स्थलांतरीतांक आफ्रिकन वा भारतीय देशांतल्या नागरिकां भशेन वागयतात. जो मेरेन हांगाच्या फुडाऱ्यांक हाचेर हरकत घेवपाचें धाडस ना तो मेरेन चवथी व्हड अर्थवेवस्था, संवसारीक गुरू आदी पदवी अर्थहीन थारतली. आमच्याच नागरिकांक अपमानकारक वागणूक मेळटा आसतना करतात आमचें सरकार पळोवप्याची भुमिकेत वावुरता. युरोपांतल्या इझ्राएलाच्या इश्ट देशांचे सरकार वा पेप गार्डियोला सारके संवसारीक नामनेचे फुटबॉल प्रशिक्षक लेगीत इझ्राएल सारकिल्या देशान केल्ल्या अत्याचाराचेर आपली नाराजगी जाहीरपणान उक्तायतात तेन्ना लेगीत आमी निष्क्रिय प्रेक्षकाचे भुमिकेंत वावुरले. भारतीयांक हाचे पयलीं हाचे आदीं अमेरिकें कडसून भारताक तिरस्काराची वागणूक मेळ्ळ्या, खास करून फाटल्या शेंकड्यांत. ‘त्या’ सरकारां परस वेगळें आनी सुदारलां अशें सांगपी आयचें सरकार जायत्या म्हत्वाच्या प्रस्नांचेर ‘काळखांत रावप’ पसंत करता. हेरांनी आमचे कडेन हेंच धोरण आपणायलें जाल्यार कशें जातलें?
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
