भांगरभूंय | प्रतिनिधी
पणजी: आरजीचे सांत आंद्रेंचे आमदार विरेश बोरकार हांणी सभापती गणेश गांवकार हांचे आड हक्कभंग प्रस्तावाची नोटीस दिल्या. विधीमंडळ खात्याच्या सचिवां कडेन तांणी ही नोटीस सादर केली. ह्या नोटिसेचेर हक्कभंग समिती निर्णय घेतली.
अर्थसंकल्पी अधिवेशन 6 मार्चाक सुरू जालें. हें अधिवेशन 27 मार्च मेरेन चलपाचें आशिल्लें. फोंडें पोटवेंचणूक जाहीर जाले उपरांत आचारसंहिता लागू जाल्ल्यान सोमारा 16 मार्चाक अधिवेशन बेमुजत तहकूब केलें. आचारसंहितेक लागून अधिवेशन तहकूब केले उपरांत विरोधकांनी हरकत घेवन लेगीत अर्थसंकल्पाक सभाघरान मान्यताय घेतली. आचारसंहिता लागू जाली जाल्यार अर्थसंकल्पाक मान्यताय कशी घेतली? सरकाराच्या संगनमतान अधिवेशन तहकूब करप ही पुर्वनियोजीत घडणूक आशिल्ली. सभापती गणेश गांवकार हांचे कडल्यान हक्कभंग जाला, असो दावो आमदार विरेश बोरकार हांणी केलाे. हाचेर शिस्तभंग समिती कडल्यान कारवाय जावची, अशी तांची मागणी आसा.
अर्थसंकल्पी अधिवेशन 14 दीस चलपाचें आशिल्लें. फोंडें पोटवेंचणुकेची आचारसंहिता लागू जाले उपरांत सातव्या दिसा 16 जानेवारीक अधिवेशन तहकूब जालें. आचारसंहिता लागू जातकच अधिवेशन तहकूब करपाची कृती पुर्वनियोजीत आशिल्ली. अशें नोटिसेच्या पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
