भांगरभूंय | प्रतिनिधी
भांगरभूंय । प्रतिनिधी
वास्कोः आपल्या घरा कडेन वचपाची पारंपरीक वाट आडायल्यान आपल्या पोट भरपाच्या कामाचेर सामको परिणाम जाला. हातूंत लक्ष घालून आपल्याक न्याय मेळोवन दिवचो अशी विनवणी दोनूय पांयांनी अपंगुळ आशिल्ल्या वेळसांव हांगच्या दुमिंगो गोयश हाणे कुठ्ठाळेचो आमदार आंतोन वास हांका केल्या. ना जाल्यार न्याय मागणे खातीर उपासाक बसतलों अशें ताणे सांगलें. ह्या प्रकरणात कशी वाट काडपाक जाता हें पळोवपाचें आस्वासन वास हाणे दिल्ल्यान ,सध्या उपसाक बसपाचो निर्णय दुमिंगोन फाटीं घेतला.
वेळसांव हांगा रावपी दुमिगोन वेळसांव पंचायतीची वेंचणूक लडयल्ली मात ताका हार खावची पडली. आपल्या कुटूंबाचें पोट तो रिक्शा चलोवन करता. मात काय दिसां पयलीं ताच्या घरा कडेन वचपी वाट वेळसांवच्या नुस्तेमारी असोसिएशनाच्या अध्यक्षान आडायल्ल्यान आपल्या वेवसायाचेर परिणाम जाला. रिक्शा व्हरपाक जाय तितली वाट दवोरची अशी मागणी ताणे करून ते संबंदी ताणे गोंय मानवी हक्क आयोगा, मुरगांवचो उपजिल्होधिकारी आनी पुलीस स्टेशनांत निवदेना सादर करून प्रश्न सुटावो करपाची मागणी केल्ली मात कसलोच प्रतिसाद मेळना हें पळोवन ताणे आमदार वास हाची भेट घेवंन तांकाय निवेदन दिले आनी आपली कैफियत तांचे सामकार मांडली.
हांव जरी अपंगुळ आसा तरी कोणाचे मजतीची अपेक्षा करनास्तना रिक्शा चलोवन कुटूंबाचें पोट भरतां. फाटली वीस वर्सां हांव रिक्शा चलयतां, मात हालींच वाट बंद केल्ल्यान रिक्शा भायर काडपाक मेळना अशें दुमिंगान सांगलें. एके दिव्यांक व्यक्तीची घरा कडेन वचपाची वाट आडावपाचो प्रकार आयकून म्हाका शॉक बसलो. मनीसपणाचे नदरेंतल्यान दुमिंगो हाची सतावणूक करपाचें थांबयात अशें आपणे नुस्तेमारी असोसिएशनाच्या अध्यक्षाक सांगला आनी हे प्रकरण संबंदीत सरकारी अधिकाऱ्यांक सामकार व्हरून सुटावे करपाचें आपणे थारायलां अशें आमदार आंतोन वास हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
