भांगरभूंय | प्रतिनिधी
हणजूण्यां रस्तो रुंदीकरणाच्या नांवा खाला न्यायलयाचो अवमान
भांगरभूंय । प्रतिनिधी
म्हापशें : आसगांव ते हणजुणें मेरेनच्या बेकायदो रस्तो रुंदीकरणाच्या मुद्द्या वयल्यान आरटीआय कार्यकर्ते राजन घाटे आनी कुमारवाडो हणजूणेंचे ज्येश्ठ नागरीक जगन्नाथ सावंत उर्फ वाडकार हांणी शिवोलेची आमदार डिलायला लोबो आनी कळंगूटचे आमदार मायकल लोबो हांचे आड गुन्यांवकारी अतिक्रमण तशेंच उच्च न्यायालय आनी सर्वोच्च न्यायालयाचे आदेश मोडिल्ले खातीर पुलिशेंत कागाळ नोंद करून गुन्यांव दाखल करपाची मागणी केल्या.
वयल्या दोनूय आमदारांनी आपल्या पदाचो गैरवापर करून आनी योग्य कायदेशीर प्रक्रिया करिनासतना हणजूण्यां खाजगी मालमत्तांनी बेकायदो घुसखोरी केली, बुलडोझराच्या आदारान अवैध्य तरेन ह्यो मालमत्तो मोडिल्ल्याचो आरोप कागाळेंत केला. हणजूणें पुलिशेंत ही कागाळ दाखल केल्या.
11 मेक आमदार मायकल लोबो आनी डिलायला लोबो हांचे हाजिरेंत रस्तो रुंदीकरणाच्या नांवा खाला अज्ञातां कडल्यान थेट देखरेखी खाला खाजगी मालमत्तेची रचना तशेंच राखणे वणत मोडल्या. मुंबय उच्च न्यायालयान अशी बुलडोझर कारवाय करचे आदीं 15 दिसांची नोटीस दिवपाची गरज आसा, असो निर्णय दिल्लो. डिसेंबर 2024 त जारी केल्ल्या सर्वोच्च न्यायालयाच्या मार्गदर्शक तत्वांत म्हणिल्लें प्रमाण, खाजगी मालमत्तेचेर अतिक्रमण करचे खातीर योग्य जमीन संपादन आनी कायदेशीर प्रक्रिया पाळपाक जाय, अशें राजन घाटे हांणी आपले कागाळेंत म्हणलां.
कायदेशीर परवानगे बगर मालमत्ता मातये भरवण करप हें न्यायीक आदेशांचें स्पश्ट उल्लंघन आसा. तशेंच दोनूय आमदारांनी लोकांक लुकसाण करपाच्या उद्देशान ही गुन्यांवकारी घुसखोरी आनी अतिक्रमण केलां. ताका लागून तांचे आड गुन्यांव नोंद करचो, अशी मागणी घाटे हांणी केल्या. मजगतीं, जगन्नाथ सावंत उर्फ वाडकार (85) हांणी आमदार लोबो जोडप्या आड पुलिशेंत कागाळ केल्या. कागाळदाराक सांगिनासतना तांची राखणे वणत मोडली तशेंच दोनूय दुबावितांनी जेसीबी, ट्रक, मजूर आनी कांय गुंडा सयत आपले मालमत्तेंत अतिक्रमण केलां. वाडकार हांणी दावो केल्ल्या प्रमाण, ताणें भाटकारा कडल्यान प्लॉट खरेदी केल्लो. रुपांतरण शुल्क भरपा सयत सगळी प्रक्रिया पुराय केले उपरांत झोन बदलून सेटलमेंट मेळयल्लें, तशेंच मालमत्तेची राखणे वणत कायदेशीर आसा. ती 80 वर्सां सावन अस्तित्वांत आसली. 8 मेक पंचायतीन तांकां नोटीस जारी केल्ली आनी रस्तो रुंदीकरण वाठारांत आशिल्ले राखणे वणटी संबंदांतलीं कागदपत्रां सादर करपाक सांगिल्लीं. मात ते आदींच बेकायदो तरेन आपली राखणे वणत मोडिल्ल्याचो दावो, हे कागाळेंत वाडकार हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
