भांगरभूंय | प्रतिनिधी
भांगरभूंय । प्रतिनिधी
पोरणे गोंयः चिंबल जंक्शनाचेर फ्लाय ओव्हर बांदपाचें काम सुरू जातगीर थंय येरादारीच कोंयडी जावची न्हय हे खातीर कसली उपाय येजवण करपाक जाय हाची पळोवणी सान्ताक्रुजाचो आमदार रुदोल्फ फर्नांडीस हांणी संबंदीत सरकारी अधिकाऱ्यां सयत केली. सीताराम इन्फ्रप्रोजेक्स कंपनीर फ्लाय ओव्हर बांदपाचें काम दिलां.
बांदकाम खात्याचो राज्य म्हामार्ग विभाग, येरादारी पुलीस, चिंबल पंचायत मंडळ आनी कंत्राटदार कंपनीच्या प्रतिनिधी वांगडा आमदार फर्नांडीस हांणी ही पळोवणी केली. फ्लाय ओव्हराच्या कामाक आडमेळे येवचे न्हय हे खातीर कंदब बायपास मार्गा वयले येरादारीचें नियंत्रण करपा खातीर कसली उपाय येजवण करप शक्य आसा हाची ह्या वेळार पळोवणी केली.
फ्लाय ओव्हराचें काम सुरू करचीं पयलीं कत्राटदाराक येरादारी वेवस्थापनाचो प्लॅन सादर करपाक सांगलां. सगल्या संबंदीत खात्याचे अथिकारी ताचेर भासाभास करतले. ते उपरांत हो प्लॅन चालीक लायतले अशें येरादारी पुलीस निरीक्षक ब्रॅडन डिसोझा हांणी पत्रकारांक सांगलें. कदंब बायपास रस्त्या वयल्यान येवपी वाहनांक तांची स्पीड कमी करपाची सूचोवणी मेळची हे खातीर देंवतेल सुरवात जात थंय एक सिग्नल बसोवपाची सूचोवणी आमदार फर्नांडीस हांणी केल्या.
चिंबल फ्लाय ओव्हराचें काम एक वर्सांत जातलें बाकीची सगळी यंत्रणा जाग्यार घालपाक आनीक एक वर्स लागतलें अशी म्हायती कंत्राटदाराच्या प्रतिनिधीन आमदार फर्नांडीस हांका दिली. जंक्शनाकडेन दोन म्हयन्यां भितर सर्व्हिस रस्त्याचें बांदकाम पुराय जातलें अशें तांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
