भांगरभूंय | प्रतिनिधी
म्हापशें ः कॉंग्रेस आमदार अॅड. कार्लुस फेरेरा हांचे कडेन मॉर्फ केल्ल्या अश्लील व्हिडियोच्या आदाराचेर खंडणी घेतिल्ल्या प्रकरणांत दुबावीत कुकेश रावता (रा. मूळ ओडिशा) हाची सशर्थ जामीनाचेर म्हापशें न्यायालयान सुटका केली.
बिरेस्तारा १२ तारखेर सांजेवेळार म्हापशें पयल्या न्यायालयान दुबाविताचो २० हजार रूपया हमी रक्कम आनी तितल्याच रुपयांच्या हमीदाराच्या हमी प्रमाण जामीन अर्ज मंजूर केला. तशेंच दुबाविताक हेर अटी लागू केल्यात.
बुधवारा ११ तारखेक ह्या जामीन अर्जार न्यायालयांत सुनावणी जाल्ली आनी निकाल राखून दवरिल्लो. दुबाविता वतीन अॅड. कपील केरकार, जाल्यार सरकारी पक्षा वतीन सरकारी वकील तेजस पवार हांणी युक्तीवाद केलो. तशेंच देविदास पणजीकार ह्या हळदोणच्या मतदाराची हस्तक्षेप याचिका न्यायालयान बुधुवारा भायर मारिल्ली. ताचे वतीन अॅड. विनायक पोरोब हांणी युक्तीवाद केल्लो.
मजगतीं, आमदार कार्लुस फेरेरा हांणी ५ डिसेंबर २०२३ दिसा हे विशीं गुन्यांव फाट्यांत कागाळ दाखल केल्ली. जाल्यार दुबाविताक गुन्यांव फांट्यान एका वर्सा उपरांत २ डिसेंबर २०२४ दिसा अटक केल्ली. दुबावीत सध्या कोलवाळे न्यायालयीन बंदखणींत आशिल्लो.
मजगतीं, खंडणीची रक्कम दिना जाल्यार हो मॉर्फ केल्लो व्हिडिओ सोशल मिडियाचेर वायरल करतलों अशी धमकी कागाळदाराक दुबावितान दिल्ली. ते प्रमाण कागाळदारा कडल्यान दुबावितान वट्ट ५ लाखांची खंडणी रक्कम घेतिल्ली. सुरवातेक ५५ हजार रूपया कागाळदारान संशयिताक खंडणीच्या स्वरूपांत दिल्ले. उपरांत दुबावितान ५ कोटी रूपयांची खंडणीची मागणी केल्ली.
२ डिसेंबराक दुबावीत कुकेश रावता हाका गुन्यांव फांट्यान अटक केल्ली. पुलिसांनी दुबाविता कडल्यान मोबायल फोन जप्त केल्लो. पुलीस कोठयेंत असतना दुबाविता कडलो हो मॉर्फ व्हिडिओ वायरल जालो. ताका लागून राज्यांतल्या राजकारणांत हो विशय चर्चेक आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
